download HolidaySmart 假期日常 app
七師傅節目《七救星》大獲好評! 無厘頭行為惹人爆笑 網民:超越咗自肥企画

七師傅節目《七救星》大獲好評! 無厘頭行為惹人爆笑 網民:超越咗自肥企画

娛樂新聞
By Stephanie on 19 Aug 2021
Digital Content Writer

七仙羽(七師傅)最近人氣超高,獲唔少廣告商邀請做代言同宣傳。最近,ViuTV就邀請佢做新節目《七救星》主持人,每集都會邀請唔同嘅嘉賓,成功吸引唔少觀眾收睇!有網民仲大讚節目節奏夠快,再加上七師傅嘅無厘頭主持風格,令網民忍唔住爆笑!

七師傅人氣飆升!Photo from 七仙羽FB

玄學家七仙羽(七師傅)因為有份出演ViuTV真人騷《鬼同你上位》而爆紅,再憑住佢嘅搞笑嘅性格同獨有嘅「譚仔姐姐」口音,成功吸粉無數,仲因此而獲邀接拍多個廣告,十分受歡迎!

為拍宣傳照 化身為觀音菩薩Photo from 七仙羽FB

最近,ViuTV就邀請咗七師傅做全新節目《七救星》嘅主持人,而節目已於今個星期開始播放,反應亦非常唔錯。雖然只係播放咗3集,不過就已經登上ViuTV排行榜榜首!每一集節目都會邀請唔同嘅嘉賓,並由七師傅為佢哋「作法」解困。

暫時居於最多人睇榜首!Photo from ViuTV

有趣嘅節目內容亦成為咗唔少網民茶餘飯後嘅話題,其中有網民就喺討論區列出七師傅於節目中嘅幾個搞笑位,仲話「七救星係咪已經超越咗ERROR自肥企劃?」,呢個post成功引起網民們嘅迴響!

其他人吵架時七師傅獨自念經!Photo from 《七救星》

無厘頭主持風格 吸粉無數!Photo from 《七救星》

由第一集邀請咗林作母子同裕美做嘉賓,之後裕美同林作媽媽吵架不歡而散,其中七師傅喺兩人鬥嘴期間就不停在旁念經,仲喺個人訪問表示「我當時念緊嘅係難念的經,每個屋企都會有」。最後,七師傅仲送上P圖後嘅三人合照俾裕美,令佢哭笑不得,場面十分搞笑!

七師傅搞爛gag?Photo from 《七救星》

合成圖片令人爆笑!Photo from 《七救星》

節目第二集就邀請咗杜如風,佢就希望七師傅能夠幫助佢降低購物慾。而七師傅就竟然帶咗杜如風去紙紮舖shopping,之後再帶佢去睇衫,並要佢挑戰「眼看手勿動」嘅購物模式。然而,最終七師傅卻自己「破功」,喺舖頭入面買咗一條連身裙,令其他主持人都非常驚訝!

帶杜如風去紙紮舖?!Photo from 《七救星》

七師傅自己買衫!Photo from 《七救星》

而最新一集就邀請咗小肥做嘉賓,七師傅需要「作法」為佢度身定做一個減肥計劃,而佢哋4人就變身成為「大隻仔」齊齊幫助小肥轉運!期間,佢哋因為服裝問題導致寸步難行,滑稽畫面令人爆笑~

4人齊齊變大隻!Photo from 《七救星》

連上車都有困難Photo from 《七救星》

之後,七師傅就帶小肥去玩滑翔傘等佢可升上天吸收下仙氣,成為神仙,非常騎呢~喺預備飛行時,在場人員就表示「仲係唔夠風」,而七師傅就立刻作法,並且用非常獨有嘅姿勢去召喚南風。最終,佢成功令小肥完成試煉!

七師傅特有召喚風嘅方法?!Photo from 《七救星》

再加上不停念經!Photo from 《七救星》

唔少網民都表示節目嘅內容十分搞笑,雖然七師傅嘅行為好無厘頭,不過勝在夠真性情,成功治癒到網民嘅心!而且節目內容節奏非常快,一集一位嘉賓,有網民仲讚「節目節奏好過ERROR自肥」。

大獲好評!Photo from 連登討論區

網民大讚好笑!Photo from 連登討論區

有部份網民仲讚七師傅嘅為人,認為佢樂於助人,而且真係會付諸實行,捐錢給予有需要嘅人,非常難得!

網民大讚七師傅樂於助人!Photo from 連登討論區

七師傅不時派發物資Photo from 七仙羽FB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mailholiday@presslogic.com,直接將資料傳比小編)

 

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel