日男家中養160隻寵物！為照顧寵物豪花7000萬！自己只著二手衫

日本一位男生佢外表睇落平平無奇，但原來家中飼養咗過百隻寵物！包括貓、狗、沅熊、金魚、鸚鵡、刺猬等，佢更為寵物花費7,000円，佢屋企面積雖然唔大，但寵物就多到好似動物園咁。

日本綜藝節目採訪到一位男生森田優基，就咁睇佢就係一個普通日本男生，打扮、衣著都無咩特別，但原來佢竟然係一名隱形富豪。

佢屋企亦唔係咩豪宅，但一入去就發現入面有好多動物！有雞、狗、貓、沅熊、水獺、雀仔、貂等，喺地上走嚟走去。其中一間房更塞咗唔同動物嘅飼養籠同飼養箱，種類包括：天竺鼠、土撥鼠、蜥蜴、變色龍、刺猬等；廚房旁邊仲有養金魚、熱帶魚等。

屋入面嘅動物都係森田優基嘅寵物，佢仲會放啲寵物周地走，亦可以自由出入佢間房。喺佢房間入面有柴犬、貓、貓頭鷹。

養咁多寵物，價錢當然唔平，沅熊價值35萬円；貓頭鷹一隻要30萬円；狐獴要25萬円；而水獺更要150萬円！而為營造適合寵物生活嘅環境，冷氣、照燈都要長開，仲有貓糧、狗糧等飼料，吸水墊等每樣都係開支。電費、飼料費、健康檢查費等每月開支高達120萬円！

森田先生就表示佢由養寵物以嚟已花費7,000萬円，所以佢絕對係一名隱形富豪。除咗金錢之外，養寵物仲要花好多時間、心機，為照顧家中160隻寵物，佢每日4點就要起身，要餵寵物、打掃衛生、換水等，要足足做4個鐘，之後仲要帶佢嘅柴犬去散步，完成所有事先去返工。

森田先生每日嘅生活就係圍繞住佢嘅寵物，佢所有精力都放晒喺照顧寵物身上，自己平時好少打扮，髮型係佢自己剪，連買衫都係去二手店買，平時唔食早餐、午餐只食5貫壽司，每日食飯支出唔多於過800円。

不過森田當然唔係淨係靠一份正職就賺到咁多錢照顧寵物，佢有開設YouTube Channel，同時亦有簽經紀公司，做過唔少幕前活動，所以先會養到咁多寵物。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）