謝天華內地酒吧登台大開金口！ 享受「天王巨星」級待遇 十幾名保安護送離場

謝天華憑住飾演「Laughing 哥」一角而一炮而紅，亦好受內地網民嘅歡迎！最近，佢就喺內地一間酒吧登台表演唱歌，現場有好多支持佢嘅粉絲，需要十幾名保安護送佢先可以安全離開！

Photo from 謝天華微博

現時53歲嘅謝天華入行三十幾年，初出道嘅時候曾經做過dancer，為唔少巨星伴舞。喺1990年代，開始有份出演多部電影，成為演員。喺2011年憑著電視劇《潛行狙擊》「梁笑棠」（Laughing 哥）呢個角色而爆紅，人氣急升，仲令佢有機會拍攝續集電影《Laughing Gor之潛罪犯》！

Photo from 謝天華微博

Photo from 《潛行狙擊》

呢幾年，謝天華就將自己嘅事業重心放喺內地。日前，佢就獲邀去廣州一間酒吧做表演嘉賓，主持人仲以「天王巨星」稱呼佢，非常有架勢！當晚，佢獻唱咗兩首歌曲，分別係《潛行狙擊》嘅主題曲《獨行》同《愛的初體驗》，現場嘅粉絲都好落力咁為佢歡呼～

Photo from 抖音

Photo from 抖音

除咗唱歌之外，謝天華仲好親民咁向粉絲大派福利，一邊唱歌一邊派自己嘅親筆簽名照，又近距離同粉絲握手活動，令現場嘅氣氛好高漲，難怪粉絲們咁鍾意佢啦！

Photo from 抖音

Photo from 抖音

喺謝天華表演完畢之後，唔少熱情嘅粉絲都忍唔住衝上前想同佢合照，場面一度變得混亂。好彩，大會本身已經安排咗「天王」級嘅待遇俾佢，有十幾名保安喺佢身邊護送佢離開，可見佢喺內地嘅人氣真係好高㗎！

Photo from 抖音

其實都有唔少藝人返內地登台表演嘅時候，能夠享受「天王」級嘅待遇㗎！喺今年4月嘅時候，藝人梁競徽就喺惠州嘅酒吧登台表演，當時佢入場就已經喺多名保安護送下進入會場，雖然佢當日不停走音，但仍然有唔少粉絲支持佢！

Photo from 抖音

Photo from 抖音

而梁競徽當日亦非常興奮，仲好親民咁邀請咗台下嘅一位男觀眾一齊大跳貼身舞，現場嘅氣氛十分熱鬧！

Photo from 抖音

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）