袁偉豪嫌拍檔黃智雯腳頭唔好自爆近兩年無咩收入網民：咁樣供得起豪宅？！

By Cheryl on 21 Jun 2021

Digital Editor

男藝人袁偉豪日前同黃智雯等一班《刑偵日記》演員於TVB節目《開心大綜藝》亮相，接受林盛斌（Bob）及江美儀嘅《Mean Talk》問答環節。被問到最唔想再同劇中邊位藝人合作時，袁偉豪直言係黃智雯（Mandy），佢解釋自從同Mandy合作後，近兩年無嘢做。雖然佢咁講疑似係講笑，但有網民諗起佢早前堅稱自己有供樓言論，都好奇佢點樣供得起豪宅。

Photo from 袁偉豪 FB

日前，袁偉豪同黎諾懿、王浩信、黃智雯、菊梓喬、戴祖儀一班《刑偵日記》演員現身《開心大綜藝》，佢哋即席回答主持江美儀、林盛斌問嘅大膽問題。

Photo from 《開心大綜藝》TVB

輪到袁偉豪時，佢被問及：「劇中邊位你係最唔想再合作？」。佢未開口，黎諾懿就搶先回答：「黃智雯！」，袁偉豪表示黎諾懿估中，遂解釋原因：「黃智雯唔乞人憎，佢啲戲好好，對朋友、同事好好，佢對我都ok，同佢合作亦不錯。不過，早兩年同佢攞完雙料視帝視后之後，嘩！唔得，呢兩年好差，無嘢做。」

Photo from 《開心大綜藝》TVB

江美儀聽罷即問：「即係佢（黃智雯）腳頭唔好？」，袁偉豪表示唔知道。之後，黃智雯反駁：「但你之後結婚喎~ 」，江美儀亦表示：「你呢家有個好老婆！」，袁偉豪回應：「個個以為我結婚後唔使做，但唔係咁嘅，否則我今日嚟呢度（拍節目）做咩？」

Photo from 《開心大綜藝》TVB

袁偉豪自爆近兩年近乎無工作後，有網民回想起佢早前透露不甘被指外父送樓事件。有報道指，張寶兒爸爸當年豪送物業畀女兒作嫁妝，而兩人婚後入住6千多萬愛巢，袁偉豪更被封為「千億駙馬」。袁偉豪不滿外界點評，直言：「層樓我唔洗供咩？」。而早前，TVB節目《東張西望》都幫二人計算過，以6千5百多萬嘅樓價嚟講，就算二人首置，慳咗幾百萬印花稅，向銀行貸款5成，每月都要接近供13萬。