【東京奧運】方力申向張家朗索簽名/摸金牌 興奮開IG直播險出事！

花劍選手張家朗早前就為香港勇奪第二面金牌，引起網民熱話，TVB主持陳約臨嘅態度更加被網民鬧爆！而同係TVB主持人嘅方力申亦有到花劍場地祝賀張家朗，仲即刻開咗IG直播，表現雀躍好興奮咁話「我掂到個金牌啊！」

Photo from 方力申IG

「193劍神」張家朗於東京奧運男子花劍個人賽中勇奪金牌，為香港獲得第二面金牌！今屆以TVB主持人參與東京奧運嘅方力申就當然有去親自祝賀張家朗啦，佢仲將即刻開直播同大家分享呢份喜悅～

Photo from 方力申IG

Photo from 方力申IG

由直播片段中所見，方力申化身小粉絲，邀請同張家朗合照，並且希望佢可以喺佢嘅運動服上簽名，表現得非常興奮！當張家朗攞出金牌一起自拍嘅時候，小方仲忍唔住伸手摸獎牌，「對唔住，我真係有掂到個金牌﹗」，難掩開心之情。

Photo from 方力申IG

Photo from 方力申IG

作為東京奧運主持，小方經常都可以親身睇比賽，而佢就喺張家朗決賽同後台都有全程直播，等大網民都可以好似置身於現場咁，直播仲吸引咗逾二千位粉絲觀看！然而，有網民就指佢嘅行為有侵權之嫌，根據東奧門票使用條款第33條「未經國際奧委會同意下，不得通過電視、廣播、互聯網（包括社交媒體和直播）傳輸或分發運動影像」。事後，小方亦好快將直播影片刪除。

Photo from 方力申IG

今日早上何詩蓓亦於奧運女子200米自由泳決賽中勇奪銀牌，為香港再添一個獎牌！而曾經作為前香港游泳代表隊嘅小方都有到場地睇決賽，喺得知結果之後，仲激動到忍唔住流眼淚，「游水真係好難㗎，呢塊牌對我哋泳壇係一個好大嘅鼓勵！」

Photo from 方力申IG

Photo from 方力申IG

有「香港飛魚王子」之稱嘅小方曾於2000年代表香港出戰悉尼奧運，並且創下200米背泳同400米個人混合四式嘅香港紀錄，足足維持咗21年先被打破。作為前泳手，又難怪佢見到何詩蓓奪得銀牌時會咁有感觸嘅～

Photo from 方力申IG

Photo from 方力申IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）