何猷君出席電競比賽與對方互鬧 形象盡毀！ 挑釁行為被網民形容：小學生鬧交？

澳門賭王何鴻燊與四太梁安琪所生嘅兒子何猷君（Mario Ho）同內地名模奚夢瑤結婚後，不時都會同老婆一齊出演內地節目，令佢於內地嘅知名度大大增加。近日，何猷君就出席有份投資嘅電子競技俱樂部 EStar「手遊王者榮耀比賽」，但就被指佢同對方QGhappy工作人員發生爭執，仲一度口出惡言？！

Photo from 何猷君微博

現年26歲嘅何猷君（Mario Ho）係唔少人公認嘅「人生勝利組」，唔單止家庭背景優越，仲有傳佢嘅IQ高達180，被內地網民稱為「最強大腦」！自2019年同內地超模奚夢瑤結婚後，佢就將事業發展重心放喺內地，再加上同老婆一齊出演真人騷《幸福三重奏》，令佢於內地嘅知名度急升！

Photo from 何猷君微博

Photo from 《幸福三重奏》

何猷君畢業於麻省理工金融碩士，當年佢仲係史上最年輕進入麻省理工攻讀碩士嘅學生，並且只係用3年就完成需時4年嘅課程，令唔少人驚嘆。近年佢就開始於內地發展電競事業，打造自己嘅電競隊伍，令唔少網民更加認證佢「聰明」、「有生意頭腦」嘅好形象更深入民心！

Photo from 何猷君微博

Photo from 何猷君微博

日前，何猷君就出席投資嘅電子競技俱樂部EStar嘅「手遊王者榮耀比賽」，不過佢就於比賽期間疑似同對方隊伍QGhappy嘅工作人員發生口角，而網民仲將影片上載到微博，將佢嘅失態行為公諸於世，令佢一向溫文爾雅嘅形象瞬間摧毀！

Photo from 微博

Photo from 何猷君微博

據悉，何猷君嘅隊伍之後亦連輸4場，受唔住打擊嘅佢就開始「失控」。由影片中所見，佢向QGhappy嘅員工作出挑釁嘅行為，手舞足蹈咁話「聽不到聽不到，lalala～ 你上來啊！ lalala～」、「你打不過我吧！」等。期間，旁人嘗試阻止何猷君繼續「失控」，不過睇得出佢依然情緒高漲！唔少網民見到佢幼稚嘅行為後，都忍唔住話「睇到好尷尬啊」、「好似小學生吵架！」

Photo from 微博

Photo from 微博

據現場消息所指，其實何猷君嘅隊伍輸咗第一場後，心氣不順嘅佢就已經開始罵對面隊嘅人「廢物」、「滾回重慶」等；而對面QGhappy嘅員工覺得被冒犯，所以就還口大罵何猷君係「私生子」，令雙方嘅爭執升溫！唔少內地網民見狀都覺得何猷君態度十分差，對佢嘅好感度急降！

Photo from 連登討論區

Photo from 連登討論區

影片於網上瘋傳，好快就成功引起網民熱烈嘅討論！而何猷君亦有於微博澄清：「本人從未有過辱罵對方工作人員的言行，倒是對方說我的一些言論，相信看過視頻的大家都有聽到吧。」，後來佢就暗示自己可能係因為太投入於電競遊戲當中，並表示「以後會管理好自己的情緒，做一個不那麼容易『上頭』的電競觀眾」！

Photo from 何猷君微博

有內地網民就認為何猷君其實並冇錯，覺得對方話佢係「私生子」嘅發言的確令人感到不快；另一方面亦有網民認為既然作為電競俱樂部嘅投資人，就應該知道比賽一定會有輸贏，絕對唔應該因為一時衝動而挑釁對方，認為佢嘅表現非常唔專業！唔知大家對於何猷君今次嘅舉動又有咩睇法呢？

Photo from 微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）