ERROR保錡千字文宣佈暫別娛樂圈！一文睇疑一腳搭兩船/口出狂言負面新聞時間線

ERROR成員吳保錡早前有一連串負面新聞，形象跌至谷底。有好多網民甚至叫佢退團！風波不斷之下保錡終於正式回應，公開道歉並宣佈暫別娛樂圈：「覺得自己連累咗三位兄弟」

Photo from 吳保錡IG

ERROR成員吳保錡今年1月4日被影到同「性感女神」沙律（張沛樂）拖手，戀情曝光！兩人亦大方承認拍緊拖。

Photo from 吳保錡IG

點知同日正印女友Carrie（賴嘉賢）卻指保錡同佢仍未分手，保錡疑一腳搭兩船！保錡否認偷食，強調係回復單身之後先同沙律拍拖。

Photo from Carrie IG

但Carrie要求保錡公開道歉，如果唔係就會提供證據，1月10日，保錡喺IG出post道歉指自己處理感情問題未夠成熟，無好好咁結束一段關係，傷害到其他人。

Photo from 吳保錡IG

之後Carrie再爆料保錡嘅短訊，但保錡一於懶理，更於10日後刪除道歉文，與女友沙律多次公開放閃。

Photo from 沙律IG

直到2月初，保錡開live嘅片段再引起熱議，原因係佢竟瘋狂爆粗反擊網民話佢似八両金，幾乎每句都夾雜住粗口，對話內容非常難聽。

Photo from 吳保錡IG

對於被指「呃蝦條」，保錡同女友沙律都一人一句咁反駁，而保錡都仲係滿嘴粗口，不堪入耳。

Photo from 沙律IG

網民力數佢偷食不突止，身為公眾人物講嘢句句都有粗口，認為佢品德同個人修養都有問題，叫佢退出ERROR。

Photo from Error IG

風波不斷嘅保錡形象插水，事隔多日佢終於喺IG發千字文正式道歉，並宣佈會暫停所有工作：

「我知道，最近凡有我出現嘅嘢都會令好多人唔開心，ERROR出首歌嘅MV又好、節目又好，就算肥仔Dee哥193做訪問，記者朋友同大家都會追問關於我嘅野。我覺得我影響咗好多人，尤其ERROR同一直鍾意我哋嘅人。反思咗好多晚，雖然我講咗好多次會重新出發，但覺得依然欠大家一個交代。我意識到一方面我之前處理感情嘅事做得唔好，另一方面，當晚直播嘅言行舉止係好唔啱，說話亦無尊重過人。呢啲全部都係我嘅過失，我要面對自己嘅錯，出嚟同大家再次道歉。

之前嘅我睇大家抨擊我嘅comment，第一個反應係會好嬲，但係呢兩日睇到凡係有我嘅嘢，MV、節目、訪問等等嘅留言，反而覺得好內疚，我覺得因為我嘅錯，影響到其他人，製作團隊嘅努力、其他同一個節目嘅藝人、ERROR佢哋三個嘅努力全部都因為我受影響。我嘅錯，應該由我自己一個去承擔。

Photo from Error IG

所以，我已經同公司講，喺完成手頭上已開始嘅工作之後，所有工作將會暫停。我亦唔會參與任何節目及ERROR歌曲嘅宣傳。我認為咁樣係一個對我應有嘅懲罰，希望唔好累到其他兄弟，亦唔好因為我嘅關係而抹煞左所有人嘅心血。

作為ERROR嘅一份子，覺得自己連累咗三位兄弟，破壞咗ERROR嘅形象，好對唔住，諗返呢兩年同三位兄弟嘅經歷，同193拍ERROR遊嘅時候好冇膽，由咩都唔敢，到最後都敢試；Dee哥係ERROR嘅talk show入面捱更抵夜咁幫我地度稿；肥仔一直都好鼓勵我做音樂，主動幫我爭取為ERROR寫歌；而家回憶返過去同三位兄弟一齊做嘢真係好珍貴，嚟緊ERROR嘅團歌，希望大家繼續支持佢哋。

Photo from Error IG

我知道保錡係大家眼中係一個毫無分寸嘅人，但希望下次大家再見到我嘅時候，會見到一個懂得尊重、願意承擔責任嘅人。我希望用行動證明。

再次同大家講多次對唔住。」

雖然保錡表示唔想連累咗三位兄弟，破壞ERROR嘅形象，不過成員Dee就力撐隊友：「Error四為一體」

Photo from Dee IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

ERROR成員保錡不滿被指似八兩金開 Live 爆粗反擊　網民直言希望ViuTV盡快解僱佢

5 Feb 2021

ERROR成員保錡早前被爆與「性感女神」張沛樂（沙律）拍拖並大方認愛後，隨即又被當時嘅「正印女友」Carrie Lai指佢出軌一並有多名女生自爆曾被保錡食過兼拍咗片，雖然事後佢有出道歉聲明，但好快又刪除咗，令人覺得佢全無悔意，使其形像插水，更被指係負心男。

不過潛咗水一排嘅佢，最近又出事喇！早前佢就因我被網民指佢似八両金同偷食一事深感不滿，仲喺 IG  開 Live 爆粗反擊。啲對話難聽到小編都唔識形容，總之每句都夾雜住粗口。

Photo from viutv

而相信同佢一齊開 live 嘅仲有其女友沙律，事關佢哋就好似唱雙簧咁講：「佢哋個幻想世界吓嘛？」，之後她又說︰「咁呢個世界上阿爸阿媽都係呃蝦條。」其語帶輕挑感覺就好似火上加油一樣。

當有網友見佢咁激動並提醒佢「尊重下人」時，佢又再次燥底反擊。

最後佢更突然扮失憶指嗰個嗰係佢本人嚟：「吓，呢個唔係我嚟喎，係保錡細佬嚟㗎！」

不過作為藝人本身言行舉止就特別容易被放大，加上早前嘅形像已插水，更令一眾網民熱烈討論，指佢個人修為有問題，直言希望ViuTV盡快解僱他。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

ERROR成員保錡與「性感女神」沙律拍拖！疑似偷食 正印女友稱無講過分手

4 Jan 2021

ERROR成員吳保錡被爆與「性感女神」沙律（張沛樂）拍拖，沙律大方認愛，保錡亦未有否認戀情，但保錡「正印女友」Carrie Lai就指佢哋仲係情侶關係：「無講過分手」，保錡疑似偷食！

ERROR成員吳保錡被爆同「性感女神」沙律（張沛樂）拍拖，兩人被影到齊齊去大棠睇紅葉約會，更甜蜜拖手。

沙律亦大方認愛，指雖然唔係一齊好耐，但就好夾，保錡亦未有否認戀情。

但戀情曝光無幾耐，就爆出保錡有一位「正印女友」Carrie Lai。

Carrie Lai係一名模特兒，IG嘅相片睇得出佢走日系風格，有指保錡同Carrie拍拖近兩年，佢哋嘅關係喺圈中更係公開嘅秘密。

而Carrie否認係保錡「前度女友」，直指佢哋無講過分手，至今仍然係情侶關係。

但保錡指同Carrie已經交待清楚關係，雙方無聯絡一個月，佢表示自己「回復單身」後同沙律啱啱開始發展無耐，希望外界可以畀空間佢哋發展。

Carrie同沙律都有喺IG Story post嘢，疑似回應事件。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）