JER柳應廷@MIRROR自爆曾兩度拒入團！全因花姐依句話改變想法　多花10倍努力衝破跳唱難關

娛樂新聞

By Celia on 17 May 2021

Digital Editor

人氣男團 MIRROR 嘅演唱會上星期雖然已經圓滿結束，但佢哋嘅話題熱度並冇因此而減少，更相反令唔少人想了解佢哋每個人嘅奮鬥史。而近日 MIRROR 嘅其中一位成員 JER（柳應廷）就接受電台訪分享入行 3 年嘅辛酸與感受。

Photo from 梁泰來/IG

2018 年時 JER 參加首季《全民造星》入行，去年更單飛推出咗「物語系列」三部曲（水刑物語、迴光物語及風靈物語），而依個系列更令佢喺去年嘅各個頒獎禮中橫掃新人獎。

Photo from JER/IG

日前佢接受梁泰來嘅電台訪問時就提到，佢最初接觸音樂係喺大專畢業時，佢指當時佢因熱愛唱歌同音樂而選擇同朋友夾 Band 及出 Busking，不過兩年嚟 Busking 生涯幾近零收入，令佢決心搵工並任職娛樂記者，一做便3年。

Photo from JER/IG

後嚟 JER 決定辭職再追夢參加《全民造星》，無奈喺 99 強首回合就被評判全紅燈淘汰，佢憶起當時嘅情景仍日感到劇烈衝擊：「當日唱歌未想過要有表情管理，之前一直 busking 沒想太多，到比賽每一個評判一按紅燈，我都會緊張眨一次眼，到最後歇斯底里地唱，是想盡力挽回評判嘅心，但都不成功。那對我打擊很大，因為嗰次係人生第一次跳出舒適圈追夢，點知第一步就要走，好唔甘心。」

幸好之後 JER 收到花姐邀請佢參加復活賽，可惜仍喺 20 強落敗。

Photo from JER/IG

之後到花姐決定組成男團 MIRROR 並邀找 JER 加入，最終花姐要「三顧草蘆」先成功。而 JER 就解釋指自己當時婉拒係因為自覺唔擅跳舞：「推咗 2 次，連花姐也說：『你唔好咁急推住，考慮吓先！』這全因為我擔心自己唔擅長跳舞，我嘅強項係唱歌，冇幻想過跳唱組合或 MIRROR 會點發展。到第 3 次，花姐再說：『你看看近年香港唱得好嘅新人有幾多人真係出到嚟？』」令佢最終改變想法答應加入。

Photo from 花姐/IG

而喺之後嘅 3 年佢花上比隊友多 10 倍嘅功夫及努力衝破跳唱難關：「我每次排新歌舞都會叫救命，譬如 Anson Lo 佢哋一個鐘就記好整首歌嘅舞蹈，我就要花足一星期，幾乎每次排舞都會聽到我嘅叫聲。（Lokman幫你最多，定係 Anson Lo？）所有人都會幫我教我舞步，我回家後亦要不斷練。」

Photo from JER/IG

之後佢喺又提到去年佢喺拎叱咤生力軍金獎時喺台上發表感言時，被指間接踢爆兄弟「黑面」一事而解話：「我跟 AK（江爗生）係同年，都是由細到大睇叱咤兼好重視這頒獎禮。3 個人只兩個有獎，我好感受到 AK 唔開心。其實當時我喺台上嘅說話係好即興，但畀人感覺似幸災樂禍，我講嘢唔叻、用詞亦不當要改善，事後亦有同 AK 傾點樣一起加油。」

Photo from AK/IG

更指經歷叱咤一事後，Jer 指 AK 一度創傷大至考慮暫停單飛派歌：「他今年出新歌《黑之呼吸》都要衝破好大嘅心理關口，我知道 AK 本身諗過唔再出Solo 歌。因為上年嘅創傷對佢真係好大，作為兄弟見到佢踏出呢步，大家都好支持。」

Photo from AK/IG

最後梁泰來更好奇問喺 MIRROR 12 成員中個知都係人才，尤以姜濤最受關注會唔會羨慕時，JER 就坦言一定有羨慕，但亦同時會以姜濤嘅成功作為榜樣鞭策自己。不過作亦慶幸自己唔似對方有偶像包袱：「我開心自己冇咩『偶包』，我出道已宣布有女朋友，依件事姜濤一定做唔到，佢依家連出街都難啦。我公開咗有伴侶，反而係好很舒服嘅事，我哋可以光明正大行街。雖然有人認得你想影相都會令伴侶尷尬，咁就搵啲唔太多人嘅地方出街。銅鑼灣、旺角就難啲去，唯有去山頂公園或帶狗狗去海灘散步！」