「死亡行星」成2021玩新郎最受歡迎遊戲　網民：之後生育有問題後果自負！Mike導曾呼籲咪亂試

早前由 ERROR 同 ViuTV 幕後團隊「無制限OT編集團」合作嘅節目《ERROR自肥企画》成功帶起唔少話題，令佢哋人氣暴升，而有「格仔導演」之稱嘅Mike導（劉諾衡）更獲粉絲開設應援會，IG 追蹤人數爆升至 12 萬，就連帶節目嘅「死亡行星」亦深受大家喜愛。近日更有新人喺新郎遊戲加入依個「恐怖大懲罰」，完全唔理幕後團隊嘅勸戒，被一眾觀眾怒轟。

Photo from ViuTV

雖然 15 集節目就已經播完，但仍有唔少人討論，更有網民要求製作組公開「死亡行星」製作方法，但 Mike 導就一再表示：「死亡行星係一件非常危險嘅道具，記住千祈唔好模仿。」

Photo from ViuTV

但估唔到近日有網民就上載一段轉自 IG Story 嘅影片，片中見有人以節目中嘅大懲罰「死亡行星」作為玩新郎嘅遊戲之一。當時影手執「死亡行星」嘅新娘仲大聲話：「我用死亡行星彈你，你都唔會嬲嘅，因為我係你老婆！」十足喺第 2 集節目中阿 Dee 對保錡執行「恐怖大懲罰」時講嘅「我知我就算用依個死亡行星彈你，你都唔會嬲嘅，因為我肯定，你係我朋友！」

Photo from ViuTV

鏡頭一轉，被「死亡行星」直擊腹部嘅新郎就倒臥地上，仲需要兄弟團撐扶先企到起身。而轉發影片嘅網民就指，死亡行星成為咗 2021 年玩新郎嘅熱門招式。

不過此舉就引嚟唔少粉絲感到不滿，直斥玩「死亡行星」嘅一對新人，有機會連累到以「格仔導演」Mike 為首嘅幕後團隊「無制限OT編集団」，認為佢哋自行研發並使用「死亡行星」非常危險。同時指，此舉有機會連累到曾經勸告觀眾切勿模仿的「無制限OT編集團」：「其實有公開呼籲過唔好玩死亡行星，但總有人唔聽，藝人為咗節目效果先要冒險，一般人就唔好搞呢啲危險野啦。」

Photo from ViuTV

更有有網民提到團隊曾於《ERROR自肥企画》第11集「BTS」中，已特地花費時間講解「死亡行星」嘅研發過程以作提醒：「人哋專登拍咗15分鐘放上咗電視叫你哋呢類智障唔好學唔好試做！點解呀？因為你哋岀咗事係會直接連累成個制作團隊同ViuTV呀！會有法律責任上身呀！」、「其實真係唔好笑，嗰次ViuTV直播，成班後製都叫大家唔好整死亡行星，因為真係好危險。後製話如果有人整咗嘅話，唔會讚嗰個人，反而會轉發罵嗰個人。」

Photo from Mike導/IG

而導演 Mike 亦有喺社交網出 Post 提醒：「『死亡行星』係經過長時間研究同埋測試製造出嚟嘅器具，製作嘅材料亦都通過嚴謹嘅挑選，確保此產品可以喺快樂同痛苦當中得到完美嘅平衡，所以……唔識整，咪亂整！」

Photo from Fatboy/IG

其實依個「恐怖大懲罰」真係有一定危險，大家真係唔好亂試呀！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）