男友畢業4年無正職模擬學炒股！唔肯搵工港女感崩潰！網友：無本點炒

畢業之後搵一份好工可能係唔少應屆畢業生嘅夢想，不過亦有人唔甘於搵幾萬蚊過生活。近日一位網民就喺網上討論區開post指男友畢業4年仍唔搵full time，一直跟朋友學炒股，令佢大感無奈！

網友喺連登討論區發帖：「同男朋友一齊咗四年。。。。」，指自己20歲已經同男友一齊，但幾年前佢哋畢業後男友一直都無搵過工。

樓主指男友唔搵工係有原因：「因為佢有個有錢朋友同佢一齊創業同教佢炒股票」，不過由於疫情關係，創業計劃需暫時擱置。

無得創業住，男友就全力集中於學炒股，而4年以嚟，男友亦曾做過part time，打工賺錢養活自己，但「份份都唔係做得長」，樓主呻：「（男友）而家就成日係屋企學完炒股票就係到打機睇戲」，佢指雖然男友都有繼續搵part time，不過近呢幾個月就稱搵唔到。

樓主曾建議男友做住full time先，等疫情過後再辭職去創業，但男友就表示朋友建議佢搵住part time先，唔好做全職住，因為如果有正職就好難夾到時間教佢炒股。

樓主大感無奈，問男友：「其實都幾年時間，你一直都冇進展過其實你想點？」，男友指人生仲有咁長日子依家要拼搏下先：「佢話佢唔想一世都就係揾幾萬蚊生活。」，令樓主非常崩潰：「大佬呀！你依家屋企又唔係特別有錢，雖然你屋企唔洗等你養姐，咁你自己都要食要洗㗎！」

樓主表示有時同男友約會都會請佢食飯，對方唔夠錢時都會畀錢佢，不過每一次問男友打算以後點生活，對方都話「唔想靠幾蚊萬人工過世」，令樓主相當迷惘：「我依家都唔知點算，完全對佢末來都係未知。」

而最大問題係樓主男友雖然對股票知識都增長咗唔少，但所謂「學炒股」其實一直都用緊模擬倉。

網友就指：「唔打工儲個本，本都無，學識炒股有咩用」、「冇本點炒」、「本呢?當自己二世祖幾億未開頭?」、「投資最大嘅本錢唔係錢, 係時間呀! 一直模擬倉跟本係浪費時間」，力勸樓主早日同男友分手。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）