【東京奧運】日本混雙乒乓球選手被內地網民大罵　就連日本男星都遭受牽連？！

東京奧運嘅比賽正進行得如火如荼，成為大家最近嘅熱話。日前，中國就同日本隊伍進行咗乒乓球混雙決賽，然而兩位日本選手竟然被內地嘅網民鬧爆？！而另一位日本男星古川雄輝亦因為喺比賽期間發微博，而被內地網民大罵！

Photo from 奧運

東京奧運比賽正在進行中，部分賽事已經分出勝負。早前，中國隊伍就同日本隊伍進行乒乓球混雙決賽，戰況十分激烈。最終，由日本隊伍水谷隼同伊藤美誠以4:3局數拿下金牌，亦係日本於乒乓球賽事嘅第一金！

Photo from Steph Chambers Twitter

Photo from Steph Chambers Twitter

不過呢個賽果就引起內地網民嘅不滿，紛紛去日本選手嘅社交媒體下留言責怪佢哋。有內地網民認為兩位日本選手都於比賽期間做出違規行為，包括：用口吹乒乓球、觸摸球桌等，質疑比賽嘅公平性！仲有內地網民認為患有眼疾嘅水谷隼當時配戴嘅特質眼鏡係「減速鏡片」，所以先會勝出比賽。

Photo from 奧運直播

Photo from 奧運直播

後來，有人解釋水谷隼因為幾年前罹患眼疾，所以眼睛畏光，有光線嘅時候唔能夠清楚望到球嘅動向，必須配戴特殊眼鏡先可以比賽。而佢亦於Twitter表示雖然收到好多嘅批評，但並冇因此而影響到心情，反而為自己可以喺世界各地引起熱議而開心！

Photo from 水谷隼Twitter

而日本男星古川雄輝亦因為今次嘅比賽而遭殃？佢就於乒乓球混雙決賽進行期間同粉絲互動，以英文詢問「大家有冇睇奧運？」。不過當時中國隊伍嘅分數正落後於日本，因此唔少網民就覺得佢嘅行為非常具挑釁意味，引來網民嘅責罵。後來，佢又再發咗一條微博表示「我只係問有冇睇奧運，就有人要我閉嘴，真係好令人難過。」，令內地網民更加憤怒叫佢「滾出中國」！

Photo from 微博

Photo from 古川雄輝微博

隨後，古川雄輝刪除上述兩條微博，並且向內地網民道歉，表示自己喺錯誤嘅時間發問，從而引起網民不滿。不過，內地網民嘅怒火似乎仲未能夠平息到，有網民就要求佢用中文道歉！

Photo from 古川雄輝微博

古川雄輝2013年時因為拍攝日版《一吻定情》（日版《惡作劇之吻》）而成功吸引一班粉絲，喺內地嘅人氣比日本更強，經常都會喺微博同內地粉絲交流。

Photo from 《一吻定情》劇照

不過，呢場乒乓球混雙決賽真係發生好多事！據悉，《央視新聞》喺比賽尚未結束嘅時候，就已經發佈咗中國隊奪金嘅消息，點知最後竟然俾日本隊伍大逆轉，令唔少網民都留言「作為具權威性嘅媒體居然犯下這樣低級嘅錯誤」、「混雙金牌呢？臉疼嗎？」等。

Photo from 微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）