內地男紋眉以為單邊收$88 埋單先知「逐條毛」計！被索近$5000獲小新眉 網民：好彩唔係植髮！

任何時候消費都要打醒十二分精神，否則後果可大可小！內地一名男子光顧紋眉服務，以為一邊眉毛只收$88人民幣，一對總共$176。點知紋完先知中伏，埋單要成5千元！

Photo from 少林足球 截圖

唔少人想自己面貌精神啲，但又唔想每天花時間化妝，都選擇幫襯紋眉師。但關乎自己身體，尤其樣子嘅嘢都係小心啲好。杭州一名男子最近到美髮店理髮，店員同時為佢免費修眉，但完成後，男子認為兩邊眉毛有明顯差異，遂接受經理向佢推介嘅紋眉服務。

Photo from 微博截圖

男子即場選擇咗價目表上最便宜一項，即人民幣$88元（約106港元）嘅服務。不過，完成後埋單時，男子驚覺88元只係紋一條眉毛！眉毛被逐條計算後，兩邊合共紋53條，總收費近$5000元（約6000港元），即使店員提供折扣優惠，折後埋單都要$4664元（約5605港元）。

Photo from 微博截圖

收貴咗已經令男子不滿，雪上加霜嘅係，紋眉效果更強差人意。兩邊眉毛不但唔對稱，而且好似「小新眉」般又粗又黑極不自然。

Photo from 微博截圖

男子氣憤下向內地媒體投訴，佢表示經理於紋眉前講過「一根眉毛88元」，令佢以為指一整條眉毛。男子遂稱，自己曾追問兩邊眉毛合共收費是否$176元（約212港元），職員當時卻沒有正面回應。

Photo from 微博截圖

經理解釋當時男子未曾詢問：「兩邊眉毛加起來是否共176元」，而經理亦強調自己當時已表明「一根88元」。不過兩人各執一詞，又無相關錄音證明，所以雙方爭論後未能達成共識。

Photo from 微博截圖

有網民認為店方有責任先向客人解釋收費明細，質疑店方一早有意誤導客人。亦有人認為男事主選擇如此便宜嘅紋眉服務係缺乏警惕嘅表現。有網民則笑言：「好彩佢唔係去植髮咋！否則收費更肉赤！」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）