Coffee林芊妤被人當面指「唔知瞓過幾多個男人」！重提當年低谷曾試過食藥一了百了

Coffee林芊妤喺YouTube拍片教瑜伽，更有過百萬訂閱。佢近日上陳敏之嘅YouTube節目做嘉賓，重提當年「Gathering事件」，又大爆自己被TVB解約後嘅心路歷程。

Coffee之前係TVB簽約藝人，2014年因為「Gathering事件」，TVB與佢解約。佢提到當初係好唔想離開TVB，並唔係因為對「娘家」有感情，而係TVB係佢出嚟做嘢嘅第一間公司，離開咗又唔知自己可以做啲咩。

所以當得知公司要與佢解約時，Coffee都覺得自己好迷惘，唔知點算。佢又表示嗰段時期係佢嘅低谷，更曾經想食藥一了百了，不過好彩最後無事。

Coffee指喺TVB時，無論藝人發生咩事，公司都會叫佢哋唔好出聲，但Coffee依家就好唔贊同呢句說話。

Coffee提到曾經有一次同老公搭的士，因為佢戴咗口罩，個司機唔認得佢，竟當住佢哋面話：「好似嗰個Coffee咁，一件咁嘅事，依家紅到咁喇可以，嗰時我唔知見過佢瞓幾多男人！」

不過Coffee並未有當面反駁嗰位司機，Coffee老公雖第一時間無反應到個司機講咩，但之後佢有問Coffee點解唔為自己解釋。Coffee就表示算啦，個司機又唔係邊個，唔通同佢嗌交咩？

但係佢老公就鬧咗佢一餐，指佢唔好好保護自己，咁樣第時點保護個仔：「當你個仔喺香港讀書都會面對呢啲人，你係咪要佢同你同一樣嘅方法去對人？」，Coffee聽完都即刻想喊，反思自己唔識教小朋友。

Coffee表示自己以前唔識保護自己，身邊嘅人想佢點就點，佢又自爆：「以前男朋友想打我就打我。」，佢指自己呢10年面對好多唔好嘅評論，如果見到人哋係誤會佢，佢會主動出嚟講返。不過，Coffee喺「快問快答」環節時就提到寧願自己無人識，佢表示自己無咩需要人哋憎佢，又唔係好重視名利。

Coffee表示依家會有人話其實係以前嘅事幫咗佢，但Coffee就認為其實係「瑜伽」幫咗佢先啱！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

Coffee老公被指買唔起樓！霸氣回應：我鍾意自己賺錢自己洗！幸福到不得了

22 Jan 2021

林芊妤（Coffee）做Youtuber教大家做瑜珈，事業發展越嚟越好，佢又不時喺IG大晒家庭樂，一家三口好幸福！早前有網民喺佢IG下留言嘲Coffee老公窮，Coffee即霸氣反擊指自己幸福到不得了！雖然對方已刪除留言，Coffee仍再post長文護夫，激讚丈夫有好多優點。

林芊妤（Coffee）Youtube Channel訂閱數頗高，做Youtuber做得有聲有色，又有賣衫，事業發展非常順利。

Coffee家庭亦相當美滿，經常喺IG大晒同老公、仔仔「伯伯」嘅家庭照，一家三口好幸福！

不過近日Coffee分享同仔仔嘅合照：「藍藍天空下，一邊擁抱工作一邊擁抱兒子😌」有網民留言指Coffee老公買唔起樓：「咁又係，袋鼠佬咁窮，savanna都買唔起，女人最怕嫁錯郎。」

Coffee即回覆呢位網民：「雖然佢唔係香港人無車無樓，但佢愛我呀又有穩定職業」又指同老公一齊日日只有開心笑，從來都無傷心過。更霸氣指：「我有手有腳鍾意自己賺錢自己洗，我選擇愛情因為我有能力自己買麵包，重點，我而家幸福到不得了」

呢名網友隨後刪除咗留言，但Coffee表示對方經常搵啲無聊嘢留言，當Coffee回覆佢又多人like嘅時候，對方就會delete message。

Coffee不甘丈夫被詆毀，喺IG post長文護夫，大讚老公係佢最崇拜、最尊重、最信任嘅人：「是他的真誠他的單純可愛，令我像活在另一個世界一樣，也是他令我重新相信愛情」

佢表示老公雖然唔係最有錢嘅人，但為屋企付咗最大責任，令佢可以毫無顧忌向前衝。Coffee又話老公每次喺佢難過失落時，都有方法令佢開懷：「他不像以往的男友永遠寵着我，但他教會了我獨立自主，他永遠也很堅持自己的想法，活得比誰都瀟灑自在，從來都不被其他人說話影響」

Coffee勁讚老公係最好嘅爸爸，對住仔仔眼中係滿滿嘅父愛，佢冧爆向老公示愛：「能嫁給他是我最大的福氣，讓我再次選擇我還是會選他，因為沒有他就不會有今天的我」

最後更霸氣指：「如果有任何人想誣蔑他，我會義無反顧的跟你對上☺️」成篇文超閃！胡杏兒都有留言：「So sweet ❤️」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）