內地大學生K房慶生擲蛋糕 場面混亂　仲有呢5個行為都好令人討厭...

而家唔少年輕人都會選擇包party room幫朋友慶生或者聚會，等大家可以玩得盡興～日前，內地有一班年輕人就包K房同朋友慶祝生日，但就被拍攝到佢哋因為互擲蛋糕，導致成間房一片狼藉，唔少網民睇完之後都認為佢哋無品！

Photo from TVB

最近，內地就瘋傳緊一段生日影片，一班年輕人喺重慶嘅卡拉OK房慶祝生日。據悉，片中嘅所有人都係大學生，為咗盡興咁慶祝朋友生日，佢哋一共買咗6個蛋糕。喺慶祝期間，佢哋就開始玩互擲蛋糕，搞到成間房都係忌廉，地板、座椅、牆壁上同地氈每個地方都有佢哋玩完嘅「痕跡」，場面十分混亂！

Photo from 微博

Photo from 微博

由影片中所見，桌上嘅蛋糕架已經冇曬蛋糕，而房間嘅地氈仲被大量嘅忌廉遮蓋咗原本嘅圖案！卡拉OK嘅負責人就好無奈咁望住房間內嘅情況，然而呢班年輕人依然沈浸喺派對嘅氣氛當中。期間，有人想離開房間，不過由於佢全身都係忌廉，只能夠坐喺地下滑出走廊，但就搞到走廊地板都佈滿忌廉......

Photo from 微博

Photo from 微博

唔少網民睇完影片都怒斥呢班年輕人浪費食物，亦有人指忌廉難以徹底清洗，覺得店家絕對可以向佢哋收取清潔費用；不過有網民就表示「自己每次生日都會咁玩，之後會支付返清潔費」，認為咁嘅行為並冇錯。

Photo from 微博

Photo from 微博

其實呢類型嘅「無品」行為都經常出現㗎，而家就等我哋一齊睇下網民曾經做過邊啲討人厭嘅行為啦！

睇電影時不停踢前面張櫈

相信呢件事係唔少人都曾經遭遇過嘅事情，有網民就曾經喺連登討論區訴苦表示自己睇電影時，被坐後面嘅人不停踢櫈。經佢一番提醒之後，對方竟然回覆佢話「比得$40蚊睇戲仲想點！」，最後要對方女友勸喻先能夠安靜睇戲。

Photo from 連登討論區

搭車時遇到「霸道」嘅人

有網民就表示最討厭有人喺車廂多人嘅時候，獨佔扶手，有人甚至會將扶手當成依靠，搞到全部人都冇得握扶手！有網民仲大呻自己本身隻手已經握住扶手，但都依舊會有人照「挨」扶手，連壓到人哋都唔知！而搭巴士嘅時候，就有人會將腳放上座椅或者一人霸佔多個位置。

Photo from TVB

排隊時打尖

香港人多擠迫，排隊已經融入咗大家嘅生活入面，但依然有好多人貪圖方便而選擇打尖。最常見嘅就係大家等車嘅時候，有網民就表示最討厭嘅係有啲人仲要好無禮貌咁推人或者撞人去搶先上車！

Photo from TVB

破壞大自然

最近唔少人都會選擇同朋友行山，吸收大自然氣息，但亦因為咁而令到唔少戶外嘅地方比以前多咗好多垃圾，因為有部分人將自己嘅隨身垃圾隨地丟棄，其中好多都係口罩！除此之外，有網民就指曾見過有人為咗影靚嘅打卡相，而不惜爬樹影相，導致樹枝被強行截斷。

Photo from TVB

隨地擺放唔要嘅商品/偷食貨架食物

其中一個比較出名嘅例子就係美國連鎖超市Costco於內地上海分店開幕嘅時候，吸引咗唔少客人去朝聖。然而，有內地網民就揭發當時裡面嘅混亂情況，網民表示有客人將自己唔要嘅商品周圍亂放，包括將需要冷藏嘅凍肉放喺地下等，仲有人偷食半盒壽司之後放回貨架上！

Photo from 微博

Photo from 微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）