打工仔拍上司膊頭被罰1星期WFH 大呼爽皮 網民：七日後返公司咪頭七？

正值農曆七月「盂蘭節鬼月」，部分人會對言行多加小心，但返工都對此極為執著就較罕見。一名打工仔近日發文，指喺公司想同上司打招呼，繼而拍佢膊頭一下，結果令對方大怒，狠批佢犯下盂蘭節禁忌，罰佢在家工作一星期，卻令事主感到有賺！

Photo from 流岷師表

最近，一名打工仔於香港討論區發文，稱自己不迷信，但上司則頗為迷信，係個會每年搵風水師上門視察嘅人。事主表示，某日行到上司背後時想向佢打招呼，奈何「佢叫極都唔應」。

Photo from 愛回家之開心速遞 TVB

於是，事主拍了上司膊頭一下，點知上司即刻「上火」，好嬲咁擰過頭直斥：「拍拍拍，拍咩拍呀？我啲火比你拍熄晒啦！」、「知唔知而家係農曆七月呀？你依家即刻同我返屋企，去到下星期一先好返嚟office呀！」

Photo from TVB

事主大感無辜，表示自己唔係有心犯忌，又指上司都有不對地方：「邊個叫佢唔應人姐！我都係想同你打個招呼姐。同埋依家仲邊有人留意咩咩禁忌呀？」

Photo from 棟仁的時光 TVB

雖然被罰WFH一星期，但事主卻對懲罰表示歡迎：「可以WFH成個禮拜都幾舒服，可以慳車錢又可以慳時間」。有網民更羨慕佢有如此「另類」老細，事主遂稱：「都真係幾爽，原本仲諗緊食咩早餐好，一聽到『即刻返去WFH』就衝返屋企買埋個靚早餐食。」

Photo from 香港討論區 評論

Photo from 香港討論區

對此，有網民認為該上司應事先列出有咩禁忌不可犯，但亦有人覺得事主明知上司迷信就應該多加注意，又言「咁樣得罪老闆唔值得」。

Photo from 愛回家之開心速遞 TVB

另有網民指除咗朋友外，都無試過拍同事甚至上級膊頭，又指好彩事件對象係上司，而唔係老闆，否則應該無得留低。

Photo from 香港討論區 評論

同時，有網民對事主嘅「紀律處分」有不少搞笑諗法，有人開玩笑地建議：「搵個火機同佢點返著（把火）咪得囉」，事主笑指咁就真係會「無命」。又有人指事主經七日WFH後重回公司，某程度算係頭七，獲事主笑稱：「咁我星期一請埋假，星期二先返。」

Photo from 香港討論區

Photo from 香港討論區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）