京都絕美「水晶系甜品」果凍晶瑩剔透視覺滿分！

By Cheryl on 01 Jun 2021

Digital Editor

唔少人都鐘意購買天然水晶首飾，但除咗戴上身體，有無諗過仲可以「食」落肚？日本京都一間人氣Cafe「ウサギノネドコ」（usaginonedoko_kyoto）以「水晶」甜品聞名，其中造型搶眼嘅「水晶百匯」更係招牌菜。其實甜品上嘅「水晶」由果凍混上天然色素製成，陽光照射下仲會變色！

Photo from Pinterest

喺日本，有一間叫「ウサギノネドコ」嘅咖啡廳，店家希望透過作品反映大自然嘅美。佢有唔少以天然石為主題嘅甜品，吸引唔少人到場品嘗之餘打卡留念。當中最吸引人嘅必定係「水晶百匯」，佢有多款口味，例如奇異果、藍莓、菠蘿。

Photo from @usaginonedoko_kyoto IG

「水晶百匯」係一道水果芭菲，將消暑嘅芭菲、果醬與不同水果結合，再以特色和菓子、椰果等作配搭，味道富有層次，酸甜開胃，喺炎炎夏日食返個就最適合。

Photo from @usaginonedoko_kyoto IG

甜品嘅焦點當然落喺面頭嘅水晶果凍。果凍混合可食用天然色素，調配出晶瑩剔透嘅色澤。就好似「藍莓味水晶百匯」，果凍嘅藍色嚟自螺旋藻（藻類一種），可以放心食用。而且，店家表示，由於螺旋藻具有發出紅光嘅特性，所以原本嘅藍色被光照射下會變為紅色，形成超炫變色效果。店家仲貼心向顧客提醒，顏色會因應座位方向而有不同，大家可以透過手機鏡頭，或將「水晶百匯」放置於自然光下欣賞變色。