傳李克勤辭任《星夢傳奇》導師 收千萬酬勞轉投《中國好聲音》懷抱

最近，李克勤正在為TVB節目《聲夢傳奇》擔任導師，並且已經同一班參賽者們培養出好感情～日前，就有傳佢被內地選秀節目《中國好聲音》睇中，以豐厚嘅酬勞誠邀佢擔任導師，成為第3位獲節目欽點嘅香港歌手！

Photo from 李克勤IG

現年53歲嘅李克勤出道至今已經35年，有唔少代表作品，可以話係娛樂圈裡面嘅大前輩！最近，佢就正忙於成為TVB節目《聲夢傳奇》嘅首席導師兼「奶爸」，為一班參賽者提供意見同陪伴佢哋完成整個比賽嘅過程。

Photo from 李克勤微博

李克勤初初拍攝節目時，仲曾經俾兩位00後嘅參賽者詹天文同姚焯菲表示「我真係唔識佢囉！」、「認得佢，但唔知叫咩名」，令唔少網民感到震驚！經過幾個月嘅節目拍攝，李克勤已經成功同參賽者們打成一片，培養出好感情。父親節時，學員們仲送上佢哋嘅親筆簽名足球，表達感謝之情～

Photo from 《聲夢前傳》

Photo from 李克勤IG

日前，李克勤獲中國選秀節目《中國好聲音》以過千萬嘅酬勞誠邀佢擔任節目導師，係繼謝霆鋒同陳奕迅後，第3位加盟節目嘅香港歌手！而李克勤所屬嘅英皇娛樂經理人霍汶希並冇否認傳聞，向傳媒表示內地主辦單位好欣賞李克勤，認為佢十分幽默同專業。

Photo from 李克勤IG

Photo from 李克勤IG

然而，李克勤需要提早到達內地為節目做準備，再加上檢疫隔離等，要「忍痛」告別一班《聲夢》參賽者，啟程前往上海預備新節目拍攝。據悉，佢將會以視訊方式現身《聲夢傳奇》7月嘅總決賽，同各位學員迎接賽果。

Photo from 李克勤IG

有傳，今年係《中國好聲音》節目10週年，已經加盟嘅導師有汪峰、鄧紫棋、李榮浩等，陣容鼎盛！原本周杰倫同張惠妹亦獲邀出演節目，奈何台灣爆發疫情，兩人都已經向節目組請辭！

Photo from 微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）