港男愛Staycation晒13張酒店房卡惹公憤！網民怒斥：同小偷晒戰利品有咩分別

近年香港人因為疫情關係都無得去旅行，所以掀起咗一股 Staycation 熱潮，等大家可以喺放假嘅時候暫時住吓酒店當自己去咗旅行～而近日有網民就因喺社交網晒出 13 張酒店房卡引起公憤！

Photo from TVB

港人近年冇得去旅行，所以為咗可以畀自己放吓假 relax 吓，都會選擇嚟一場「偽旅行」，而依股本地 Staycation 熱潮，更令唔少人好似上咗癮咁，密密去酒店住！

Photo from 《今晚瞓酒店》

而有網民近日就喺 Facebook 群組「香港 Staycation 酒店交流谷」中大晒 13 張酒店房卡，並留言：「小弟住完酒店的房卡」，之後又 hashtag 指「唔夠各位師兄多」。

Photo from 香港 Staycation 酒店交流谷/FB

但依個 post 就引嚟唔少網民怒斥，事關住過酒店嘅人都知，酒店嘅房卡除咗係你嘅酒店房門匙之外，大部份酒店更會將門卡用作開啟客房電源之用。

因此，唔少網民認為佢依個晒命行為，唔單止博取唔到他人嘅羨慕眼光，反而惹嚟網民批評指其行為如小偷無異：「唔知以為自己好有型，實質上不知所謂」、「簡單啲嚟講，小偷post戰利品上網」、「其實攞嚟做咩？你有冇諗過酒店，每人攞一張，佢哋會冇房卡用，咩心態！好威威？」

Photo from 香港 Staycation 酒店交流谷/FB

另外亦有網民揶揄指「下次儲廁所板」、「可能仲有好多刀叉匙羹相未放上嚟」。

Photo from 《今晚瞓酒店》

不過有網友就指依家已經唔同晒，好多香港嘅酒店如親子/主題酒店都會請住客保留房卡，仲講到明可以唔使還或者畀一張新嘅大家拎走。

Photo from Carousell

其實到底酒店房卡可唔可以拎走，係要視乎每間酒店而定，部分酒店會講明退房時必須退回房卡，如果真係好想保留以作留念就需要收錢，而有些酒店就唔會理會，可以拎走房卡，所以如果大家真係想保留以作紀念不妨喺退房時問吓酒店呀！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）