download HolidaySmart 假期日常 app
【單車路線】10大推薦新手路線!睇日落無敵海景、古蹟、打卡玩足一日!

【單車路線】10大推薦新手路線!睇日落無敵海景、古蹟、打卡玩足一日!

香港好去處
By Haitaeng on 07 Jul 2021
Digital Editor

唔想整日宅在屋企,不如週末來個單車遊,呼吸一下新鮮空氣,順便發掘香港更多意想不到的景點!踩單車沿途能欣賞到不少古蹟、海景及影相打卡熱點等,仲能睇到浪漫的日落景色,體驗及感受大自然的美~今次特別推薦10大新手踩單車路線大美督/下白泥/大圍/將軍澳/東涌單車路線,一家大細、情侶或閨蜜好友都非常適合!

·大圍 至 大美督

路線:大圍港鐵站—沙田城門河—香港科學園—白石角海濱長廊—大埔海濱公園—大美督
路線總長:約24公里
需時:約3小時


號稱是全香港最受歡迎的單車路線之一,連旅發局都推薦,不但沿途風景靚,最重要難度不高,尤其適合新手或親子週末一日遊。此路線的最大特色除了科學園,一個以高科技及應用科技為主題的研究基地,園內有美食廣場、海洋廣場及園中湖等,踩至大尾督仲能睇到宏偉的大水壩。附近有燒烤場,水壩無敵大海景配燒烤超正!另外,部分單車鋪可以在大圍租車,大美督還車,就算食飽冇力踩回程都唔怕!

2020年港姐亞軍陳楨怡曾由沙田出發沿住科學園踩到大埔路線,表示路線唔會太長,幾輕鬆!Photo from 陳楨怡IG_celina_harto

大美督有無敵大海景~Photo from IG_cookies8dog

·東涌 至 迪欣湖

路線:東水月逸東邨—東涌海濱—北大嶼山公路—欣澳灣—迪欣湖
路線總長:約20公里
需時:約2~3小時

想感受一下異國風情,不妨考慮由東涌踩至迪欣湖的路線~從逸東邨出發,沿東涌海濱長長的海岸線踩,可以睇到超靚的海景!欣澳灣最特別之處就是木塘景色,有很多巨木插在海中~而全香港最大的人造湖-迪欣湖有大片草地,風景優美,踩到好攰坐下休息或野餐,非常寫意!

迪欣湖有大片草地可以野餐~Photo from IG_feiwanyip

全香港最大的人造湖-迪欣湖~Photo from IG_kctse

·東涌 至 機場跑道

路線:東涌逸東邨—東涌舊漁村碼頭—侯王宮—東涌炮台—東薈城—機場跑道
路線總長:約13公里
需時:約2小時


可能很多人都唔知道東涌其實有好多值得一睇的古蹟!從從逸東邨出發,沿途有舊漁村充滿大澳水鄉風情的高腳棚屋,仲有已250年歷史的侯王宮古廟、氣勢十足的東涌炮台,都充滿歷史痕跡。最後踩至機場跑道尾,雖然目前無法欣賞到好多飛機起飛,但漂亮浪漫的日落景色依然值得一睇~

同飛機一起入鏡,影相打卡!Photo from IG_gelgelina

除了飛機,黃昏的景色亦是超漂亮~Photo from IG_tongtsz

·元朗 至 南生圍

路線:元朗西鐵站—敬輝農場—南生圍
路線總長:約15公里
需時:約2小時


若鍾意接觸自然生態環境,當然要推薦由元朗踩至南生圍的路線,不過途中有紅綠燈及馬路,要小心注意~沿途經過的敬輝農場,是以保育環境為主題的有機農場,不但保護南生圍的自然生態,亦提供遊客品嘗農家菜。南生圍是元朗唯一的水鄉,景色宜人,不少人都鍾意來打卡影靚景,有時仲能偶遇白鷺及水鴨等!

南生圍是元朗唯一的水鄉。Photo from IG_tcby14

·元朗 至 屯門碼頭

路線:元朗西鐵站—屏山—洪水橋—兆康—屯門市中心—湖山河畔公園—屯門碼頭
路線總長:約11公里
需時:約1小時


很多人通常都是由元朗踩至南生圍,但其實元朗至屯門碼頭亦是不錯的新手路線,沿路都有單車徑,相對前者踩馬路更安全。此路線會經過洪水橋、藍地及龍門居等,最後踩至屯門碼頭漫步談心、睇日落,完美Ending!另外,電影《幻愛》曾在屯門碼頭海濱長廊取景,在兩位主角坐過的位置影相,都幾有Feel下~

在屯門碼頭漫步及睇日落都唔錯下~Photo from IG_c.y.cheng

·上水 至 龍躍頭文物徑

路線:上水港鐵站—雙魚河—豆品廠—大水管—龍躍頭文物徑
路線總長:約10公里
需時:約1小時


從上水出發的單車路線,路短又多平路,屬於入門級的單車路線。沿路途經雙魚河、塱原濕地、梧洞河畔及龍躍頭文物徑,仲有必打卡的熱門景點-大水管!另外,經過著名的豆品廠,可以打一打躉休息下,但可惜以往的任食豆腐花已取消。

人氣超高的打卡熱點~大水管!Photo from IG_bike_diary_in_everywhere

·天水圍 至 下白泥

路線:天水圍—天瑞路公園—流浮山道—鴨仔灣—下白泥
路線總長:約11公里
需時:約2小時


下白泥一直是被譽為香港睇日落最靚的地方之一,不妨試下踩單車去!從天水圍出發,分岔路不多,平坦易走,但由流浮山道至下白泥有一段公路,所以要小心注意。沿途經過流浮山道、鴨仔灣,再到下白泥賞日落,而且仲能在淺水灘水上仲能影到天空之鏡的效果!

下白泥。Photo from IG_calvinonshammongroad

景色太療愈啦!Photo from IG_calvinonshammongroad

踩單車到下白泥賞日落超正!Photo from IG_mk163388

·梅窩

路線:梅窩碼頭—銀礦灣泳灘—銀礦洞—銀礦瀑布—鹿地塘更樓
路線總長:約6公里
需時:約1小時


人流少且節奏較慢的梅窩,一向是踩單車的推薦好去處~梅窩雖然地方不大,但從碼頭出發,沿途能欣賞到多個大自然和古蹟。除了已有400年歷史的文武廟,銀礦灣沙灘、銀礦洞及鹿地塘更樓等,都是非常值得一睇的景點!

人流少的梅窩特別舒服~Photo from IG_milsc_95

充滿大自然氣息的梅窩!Photo from IG_kobelove_beautylife

·將軍澳海濱長廊單車徑

路線:將軍澳單車館—日出康城—將軍澳南海濱長廊—將軍澳海濱公園—調景嶺站
路線總長:約2公里
需時:約1小時


臨近海濱的將軍澳,海濱長廊全長約2公里,連接著將軍澳、調景嶺和康城三個地區。單車徑與行人路界線清晰,不怕人車爭路,是當地居民非常推薦的單車路線。另外,沿途可欣賞到大海及及對岸港島區的景色,踩著單車吹海風,景色優美,特別爽快!要注意的是將軍澳單車館只供團體練習單車使用,但館內可租單車。

一邊踩單車,一邊吹海風,超正!Photo from IG_stephhhxsteph

·鰂魚涌公園單車徑

路線總長:0.64公里


相比新界及九龍區,港島的單車徑選擇並不多,最推薦新手的肯定是鰂魚涌公園。全港島區最大的單車公園,內有一條長640米的單車徑,以平坦直路為主,非常適合初學踩單車或小朋友。另外,公園內有一艘救火船「葛量洪號」,可以打卡影相,仲有葛量洪號滅火輪展覽館可以參觀,入場免費,但要注意開放時間。

鰂魚涌公園單車徑。Photo from 康文署

救火船「葛量洪號」。Photo from 康文署

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel