香港小姐2021 | 冠軍宋宛穎來自選美世家 單親家庭長大 媽媽做軍師嚴格keep fit

香港小姐2021 | 冠軍宋宛穎來自選美世家 單親家庭長大 媽媽做軍師嚴格keep fit

娛樂新聞
By Cheryl on 13 Sep 2021
Digital Editor

《2021香港小姐競選》落幕,分別由8號宋宛穎、15號梁凱晴、14號邵初奪得冠、亞、季軍。宋宛穎奪冠後凱旋返家接受無綫採訪,選美世家出身嘅佢同家人大爆幕後功臣及賽後感想。

宋宛穎成為香港小姐2021 冠軍。Photo from TVB

中葡混血宋宛穎來自單親家庭

8號宋宛穎(Sabrina Mendes)係中葡混血兒,來自單親家庭,Sabrina接受媒體訪問時坦言父母喺佢兒時已分開,所以自己無乜同爸爸聯絡。Sabrina有一個孖生嘅妹,佢指當年媽媽要一手一腳湊大兩個女,付出同犧牲好大。

宋宛穎係中葡混血,深得父母優良基因遺傳。Photo from IG:sabrinaxmendes

宋宛穎媽媽曾選華姐

宋宛穎媽媽來頭不少,佢就係1990年澳門小姐亞軍嘅文寶雪。宋媽媽亦曾於1991年參選華姐,同袁詠儀同屆。Sabrina於訪問指,今次選港姐算係為媽媽圓夢,因為媽媽當年想選港姐,但婆婆認為港姐「複雜啲」,而且要離鄉別井,所以最後只讓宋媽媽參加澳門小姐選美。原來佢屋企咁多人都進入過選美比賽決賽,睇嚟「選美」真係佢哋家族嘅傳統同強項喎!

宋媽媽文寶雪係1990年澳門小姐亞軍,曾於1991年參選華姐,同袁詠儀同屆。Photo from TVB

宋宛穎賽後回家,同一班親戚接受TVB家訪,佢婆婆大爆除咗宋宛穎母女,宋媽媽一輩都有人贏過選美冠軍,而婆婆一輩都有人贏過加拿大及三藩市小姐。婆婆亦對Sabrina決賽表現由一番評價:「化妝好靚,但問答差少少,有待進步。」

宋宛穎婆婆對選美世家感自豪。Photo from TVB

宋宛穎到過薛家燕藝培中心學舞

22歲宋宛穎6歲開始學習各種舞蹈,包括:芭蕾舞、爵士舞、中國舞、拉丁舞、Hip-Hop、宴會舞及古典舞,更到過薛家燕藝術培訓中心學舞。佢坦言選擇報名家燕媽媽嘅中心係為咗可以上電視,佢仲記得自己曾參與《歡樂滿東華》及《TVB兒童節之天才大匯演》。

宋宛穎細個已參與過《歡樂滿東華》及《TVB兒童節之天才大匯演》,演出經驗頗為豐富。Photo from TVB

宋宛穎係高材生

廣告
廣告

除咗跳舞了得,Sabrina仲係一名高材生,佢畢業於多倫多大學嘅生物化學及人類生物學。除咗港姐,佢另一個夢想係當一名醫生。

宋宛穎畢業於多倫多大學,雙修嘅生物化學及人類生物學。Photo from IG:sabrinaxmendes

宋宛穎有媽媽做軍師

宋宛穎透露今次參選有媽媽做軍師,媽媽自己曾想選港姐,所以今次都好支持女兒參選。參選期間,佢嚴格調控Sabrina飲食,Sabrina表示佢食乜都要拍照問下媽媽意見先,確保戒澱粉質、只可以吃白烚肉,又會叫Sabrina搵私人教練操fit自己,佢坦言媽媽猶如佢嘅經理人,不過媽媽唔太想出鏡。

宋宛穎參選為媽媽圓「港姐」夢。Photo from IG:sabrinaxmendes

宋宛穎稍有失準,無阻冠軍之路

Sabrina於準決賽中嘅問答環節以「淡雪草苺」、「香印提子」、「蘋果」形容三位評判朱玲玲、王幼倫及余錦基,亮眼表現令佢成為大熱。不過,佢坦言於吹笛環節稍有失手,有幾個音吹唔準。

宋宛穎坦言準決賽吹笛時稍有失手。Photo from TVB

決賽當晚,Sabrina於問答環節雖然都有失準,但無影響評判畀分,最後順利成為2021香港小姐冠軍,而15號梁凱晴、14號邵初則成為本屆嘅亞、季軍。

8號宋宛穎、15號梁凱晴、14號邵初分別成為《2021香港小姐競選》嘅冠、亞、季軍。Photo from TVB

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel