胡說八道會、處女黨等6個圈中閨蜜組織　個個都係人氣女星！

成日都聽到人話「知人口面不知心，畀人出賣咗都唔知」，而喺娛圈更係十分常見，事關大家不時都會喺娛樂新聞睇到女星們友情不再、關係破裂等消息，但真係同行如敵國、難有真正可以交心嘅朋友咩？其實又唔一定嘅，大家只要細心留意，就會發現喺圈中都有唔少真係情同姊妹嘅閨蜜團！

1. 胡說八道會

由一班 TVB 花旦組成嘅「胡說八道會」陣容鼎盛，當初只係由三位同姓「胡」嘅胡杏兒、胡定欣、胡蓓蔚組成，後嚟再增加咗黃智雯、李施嬅和姚子羚加入。佢哋 6 人無論幾忙都會抽時間聚會，有咩事都會互相支持，姚子羚更曾笑言「有種友誼叫胡說八道」，就可知佢哋喺圈中嘅友情有幾令人羨慕喇！

2. Amazing Esther

「Amazing Esther」又被稱為「處女黨」，成員包括鍾嘉欣、王君馨、李亞男、苟芸慧及岑麗香，佢哋 5 位中分別有港姐、華姐出身，要再加上佢哋都喺外國返嚟同信仰一樣而組成，現時佢哋都已經「升呢」成為人妻！早前王君馨就喺社交網上hashtag佢哋係「索爆靚太團」添！

3. 少婦聯盟

「少婦聯盟」由龔嘉欣、沈卓盈、陳凱琳同譚凱琪組成，4 人因拍攝電視劇《平安谷之詭谷傳說》而成為好友！喺「聯盟」成立一周年時，佢哋更請嚟攝影師拍攝泳衣照作紀念！

4. M Club

除咗「少婦聯盟」，因為拍劇結緣嘅仲有《女人俱樂部》中飾演「M Club」學生時間啲佢哋，王敏奕、黃山怡（糖妹）、陳嘉寶、賴慰玲、陳瀅、吳嘉熙（Cheronna）和吳燕菁組成嘅「M Club」，佢哋 7 人喺戲裡戲外都係「老友」，雖然有人成為「新一代女神」、有人成為「幸福人妻」各自有唔同嘅發展，但只要有重要事情發生，佢哋都一定會為彼此撐場！

5. SÏXTERS

雖然陳嘉寶、賴慰玲、陳瀅佢哋已經組咗「M Club」，但佢哋喺去年 12 月仲有再組多一個閨蜜團叫「SÏXTERS」，成員就有陳嘉寶、蔡思貝、陳瀅、吳嘉熙（Cheronna）、賴慰玲同何雁詩，6人不時都會聚會，佢哋仲喺團名中大玩食字風格，以Sisters變為「SÏXTERS」，非常有創意！

6. 至八會

當然閨蜜團又點會只係年輕人嘅專利呢！喺「至八會」中個個都係阿姐級嚟，而人數仲係最多嘅一團，成員包括汪明荃、鄭裕玲、毛舜筠、曾華倩、江欣燕、林建明、朱慧珊、鍾慧冰及寇鴻萍等，全部都係圈中資深藝人及名人。正正因為佢哋嘅人數多，而且大家又各有各忙，所以就算有聚會都好難齊腳，如果真係要齊人出現嘅話，可能要 4 年先得兩次。

另外，雖然佢喺會喺聚會中討論演藝界動向八盡天下事同互訴心聲，但佢哋每人都會堅守聚會內容不准外揚嘅宗旨，曾經就有成員因為將對話外洩引起其他人不滿，而被踢出局。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

鄧麗欣/黃宗澤/袁偉豪等 6位昔日曾參選「校花校草」藝人 Bosco 當年個靚仔樣真係冇得輸！

04 Mar 2021

相信《YES!》雜誌對一眾 8、90 後嚟講一啲都唔陌生，當年無論男/女都一定會買嚟睇嘅一本學生追星雜誌。而除咗睇明星之外，最多人期待嘅就係一年一度「《YES!》校花校草選舉」，因為咁就可以一次過睇晒全港各區中學嘅靚仔、靚女。今次就同大家睇吓當年有邊 6 位歌手/藝人參選過喇，其中一位仲成功當選添！

不過其實當年要當選一啲都唔容易，除咗要夠靚仔靚女之外，仲要才藝表演、Catwalk Show、自我介紹、答問環節等等，務求要令大家對你印象深刻，真你係一啲都唔求其㗎。

1. 鄧麗欣 Stephy

要提「Yes!校花校草選舉」就一定要提鄧麗欣（Stephy）， 2000 年參加「Yes!校花校草選舉」嘅佢，當年憑著清純美貌成功奪得冠軍，最後更被金牌經理人「黃栢高」睇中入行組成當年嘅人氣 9 人女團 Cookies，並成為團中的隊長添！

2. 王敏奕
王敏奕14歲時成為了平面模特兒，2008 年時參演《烈日當空》正式入行。直到 2014 年，因無綫劇《女人俱樂部》飾演青年朱莉一角而為人熟識，據知佢都曾參加過「Yes!校花校草選舉」。

3. 江嘉敏

正上緊位嘅 TVB 小花江嘉敏憑住《親親我好媽》人氣急升，但原來佢喺 17 歲都參加過第 15 屆「Yes!校花校草選舉」，當年清純學生妹嘅佢迷倒過唔少少男，可惜佢最後選擇退選，不過佢當時就喺 Facebook 表示自己唔係事件中嘅失敗者反而係最成功嗰個嚟：「雖然我退出咗，但我知道我已經成為了大家心目中嘅甜美校花同校花冠軍!! 所以，我並唔係事件中嘅失敗者!相反的，我係最成功嗰個!!」

4. 林穎彤

最近喺電視劇《陀槍師姐2021》中飾演方小喬嘅林穎彤，14 歲時曾參加過「Yes!校花選舉」，當時仲奪得甜美校花獎及才藝大獎。直至2007年，獲有線電視招攬拍攝劇集先正式出道，現時為 TVB 旗下女藝人。

5. 袁偉豪

早前成為人夫嘅 TVB 小生袁偉豪喺 1997 年時曾參選過「Yes!校花校草選舉」，當年15歲嘅他喺雜誌中嘅佢以三七分界髮型示人，加上依個托腮 pose 同其他參賽者相比下明顯 champ 好多！

佢之前仲喺 IG 上傳依張參選時嘅相，忍唔住留言︰「人哋話女大十八變！男其實咪係一樣」又真係變咗好多喎，係比以前更加 man 呀！

6. 黃宗澤

今年40歲嘅黃宗澤（Bosco）1998 年時曾被朋友「出賣」參選過「Yes!校花校草選舉」，當時佢嘅朋友將佢嘅相寄去《YES!》，睇吓佢當時 17 歲嘅佢同依家一樣都係咁靚仔呀！

唔知大家有冇發現佢哋 6 位除咗都有參加過唔同年嘅「《YES!》校花校草選舉」外，佢哋全部都喺 TVB 拍過劇，而袁偉豪、黃宗澤仲係 TVB 嘅當家小生添！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）