【杭州亞運】何詩蓓DSE 35分美國名校畢業/江旻憓係法律博士！10位學霸運動員盤點

張家朗、何詩蓓等運動員喺杭州亞運為香港增添多面獎牌，運動員平日花大量時間訓練，但有好多選手都係「文武雙全」，學業成績同樣驕人！即睇以下10位學霸運動員！

#何詩蓓

200米自由泳、100米自由泳金牌得主何詩蓓就讀於聖保祿天主教小學，DSE更考獲7科35分，不過佢憑籍平時學業成績同游泳成就喺放榜前已獲美國密芝根大學取錄，主修心理學，佢喺大學時期亦係校隊成員，攞過唔少冠軍。

#譚凱琳

香港女子游泳運動員，中學時就讀拔萃女書院，更以校隊隊長身分打破學界女子個人100米自由泳紀錄！中學畢業後升讀加拿大英屬哥倫比亞大學，主修運動機能學。

#鄭莉梅

何詩蓓隊友鄭莉梅係台法混血兒，佢係港隊4X100自由泳接力賽嘅成員，今次亦喺女子4×100米自由泳項目中奪得銅牌。佢18歲入讀柏克萊加利福尼亞大學心理系，之後喺香港中文大學攻讀心理學系碩士課程。

#歐鎧淳

香港泳隊「大師姐」歐鎧淳主力游自由泳及背泳，佢於末代會考中考獲6科23分，之後去柏克萊加利福尼亞大學讀環境經濟學。

#江旻憓

有「微笑劍后」之稱嘅江旻憓係香港女子劍擊（重劍）運動員，於今屆亞運女子重劍團體賽代表香港出戰兼獲得銀牌！佢就讀於著名國際學校英基沙田學院，之後升讀美國知名學府史丹福大學，主修國際關係學系，畢業後於中國人民大學修讀法律碩士，現時更係香港中文大學法律博士！

#朱嘉望

朱嘉望係江旻憓隊友，佢自小學起就讀耀中國際學校，畢業後升讀香港大學心理學系。

#連翊希

江旻憓、朱嘉望嘅隊友，雖然今次未有出戰亞運，不過佢畢業於拔萃女書院，之後就讀香港大學園景設計系。

#蔡俊彥

香港劍擊運動員，喺亞運男子重劍個人項目中奪得銅牌。佢小學就讀於喇沙小學，升讀喇沙書院後加入校隊，係隊中主力之一。大學就讀於香港大學會計系，更與MIRROR成員Edan係室友！

#陳芷澄

香港女子高爾夫球運動員，曾打出世界業餘高爾夫球排名前10名。佢就讀於拔萃女書院，之後更獲美國南加州大學取錄。

#Brendan Lai

藝人梁芷珮大仔，年僅17歲就已經係香港高爾夫球代表，更成功成功考入有132年歷史嘅「香港高爾夫球會」青年軍。佢現時就讀國際學校International College Hong Kong，仲攞埋獎學金！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）