download HolidaySmart 假期日常 app
李思雅愛犬被剝 17 隻牙後失明! 呼籲網民「千祈咪去」 動物醫院要求公開道歉

李思雅愛犬被剝 17 隻牙後失明! 呼籲網民「千祈咪去」 動物醫院要求公開道歉

生活熱話 娛樂新聞
By Ivy on 02 Feb 2021
Digital Content Writer

心愛嘅寵物有病,梗係想即刻帶佢去獸醫度醫番好,等佢可以繼續舒舒服服咁過日子,所以如果去完獸醫度情況冇好轉,反而仲差咗,真係會令人好沮喪。近日,前香港小姐李思雅(Cindy)就喺網上面吐苦水,指有寵物醫院唔單止冇令佢嘅愛犬回復健康,更加令事件雪上加霜,認真慘慘。

遭受不幸嘅就係圖片中嘅灰色狗狗 QuirkyPhoto from 李思雅 Official Instagram

事件嘅主角就係灰色嗰隻狗狗,叫做 Quirky,李思雅不時都會喺 Instagram 上面大曬同佢嘅靚靚合照。

Cindy 唔止養咗一隻狗狗,係一個愛狗之人Photo from 李思雅 Official Instagram

不過,早前李思雅發現 Quirky 嘅牙齒好似有啲唔舒服,就帶咗佢去一間位於元朗嘅動物醫院睇醫生。李思雅聲稱對方診症之後指出狗狗嘅腎有問題,要佢先留醫吊鹽水,再要佢買一大堆配方糧,同埋講明之後有機會要剝牙,費用會係逐隻逐隻計算。

Cindy 話獸醫稱狗狗唔止牙有問題,可能腎都有問題Photo from 李思雅 Official Instagram

李思雅決定相信獸醫嘅專業決定,並指自己問對方要剝幾多隻,但對方唔肯答,話一定要全身麻醉咗狗狗,幫佢洗完牙之後先知道。不過,當洗完牙之後,李思雅話獸醫指要剝成 17 隻牙咁多,仲要佢即場決定到底要唔要剝牙,因為依家已經全身麻醉咗,如果之後先再剝,就會又要全身麻醉多次,並指咁樣會令狗狗又要辛苦多一次。

為咗令狗狗可以早日康復,李思雅決定相信獸醫嘅專業意見Photo from 李思雅 Official Instagram

愛狗深切嘅李思雅希望可以盡快幫 Quirky 脫離苦海,即場就決定咗要剝牙。不幸嘅係,李思雅指剝牙之後嘅 Quirky 除咗只係得番四隻牙之外,兩隻眼竟然完全盲咗,失去晒 100% 嘅視力。經過佢多番詢問其他朋友,發現會出現咁樣嘅情況原來係因為一次過剝 17 隻牙對於狗狗嚟講太大負擔,會令佢失血過多,從而體溫太低,令雙眼嘅神經視網膜受損然後致盲。

Quirky 今次真係非常不幸Photo from Quirky 今次真係非常不幸

李思雅話今次嘅事件令佢非常痛心,覺得係自己無知同埋疏忽處理,一心以為係小事就冇再帶愛犬去其他動物醫院睇病。事發之後,李思雅喺網上點名,呼籲網民千祈唔好幫襯,而嗰間醫院亦都喺網上發表聲明,指出雖然的確有為過李思雅嘅愛犬治療,但對方講嘅說話只係局部,而且並唔正確,要求對方撤回全部指控,並且公開作出道歉,否則將會採取法律行動。

李思雅喺自己嘅 Instagram 有關依件事嘅發文Photo from 李思雅 Official Instagram

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel