張智霖聲稱將於5年內隱退！ 愛收藏名畫 投資有道收藏品價值過億元

張智霖係唔少人都十分熟悉嘅男演員兼歌手，拍攝過唔少作品。近日，佢喺接受媒體訪問嘅時候，就表示自己有收集名畫嘅習慣，仲話佢所收藏嘅畫作都已經升值不少。佢亦透露將於5年內退出幕前工作，表示如果冇受疫情影響應該已經舉辦咗「告別演唱會」！

Photo from 張智霖FB

現時49歲嘅張智霖自1991年出道至今，拍攝過唔少電影同電視劇，其中以電視劇《十月初五的月光》「初哥哥」一角令大眾熟悉！佢喺2001年同袁詠儀結婚，並於2006年誕下兒子張慕童（魔童），兩夫婦結婚多年依然甜蜜，經常公開放閃，羨煞旁人～

Photo from 《十月初五的月光》

Photo from 張智霖FB

最近，張智霖喺接受媒體訪問嘅時候，就自己一直都有收集名畫嘅習慣，平時都會去畫展參觀睇畫。起初喺受朋友影響，但隨住對畫作嘅了解更加深入，佢就開始利用買名畫做投資，暫時都係有錢賺嘅！

Photo from 張智霖FB

佢就表示自己最鍾意嘅畫家係日本嘅草間彌生，屋企最多佢嘅作品，經常都會去佢嘅展覽，但未見過佢本人，只係認識佢經理人。而佢就曾經花大約港幣五百萬買經典「南瓜畫」，到而家單單係呢幅畫就已經升值到幾千萬！如果再計埋佢一直以嚟收藏嘅畫作，分分鐘價值成億咁多！

Photo from 袁詠儀IG

Photo from 張智霖微博

張智霖亦透露自己未來嘅工作打算，佢話將要開始拍攝內地嘅型男綜藝節目，為期幾個月，所以一家三口正準備搬去內地居住一段時間。不過，佢就自爆應該係最後一次拍攝呢類型嘅節目，因為自己今年即將踏入50歲，認為自己嘅體力已經開始唔得！

Photo from 張智霖微博

佢直言自己打算5年內退出幕前工作，仲話可能會從事幕後嘅工作，例如：開製作公司、投資項目等，希望可以將喺娛樂圈所學嘅運用返出嚟。佢就話如果冇受疫情影響，可能已經開咗「告別演唱會」～

Photo from 張智霖FB

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）