日麵包師公開『滑蛋三文治』食譜+秘訣  3分鐘用微波爐神還原日本味道!

日麵包師公開『滑蛋三文治』食譜+秘訣 3分鐘用微波爐神還原日本味道!

生活熱話 生活教學
By Stephanie on 04 Jun 2021
Digital Content Writer

大家呢一陣子都冇得去旅行,相信大家一定好掛住外地嘅美食!最近,有日本節目就教大家整經常都可以喺便利店買到嘅雞蛋沙律三文治,原來做法非常簡單,只需3分鐘就可以完成!大家都不妨可以喺屋企試整下~

PinterestPhoto from Pinterest

蛋沙律三文治喺唔少人去日本必定會食嘅早餐,相信大家應該都好懷念去旅行嘅時光~最近,日本有位麵包師就公開咗呢種三文治嘅做法,仲傳授咗一種可以輕易咁整出滑蛋嘅方式,等大家喺屋企都可以神還原喺日本食到嘅味道!

PinterestPhoto from Pinteres

材料:方包1片+雞蛋2隻+沙律醬2匙+少量牛油+少量鹽

首先,將2隻雞蛋發開至蛋漿,之後就將佢放入微波爐用600W叮50秒。叮完之後,蛋漿有一部分已經變成固體,將佢哋壓碎再同其他蛋漿攪拌埋一齊。然後,將蛋再一次放入微波爐叮20秒。取出蛋之後,就可以加兩匙嘅沙律醬同少量鹽(視乎個人口味)作調味。攪拌均勻後,三文治嘅半熟蛋內餡就已經完成喇!

日本節目Photo from 日本節目

日本節目Photo from 日本節目

麵包方面,將方包對角咁切開一半,然後再輕輕咁喺麵包嘅中間切開少少,記住千祈唔好切到底!喺切開嘅麵包裡面塗上牛油,令三文治嘅香味更加突出,再將蛋沙律放入麵包嘅中間就大功告成喇~

日本節目Photo from 日本節目

日本節目Photo from 日本節目

日本麵包師仲傳授咗幾個小秘訣,等大家可以輕易咁喺屋企整到。首先,發蛋嘅時候唔好發得太均勻,咁樣先可以達成滑蛋嘅效果。其次,用微波爐整滑蛋最好跟足食譜嘅指示,喺1分20秒內完成,並且分開兩次製作,令成功率增加。

日本節目Photo from 日本節目

製造三文治嘅時候,建議用麵包刀切,咁樣可以令麵包冇咁容易變形。如果屋企冇麵包刀,就可以嘗試喺切之前,用熱水先浸一浸把刀。咁樣就可以令切麵包時嘅邊邊位置變得更加完整,令外觀上睇落更漂亮!

PinterestPhoto from Pinterest

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mailholiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel