張致恒老婆雯雯IG千字文逐一澄清傳聞　直斥Naomi騷擾其家人：我哋去到絕路

By Celia on 15 Mar 2021

Digital Editor

張致恆（Steven）近年負評不絕，繼被馮鎵瀠（Naomi）喺 Facebook 鬧爆佢欠錢唔還，上月又被爆佢被貼街招追數、電話停用疑似走佬後，佢老婆雯雯近日終於蒲頭，仲喺 IG 上寫上千字文回應事件。

事發至今失聯達17日，Steven 老婆區燕雯（雯雯）終於蒲頭，並喺 IG 發「千」字並點名直斥 Naomi。雯雯一開始感謝對方願意借出 2 萬元畀佢哋應急，並為遲還錢致歉。

之後，雯雯就逐一澄清外間傳聞，指佢哋一家並未有消失「走數」，更自爆為還錢給 Naomi 不惜去財務公司借錢：「我哋去到絕路已經去咗借財務，去還一半錢畀你先，好抱歉我哋冇能力一次過還清 2 萬蚊畀你，我哋亦已經承受緊我哋要承受嘅，畀財務貼街招甚至追上門。但係我依家喺呢度答應你，我一定會用盡我嘅能力兩個月內還埋呢 1 萬蚊畀你。」

並指 Naomi 為追債而騷擾其家人包括媽咪：「我嘅家人係無辜嘅，你要嬲要追我哋還錢可以嚟搵我哋一家四口，但係點解叫我哋還錢嘅時候，要用我屋企人嚟威脅我哋去還錢畀你，點解要講到搵人去騷擾我嘅媽媽拎返屬於你嘅錢。」

此外，又提到有指佢哋生活富貴，住靚屋兼養狗，她就解釋村屋位置偏僻，租金好平，養寵物則是早在結婚拍拖前已開始，故寧願捱窮也不想棄養。至於講到買玩具給兩個兒子，她則指只是親戚送贈，並斥禍不及兒子：「我係爭人錢，但係咁樣係咪代表我唔可以生活唔可以生存？我兩個小朋友咁細，係咪就唔可以有佢哋嘅童年？我爭人錢未有能力還，我承認我係有罪，但係我兩個小朋友佢哋點解有罪？」

最後雯雯亦不忘為張致恆護航：「一個男人衰鹹濕衰貪玩，係咪就要判佢死刑？既然佢依家咁努力去生存，點解唔可以畀啲時間佢慢慢做番好佢照顧兩個小朋友？大家可唔可以高抬貴手，畀我兩個小朋友可以有一個爸爸，我哋一家四口可以生存落去。」文章嘅最後，佢再一次承諾未來會還返晒錢畀所有幫助過佢哋嘅人，絕不會走數。

而事件嘅另一當時人 Naomi 就回應傳媒，否認曾騷擾張致恒家人一事，並揚言：「如果有咁做，你應該去報警。其實借人錢要還係好應該，冇咁大個頭唔好戴咁大頂帽，生活同生存都要靠自己雙手同努力，有手有腳就去搵份工。唔好覺得人哋去追債就係逼你，你唔借錢就唔會有人追你，你本身唔係使大咗，就唔需要問人借錢。如果有個花園嘅村屋、飲支樽裝水、可以喺花園燒嘢食、有工人都唔叫富貴，咁可能對我呢啲屋邨出身嘅女仔嚟講，覺得呢啲生活係好奢侈同富裕，我諗一般打工仔都未必可以屋企有個花園，去養小動物同請到工人。」

並指收咗一半還款後，自己已冇再去追債：「希望張生喺大陸搵到錢嘅時候，第一時間還畀我先，以後再有任何人上門騷擾，就可以避嫌唔關我事，唔好事旦有一個人上門追債又話係我，呢個我覺得好煩。佢哋當初要求我唔好回應，等事件唔好發酵，咁都希望佢哋唔好將呢件事無限 loop，爭人錢係事實，未還晒係事實，佢無論出幾多個post我都係會要求佢還晒所有尾數，都希望佢唔好再用小朋友同寵物去做擋箭牌，認真地去搵份工，真金白銀賺錢去還畀所有債主。」