香港劍擊四子開直播 吸引2萬人觀看！隊友大爆張家朗理想型「一定唔可以煩佢！」

香港劍擊代表隊於今年東京奧運取得好成績，亦因此而獲得大眾嘅關注。日前，「劍擊四子」就喺IG上一齊開直播同大家傾計，而唔少網民都話覺得「佢哋幾個真係好好笑」，睇得出佢哋感情非常好，而觀看人數仲一度高達2萬人！

Photo from 吳諾弘IG

香港劍擊選手張家朗於今年東京奧運獲得一面金牌，成為熱話；而佢亦與隊友吳諾弘、張小倫同蔡俊彥於團體賽獲得第七名，成績非常好！完成賽事後，吳諾弘就回港隔離兼休息，而另外3位就於內地隔離預備全運會。最近，張家朗、吳諾弘、張小倫就聯同隊內另一位隊友崔浩賢一齊IG直播答謝香港人嘅支持，而蔡俊彥並未有出現。

Photo from 吳諾弘IG

由童星出身嘅吳諾弘率先開始IG直播，邀請咗「大師兄」張小倫加入直播，並且不停催其他隊友盡快入直播，揚言每遲一分鐘就爆料！由於佢哋兩人都正在隔離中，所以一開直播佢哋就大呻「好悶啊」，話自己就算隔離都係瘋狂做運動。

Photo from 吳諾弘IG

張家朗一入直播就即刻令人數由4千飆升到1萬，人氣果然非常高！期間，隊友們不停咁叫張家朗做「Jer Jer」，網民忍唔住問「係咪有咩特別意思？」，張家朗隨即解釋話只係因為佢姓張；而吳諾弘嘅花名就係「Kobe」。網民仲話吳諾弘同台灣明星陳漢典好似樣，而佢就好搞笑咁搵咗張相對比，就連其他隊友都即刻覺得似。

Photo from 吳諾弘IG

吳諾弘仲話佢俾網民問得最多嘅問題竟然係「身高幾高？」，而佢就話自己其實有175cm，不過因為長期企喺好高嘅隊友身邊先令大家有錯覺，佢仲大呻「唔公平囉！你哋影相成日叫我企中間，搞到好似凹咗落去咁」！期間，佢哋就叫張家朗表演唱歌，大爆佢平時好鍾意沖涼唱歌，不過怕醜嘅佢就拒絕咗。

Photo from 吳諾弘IG

期間，好多網民詢問張家朗嘅感情狀況，「大師兄」張小倫就即刻代佢回答「單身一個」，而張家朗亦承認自己現時的確係單身！之後，吳諾弘就大爆張家朗嘅擇偶條件「我知！要有身高、要乖、友善、對佢好、孝順！」，張小倫補充「一定唔可以煩佢！」；而吳諾弘就好識咗咁話「女朋友就係我理想型」，即刻閃盲大家～

Photo from 吳諾弘IG

Photo from 吳諾弘IG

隨住張家朗嘅人氣越來越高，佢過去嘅感情生活亦被曝光，兩年前佢曾經同單車運動員馬詠茹（Vivian）拍拖！馬詠茹而家已經退役，並且仲獲邀成為NowTV嘅奧運主持人，而張家朗奪金嘅時候，佢亦大方喺IG祝賀對方。

Photo from 張家朗IG

Photo from 張家朗IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）