【東京奧運】曾志偉希望派藝人親身到日本採訪　仍然計劃中：睇邊個打咗疫苗

東京奧運會將至，昨日TVB就舉行咗記者會透露電視台嘅播出安排，唔少藝人同高層都有出席助陣。而曾志偉喺接受訪問嘅時候，仲表示自己有意派藝人遠赴東京採訪！

Photo from 《東張西望》

奧運會每四年先舉辦一次，唔少國家都非常重視呢個國際盛事！琴日，TVB就舉行咗2021東京奧運記者會，唔少電視台高層同藝人都現身支持，據悉，東京奧運進行期間，TVB將會有5條頻道可以提供500小時直播節目同埋賽事精華，仲增設OTT平台做全天候嘅24小時轉播。

Photo from TVB娛樂新聞台

Photo from 《東張西望》

高層曾志偉就話由於奧運轉播時間嚟得比較急，所以喺安排節目上面都要重新諗過，不過就話因為佢哋有經驗，所以好快就配合到。佢亦有諗過喺奧運會倒數15日前舉辦「明星運動會」，並且邀請藝人、歌手同名人出席。

Photo from 《東張西望》

當被記者問到會唔會安排藝人去當地採訪時，佢就話「暫時仲諮詢緊，要睇下邊啲藝人打咗疫苗」，認為要因應疫情嘅情況再做調整，亦要睇大會嘅安排先知道。

Photo from TVB娛樂新聞台

同場出席嘅藝人就有方力申、姚子羚、鄺潔楹、吳業坤等人，而運動員出身嘅方力申過往2004年雅典奧運同2008北京奧運都被派去當地採訪，話自己非常期待可以參與今年嘅奧運盛事，仲自爆自己為咗爭取機會可以飛去日本，不惜推咗薪酬6位數嘅內地工作！

Photo from TVB娛樂新聞台

原來TVB有唔少嘅藝人都有學過唔同運動，其中「曾志偉愛將」波波（黃凱儀）就透露自己中學時期有學過兩年嘅花式溜冰，所以特別留意呢類賽事，可惜花式溜冰只會喺冬季奧運出現！

Photo from 波波IG

而何泳芍（Honey）就本身係一位潛水教練，所以佢就話自己睇賽事都係鍾意睇游水，仲話佢偶像係菲比斯（Michael Phelps）！當被記者問到有冇睇「香港飛魚」方力申時，佢就話好佩服對方渡海泳時嘅毅力啊～

Photo from 何泳芍IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）