陳偉霆身價上升十倍/AB進名人榜？ 盤點8位北上發展香港明星

有唔少香港藝人都會選擇返內地發展，而且有部份藝人仲發展得非常好，而有啲藝人亦因此長駐內地，甚少出現喺香港！而家就等我哋一齊盤點一下有邊幾位返內地發展嘅香港藝人啦～

Photo from AngelababyIG

陳偉霆

陳偉霆於2006年作為新成員加入男子組合Boy'z（後來叫Sun Boy'z），可惜2008年組合正式解散。之後，陳偉霆就朝住唱跳歌手邁進，先後發行《TAXI》、《Do  you wanna dance》 等歌曲，亦因此香港網民大多稱佢為「的士陳」！

Photo from 陳偉霆微博

直到2013年，佢就開始返內地發展，往影視界發展，有份出演《少年四大名捕》、《古劍奇譚》等，令佢喺內地嘅人氣急速飆升，成為咗內地嘅一線男星！而家微博總共有超過4千萬人追蹤，喺內地嘅曝光率一直都頗高，而身價亦比以前增加好幾倍。

Photo from 《古劍奇譚》

Photo from 陳偉霆微博

鄧紫棋（G.E.M.）

鄧紫棋16歲時正式喺香港出道，一出道就已經引起大眾關注，仲於當時嘅香港三大樂壇嘅頒獎典禮上獲得新人金獎！喺2014年，因為參加內地節目《我是歌手》嘅亮眼表現，而備受內地網民喜愛，係全球華語地區爆紅。而家嘅佢同男友Mark長駐內地居住，就算回港都只係為探望家人同休息。

Photo from 《我是歌手》2

Photo from 鄧紫棋微博

Angelababy

Angelababy 14歲就加入模特圈，仲曾經拍過寫真集，仲去咗日本發展，係人氣都幾高嘅模特兒！2007年，Angelababy就開始轉型成為演員，而佢有份拍攝嘅《全城熱戀》就成功引起內地網民嘅注意，於2012年佢就同華宜兄弟簽約。

Photo from AngelababyIG

再加上同內地男藝人黃曉明結婚，就更加令佢嘅事業重心轉往內地。而佢嘅曝光率一直都非常高，係綜藝節目《奔跑吧兄弟》嘅固定主持，仲喺《2019福布斯中國名人榜》排行第14名！

Photo from 《奔跑吧兄弟》

劉愷威

劉愷威一入行就有份出演經典電視劇《真情》，之後佢亦拍攝多部TVB電視劇，包括有《皆大歡喜》、《創世紀》等，但係角色都並冇太大發揮空間，甚少有觀眾留意到佢。然而，當佢返內地發展之後，事業開始逐漸有起色，而且佢仲成為咗內地嘅一線小生，變成為人熟悉嘅演員。

Photo from TVB《皆大歡喜》

Photo from 劉愷威微博

王祖藍

王祖藍1998年以播音員身份出道，後來先開始幕前嘅工作。雖然佢喺香港發展得都算唔錯，不過就並唔算好紅，一直都半紅不紫嘅狀態。後來佢返內地發展，以出演綜藝節目為主，其中《百變大咖秀》、《奔跑吧兄弟》等而變得越來越紅。而佢亦同老婆於上海擁有逾千呎嘅安樂窩，打算長期定居內地。

Photo from 王祖藍IG

Photo from 《奔跑吧兄弟》

不過，最近王祖藍因為成為TVB創意總監而返咗香港。返咗TVB後，佢曾經喺接受訪問時表示，現時喺內地發展得唔錯，話「如果為錢真係唔會返嚟」，非常直接！睇嚟內地嘅薪水十分可觀～

Photo from 王祖藍IG

李治廷

李治廷於2009年以歌手身份入行，當年仲獲得多個樂壇新人獎！除此之外，佢仲參與電影《歲月神偷》並榮獲第29屆香港電影金像獎「最佳新演員獎」及 「原創電影歌曲《歲月輕狂》」，可以話係前途無可限量！然而，佢之後喺香港嘅發展一直都平平無奇，2011年佢就往內地發展。

Photo from 本港台

2014年，李治廷因為拍攝電視劇《武媚娘傳奇》而爆紅，仲被內地網民被封為「史上最帥皇帝」！再憑住出演真人騷《花樣姐姐》時暖男形象，而成功吸粉無數～

Photo from 李治廷IG

Photo from 李治廷IG

鍾漢良

鍾漢良 1993 年加入TVB舞蹈訓練班，成為舞蹈演員，後來喺機緣巧合下就成為做幕前演員。而佢早於2000年就開始往內地發展，可以話係最早開始北上發展嘅香港藝人。直到2009年，佢出演《來不及說我愛你》先開始令內地網民對佢印象深刻，並且奠定佢喺內地一線小生嘅地位！

Photo from 鍾漢良微博

Photo from 浙江衛視2020跨年晚會

梁競徽

梁競徽（原名梁烈唯）曾經參與多部TVB電視劇，不過大多演配角，直到2012年終於獲得滿千星輝頒獎典禮「飛躍進步男藝員」一獎。近呢幾年，佢開始北上發展，到處出席商演表演唱歌，仲成功獲得一班內地網民嘅支持。近期，佢仲有份成為電影《浴血狂蟒》嘅男一，又難怪佢會選擇返內地發展嘅～

Photo from 梁競徽微博

Photo from 梁競徽微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）