【尚氣】梁朝偉揭7歲時爸爸三度離家出走 從此不懂與人相處 曾拒演父親

【尚氣】梁朝偉揭7歲時爸爸三度離家出走 從此不懂與人相處 曾拒演父親

娛樂新聞
By Cheryl on 03 Sep 2021
Digital Editor

影帝梁朝偉首次進軍荷里活,喺Marvel電影《尚氣與十環幫傳奇》(Shang-Chi and the Legend of the Ten Rings)飾演反派文武,兼演主角劉思慕父親。向來甚少飾演父親角色嘅偉仔,喺最近接受外媒訪問時,罕有談及與父親關係。

梁朝偉接受外媒專訪罕談父親。Photo from IG: tonyleung_chiuwai

梁朝偉罕談父親

梁朝偉近日接受外媒專訪,透露其父親任職夜場經理,但佢喺偉仔7歲時三度離家出走,自此便無再返家。喺當時60年代尾嘅香港社會,破碎家庭較為少見。

梁朝偉表示小時候父親曾三度離家。Photo from 《尚氣與十環幫傳奇》Marvel

梁朝偉小時候受家庭問題影響

偉仔表示,佢細個時身邊朋友都高興地談論父親與家庭生活。佢認為,自己由當時起開始拒絕同別人溝通,性格變得內斂,非常壓抑。可幸嘅係,媽媽成日帶佢睇電影,有助釋放情緒。

梁朝偉自小愛看電影,同時有助舒壓。Photo from 梁朝偉 微博

偉仔多年嚟甚少飾演父親角色,都同單親家庭經歷有關,佢指,曾經有人希望自己出演失敗父親角色,但佢拒絕咗,原因係佢唔想諗起父親當時如何對待自己。

梁朝偉曾拒絕飾演父親。Photo from IG: hottoyscollectibles

梁朝偉讚「文武」有深度

廣告
廣告

雖然如此,偉仔今次卻在《尚氣》中飾演主角劉思慕嘅父親「文武」。佢表示,呢個角色係一個具層次、有血有肉嘅角色:「文武小時候被父親瞧不起,無自尊。當佢有超能力就覺得權力等如自尊,導致變得極端,造成反社會人格,又將容易挫敗遷怒到他人身上。」

梁朝偉讚文武係有深度嘅反派角色。Photo from 《尚氣與十環幫傳奇》Marvel

偉仔認為以上因素令角色變成反派,但佢講到底就係一個不懂愛人,也不懂愛自己嘅爸爸。佢又指,雖然角色屬反派,但內心愛家,對家人有強烈嘅佔有慾。偉仔表示,現實嘅佢同樣愛家,但當然無咁極端。

偉仔指文武其實係一個不懂愛人嘅父親。Photo from 《尚氣與十環幫傳奇》Marvel

梁朝偉現實生活很宅

佢透露,只要身在香港便一定會陪家人、同老婆劉嘉玲食飯。今次佢為拍攝《尚氣》遠赴澳洲幾個月,佢話每次拍完戲返港就會留喺屋企同家人聚會。佢仲表示身為巨蟹座嘅自己好宅,平時唔太喜歡出門,只要宅再家中同老婆嘉玲一齊已經幸福。

梁朝偉愛跟老婆劉嘉玲宅在家。Photo from IG: tonyleung_chiuwai

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel