Anson Lo陳葦璇似雙胞胎？張曦雯似Do姐？盤點13對娛樂圈撞樣藝人

娛樂圈成日有藝人被指撞樣，更有藝人曾被粉絲認錯，鬧出笑話，例如：許志安被誤認成杜德偉；亦有藝人因撞樣慘受爭議事件牽連，例如：蔡一智與黃心穎被指似「失散兄妹」，令男方因「安心事件」收大批惡評。近年有唔少新晉藝人彈起，佢哋都被指與其他明星似樣！以下呢13對撞樣明星真係睇到人返唔到轉頭！

#AL群組【Anson Lo、陳葦璇/余宜發/馮素波/何依婷】

Photo from Anson Lo FB

男團MIRROR成員Anson Lo（盧瀚霆）今年人氣高企，討論話題除咗同佢嘅舞台魅力有關外，網上一直有唔少帖文討論佢同邊啲藝人似樣。經綜合後，竟然發現Anson與多達4人撞樣！繼而令「#AL群組」誕生。群組當中更有男有女，所以話Anson嘅可塑性真係相當高！

 1. Anson Lo、陳葦璇

教主被網民指同已解散女團As One成員，兼《全民造星III》亞軍陳葦璇似樣，尤其葦璇呢家以型格齊陰短髮示人，令兩人被指係孖生兄妹！而葦璇本人都覺得自己同教主外貌頗為相似。另外，亦有人指出，兩人都係跳得唱得之人，所以更加難分辨佢哋~

Photo from 陳葦璇 IG, Anson Lo IG

Photo from 連登截圖

2. Anson Lo、余宜發

另有網民表示，Anson令佢諗起一位資深電台DJ，佢就係余宜發！兩人好似大纜都扯唔埋，但眼睛、輪廓比例同笑容氣質竟出奇地相像！對於兩人貌似「失散父子」，一眾網民大呼神奇，又希望見到Anson被余宜發訪問嘅畫面。

Photo from 連登截圖

3. Anson Lo、馮素波

嚟到群組第三位藝人，竟然有網民覺得教主貌似資深女演員馮素波！部分網友認為兩人五官有啲似，但亦有人對呢pair撞樣藝人表示不解。其實佢哋兩個似唔似真係見仁見智，所以真係唔可以睇少網民豐富嘅聯想力。

Photo from 連登截圖，Anson Lo IG

4. Anson Lo、何依婷

進入AL群最後一組藝人，有網民發覺同教主撞樣嘅藝人居然係女多過男！有網友認為Anson同新一代TVB小花兼宅男女神何依婷似樣，但反對聲音都頗多，因為佢哋除咗笑容一樣燦爛外，五官輪廓等外貌特徵都唔太相似。

Photo from 連登截圖，Anson Lo IG

#Frankie、朱晨麗

Frankie（陳瑞輝）除咗係MIRROR嘅顏值擔當，亦被稱為「喊得最靚成員」。顧名思義，佢擁有一雙水汪汪大眼睛，可能因為咁，有網民指佢同無線藝人朱晨麗似樣，而且二人五官都相當精緻。但亦有人覺得兩人嘅共同特徵只限於大眼，氣質完全不同。

Photo from 朱晨麗、Frankie FB

#姜濤、G.E.M.

早前姜濤同女歌手G.E.M.（鄧紫棋）被指外貌神似如同失散姊弟，有網民認為兩人嘅大眼、高鼻同尖下巴相似，又表示觀看二人相片時，覺得佢哋擺甫士嘅神韻都有幾分似！姜B同G.E.M.都係歌手，有網友希望將來可以見到「兩姊弟」上台合唱~

Photo from Presslogic

#姜濤、中尾芽衣子

姜B五官相當精緻，令到部分網民覺得佢同日本女優中尾芽衣子撞樣，大批男網友更因此崩潰，直言返唔到轉頭，大呻：「連睇『愛情動作片』都逃唔出姜B魔掌！」但亦有人因此對中尾芽衣子作品更感興趣。無論似唔似都好，睇嚟姜B旺到可帶挈埋東洋女優打入香港市場~

#張智霖、張振朗

張智霖同張振朗輪廓及五官的確幾相似，所以張振朗曾經喺TVB綜藝節目《Sunday扮嘢王》穿起飛機師制服上台，一邊唱歌、一邊向《衝上雲宵2》中嘅張智霖cool 魔致敬。佢哋唔單止外貌似，連把聲都似！所以，大批網民表示，如果佢哋一齊拍劇會傻傻分不清二人角色。

Photo from TVB USA

Photo from 張振朗（左）、張智霖（右）(TVB USA)

#衛蘭、盧宛茵

歌手衛蘭經常被指同甘草演員盧宛茵撞樣。早前，盧宛茵更被安排於TVB綜藝節目《開心大綜藝》中扮演惡搞版衛蘭「米蘭」，橋段被指老土。

Photo from 衛蘭論壇 FB（左），TVB （右）

Photo from 盧宛茵 《開心大綜藝》TVB USA

有網民指出，其實衛蘭更似年輕時嘅盧宛茵，所以認為《開心大綜藝》中主持嘉賓對「米蘭」外表上嘅描述有欠對衛蘭尊重。

Photo from 香港討論區

Photo from 《浪族闊少爺》TVB

Photo from 衛蘭論壇 FB

Photo from 衛蘭論壇 FB

#蔡思貝、達哥

早年，蔡思貝被指同網絡紅人達哥（林慧韡）撞樣，因為兩人膚色較深，而且圓眼睛及厚嘴唇都有相似度，更令蔡思貝獲得「蔡思達」嘅稱號。有指蔡思貝曾經唔鐘意人咁叫佢，但後期好似睇化咗。

Photo from 達哥 FB

Photo from 蔡思貝 FB

#糖妹、陳慧嫻

糖妹（黃山怡）曾被指同陳慧嫻撞樣，更被封為「翻版陳慧嫻」，連陳慧嫻本人都同意！糖妹亦曾翻唱陳慧嫻歌曲《跳舞街》、《傻女》 ，更有網民表示以為係陳慧嫻唱緊！六年前，糖妹於個人社交平台上載其個人演唱會宣傳海報時，陳慧嫻亦有留言支持，更直言糖妹有佢後生時嘅影子，唔少網友都同意，覺得糖妹就好似十年前嘅陳慧嫻~

Photo from 陳慧嫻 FB、糖妹 （連登截圖）

#黃心穎、蔡一智

有人認為黃心穎與蔡一智係失散兄妹，甚至只係妝前同妝後嘅分別。兩人亦不介意此配對，並多次合照，佢哋仲曾經喺社交平台互相留言，開玩笑以「兄妹」相稱！蔡一智亦曾經收過由好友蘇施黃送上寫有「Happy Birthday 黃心穎」 嘅搞笑生日蛋糕~ 遇上「安心事件」後，蔡一智更慘受牽連，大批網民衝入其社交平台留下惡評，認真無辜！

Photo from 蔡一智 微博

Photo from 連登截圖

#張曦雯、鄭裕玲

總有唔少網民一見到張曦雯新聞就會留言「個樣好似Do姐（鄭裕玲）！」，部分網友表示兩人都擁有瘦長臉型、高鼻子，甚至連笑容都似！有人則認為要視乎拍照角度，並指二人撞樣程度比較飄忽。

Photo from 張曦雯 IG、鄭裕玲 IG

Photo from 鄭裕玲 IG

Photo from 張曦雯 IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）