大學生拎外賣後以倒瀉晒為由Cut單引公憤！無辜店主為車手抱不平親自緝兇

近年唔少人都因為疫情關係叫多咗外賣，而如果係用外賣平台點餐嘅大家，一般喺收到餐點後都會被要求為服務點評。不過早前就有人利用依個漏洞嚟意圖以各種方法食霸王餐，令唔少無辜店主唔止向外賣 App 投訴無門，更嬲到用半年時間搜集證據親自緝兇。

早前位於元朗一間賣花甲粉嘅店主就喺 Facebook 開 live 緝兇。佢喺直播中留言指佢同外賣平台喺大半年前開始合作，但喺半年間，每月平均都會收到 10 幾單退款通知，其中原因大多以「打瀉」或「錯單」為主。而外賣平台則列明只要顧客喺收到外賣後，發現訂單「定單錯誤或商品缺失」等，並能夠提供相片證明，即可獲全部或部份賠償，而賠償嘅費用則會喺車手度扣除。

Photo from 元朗花甲粉/Facebook

因此店主經過多次被通知退款後發現每次收到退款通知均嚟自同一個電話號碼，因此開始搜集證據想找出真兇。而喺店主亦外賣平台方面了解情況後，發現客人所提供嘅「食物倒瀉照」中嘅外賣盒，並非店內所用外賣盒，懷疑對方虛報，但佢多次向平台投訴都無用，就連報警亦不受理。

Photo from 元朗花甲粉/Facebook

而店主喺畀人呃咗咁多次餐後，就開始鎖定疑似食霸王餐嘅係一對情侶嚟，並發現佢哋就住喺店舖對面，又指店鋪一直都有做學生七折優惠，但二人偏要用外賣平台落單，所以更加相信二人係有意食霸王餐。

最後，店主經過半年嘅搜證，終於決定日前喺佢哋其中一次落單時，喺 Facebook 開 live 親自追問事件與二人對質，喺片中二人多次聲稱自己有畀錢，並喺發現鏡頭後一道分開生行，又稱二人只係兄妹嚟。

Photo from 元朗花甲粉/Facebook

不過喺經過媒體多番報導後發現二人都係大學生時，二人最終承認自己食霸王餐，並解釋佢哋係因為年初同朋友嗌外賣時，發現朋友經常訂餐後唔使付款，從而學識咁依個食霸王餐嘅方法，又指喺學校中好多人都係咁做，所以冇諗過事件所帶嚟嘅嚴重性。

Photo from 元朗花甲粉/Facebook

而店主近日再次喺 Facebook 中提及此事，指事件公開後，警方曾親自到店鋪落口供，及涉事嘅大學生就特意找咗議員嚟同佢交涉，要求店主喺「冇人，冇鏡頭，唔放上網嘅情況下嚟親自同我道歉」，可是店主喺同議員嘅言談中認為涉事嘅大學生並冇講出事實嘅全部，所好唔打算接受兩人嘅道歉。

而唔少網民都力撐店主「住對面好心就落街買啦⋯咁近都要叫熊貓好有可疑姐」、「幾十蚊都慳 俾d大志好無?」，亦有車手留言分享自己嘅經驗，直指嗰兩名大學生根本唔知錯「男事主話好多學生都係咁，証明佢仲未知錯。我就日日都會送沙田恒大，都未遇過有學生食霸王餐，試過倒瀉咗佢地都照收。」

Photo from 元朗花甲粉/Facebook

Photo from 元朗花甲粉/Facebook

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）