download HolidaySmart 假期日常 app
「TVB人前人後最nice藝員」投票!陳豪第1/馬國明包尾!岑麗香、鍾嘉欣榜上無名

「TVB人前人後最nice藝員」投票!陳豪第1/馬國明包尾!岑麗香、鍾嘉欣榜上無名

娛樂新聞
By Jennifer on 17 Sep 2021
Digital Editor

TVB節目《思家大戰》每集都有有獎問答遊戲《思家觀眾大戰》,家庭觀眾今次要競猜「TVB人前人後都咁Nice嘅藝員」,搵咗100位TVB台前幕後投票,得出最多人投嘅前6名。日前TVB喺官方Facebook、Instagram公佈完整名單,陳豪毫無疑問登頂第一位!有唔少觀眾都留言話佢真人超nice!

TVB節目《思家大戰》每集都有有獎問答遊戲《思家觀眾大戰》,家庭觀眾今次要競猜「TVB人前人後都咁Nice嘅藝員」,陳豪毫無疑問登頂第一位!Photo from 陳茵媺IG

陳豪高票得「TVB人前人後最nice藝員」第一位

「TVB人前人後都咁Nice嘅藝員」搵咗台前幕後100位員工,投出前6位(淨返9票各投出唔同嘅人)。第一位陳豪出咗名無架子,100票中佢有23票,獲大批網民力讚佢實至名歸!

第一位陳豪出咗名無架子,100票中佢有23票,獲大批網民力讚佢實至名歸!Photo from TVB

視帝陳豪真人好nice!Photo from TVB

其實當時競猜已有唔少網民估係陳豪,佢顧家好男人形象深入民心,熱愛咖啡嘅佢更開設咖啡店,不時會親身落舖招呼客人,真人的確好nice,佢獲投票第一位,可見佢人前人後始終如一。

其實當時競猜已有唔少網民估係陳豪Photo from TVB

陳豪顧家好男人形象深入民心Photo from 陳茵媺IG

熱愛咖啡嘅陳豪更開設咖啡店,不時會親身落舖招呼客人Photo from TVB

陸浩明留言指陳豪毫無架子幫手截巴士

喺留言區有網友表示見接觸過陳豪真人真係好好人,其中陸浩明亦留言稱自己都投陳豪一票,6號回憶稱當年收工跑去巴士站,架巴士準備開車,陳豪好好人咁幫佢截住架巴士,等佢上到車。

喺留言區有網友表示見接觸過陳豪真人真係好好人,其中陸浩明亦留言稱自己都投陳豪一票Photo from TVB

呢件事6號喺2018年嘅《後生仔傾下偈》就曾經提過,佢當時表示自己啱啱加入TVB,拍完戲一抽二褦拎住啲衫同鞋好輪盡咁嘆趕唔到巴士,而陳豪就做出Iron Man手勢:「得!6號我幫你截住佢!」,6號仲話自己中意咗佢啊!

6號喺2018年嘅《後生仔傾下偈》曾經提過,佢表示自己趕唔到巴士,而陳豪就做出Iron Man手勢:「得!6號我幫你截住佢!」Photo from TVB

「神之馬壯」黎諾懿獲「最nice藝員」第二位

第二位係黎諾懿!佢同陳豪票數只差3票,以20票位列第二。佢出道近20年,最為人熟悉嘅係喺《愛回家》飾演「馬壯」,近年佢主持烹飪節目《今晚請客》。黎諾懿喺圈中人緣唔錯,睇嚟同佢嘅親切有所關係。

黎諾懿同陳豪票數只差3票,以20票位列第二Photo from 黎諾懿IG

3屆視帝黎耀祥排第三位

共獲16票,黎耀祥入行36年,由跑龍套做起,之後2008年憑《秀才愛上兵》出色演技奪得「最佳男配角」,隨後2009年播出嘅《巾幗梟雄》「柴九」一角大受歡迎,黎耀祥首奪「最佳男主角」,晉身視帝。

黎耀祥入行36年,由跑龍套做起Photo from 黎耀祥IG

2009年播出嘅《巾幗梟雄》「柴九」一角大受歡迎,黎耀祥首奪「最佳男主角」Photo from TVB

從低做起嘅黎耀祥同唔少工作人員嘅關係都好好,但有網友留言指:「黎生一定唔nice,當年係街差少少就撞到佢,我對佢笑,佢雙眼即時閃開扮睇唔到,未有呢個反應前我都好喜歡佢的,之後就冇好感了,覺得佢好串」

有網友留言指:「黎生一定唔nice」Photo from TVB

陸浩明第四位最出乎意料?!

留言投陳豪嘅陸浩明獲第四,佢喺IG感謝大家支持:「你地真係太Nice!多謝晒台前幕後嘅同事, 大家太客氣啦!」,有網民直言:「陸浩估佢唔到」,6號獲第四都係唔少人意料之外。

留言投陳豪嘅陸浩明獲第四,佢喺IG感謝大家支持Photo from 陸浩明IG

有網民直言:「陸浩估佢唔到」Photo from TVB

薛家燕第五位,排名中唯一女士

前四名都係男士,到第五位終於有女士啦!就係薛家燕!家燕姐僅比6號少一票,以11票排第五。家燕姐經常笑面迎人,原來佢人前人後都咁nice~估唔到前六除咗家燕姐竟然無其他女士上榜,可能係因為投票員工比較多係綜藝節目工作人員,女星都係拍劇多。

排名中唯一女士薛家燕係第五位Photo from 薛家燕IG

第六位馬國明,排名比預料低

第六位係馬國明,佢獲9票排第六,呢個排名比唔少網友想像更低,馬明向來勁有觀眾緣,呆萌個性非常討好,喺圈中亦有好多朋友,相信佢真人亦係非常nice。

第六位係馬國明,佢獲9票Photo from 馬國明IG

馬明向來勁有觀眾緣,呆萌個性非常討好Photo from TVB

100位TVB台前幕後投票「TVB人前人後都咁Nice嘅藝員」完整名單Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

10大最討厭藝人近況公開!李思捷只得第三名!有夫婦齊上榜!有人離巢成功洗底?!

3 Sep 2021

李思捷主持嘅TVB節目《思家大戰》話題度唔錯,節目中李思捷不停被嘉賓窒,又提到3年前被選為「10大最討厭藝人」其中一位,李思捷明言毫不在乎,有人討論佢、有noise佢都開心。其實2018年網民選出嘅「10大最討厭藝人」中,李思捷只係排第三位,事隔3年,其他榜上有名嘅藝人近況如何?即刻睇睇!

李思捷回歸TVB主持節目《思家大戰》Photo from TVB

#第10位:王浩信

王浩信喺2017年首獲《萬千星輝頒獎典禮》「最佳男主角」,作為TVB當家小生,佢同唔少女演員合作過,但屢屢傳出緋聞,佢嘅緋聞女友包括江嘉敏、蔡思貝等,期間更多次傳婚變,令佢形象受到影響。

作為TVB當家小生,王浩信同唔少女演員合作過Photo from TVB

王浩信《踩過界》演盲俠大律師Photo from TVB

不過王浩信近年仍然劇接劇,工作量並無減少,仲喺《萬千星輝頒獎典禮2020》憑《踩過界2》「文申俠」一角相隔3年後再奪視帝,坐穩一線小生之位,佢致謝詞時提及老婆陳自瑤,對方「黑面」表情成為全城焦點,令兩人關係更加耐人尋味。

王浩信喺《萬千星輝頒獎典禮2020》再次憑《踩過界2》「文申俠」一角相隔3年後再奪視帝Photo from TVB

陳自瑤「黑面」表情成為全城焦點Photo from TVB

#第9位:林師傑

《超級巨聲》出身嘅林師傑曾經同鄧穎芝拍拖2年,但喺戀愛期間就傳出佢與?模親近被女方斷正,而鄧穎芝都有暗串過佢「多女」。

林師傑係《超級巨聲》出身Photo from 星夢娛樂

佢2015年與港姐歐陽巧瑩拍拖,並於2018年結婚,兩人感情好好,林師傑成功「洗底」,獲網民大讚係「好男人」!近年佢與TVB結束合約,出演咗同為「巨聲幫」出身嘅許廷鏗主持嘅ViuTV節目《AH佛真‧惜玩》。

林師傑2015年與港姐歐陽巧瑩拍拖,並於2018年結婚Photo from TVB

近年林師傑與TVB結束合約,出演咗同為「巨聲幫」出身嘅許廷鏗主持嘅ViuTV節目《AH佛真‧惜玩》。Photo from ViuTV

#第8位:崔建邦

崔建邦2007年於萬千星輝頒獎典禮中勇奪「飛躍進步男藝員」,成為TVB當時嘅金牌主持之一,與唐詩詠相戀又獲封「金童玉女」,但期間佢多次傳出緋聞最終兩人分手,之後有學拳擊嘅佢被指傷害女友、飲完酒揸車等,負面新聞一籮籮。

崔建邦曾經係TVB嘅金牌主持之一Photo from TVB

喺2011年崔建邦以助理編導身份重返TVB,之後再度主持大型節目,與有韓國血統、任職老師嘅新女友感情穩定,崔建邦更透露佢視女友為結婚對象。

2011年崔建邦以助理編導重返TVBPhoto from TVB

崔建邦與有韓國血統、任職老師嘅新女友感情穩定Photo from TVB

#第7位:黃翠如

39歲嘅黃翠如2012年轉投TVB後開始拍劇,佢演過嘅劇集數量極多,當中不乏好收視、有口碑嘅作品,包括:《師父·明白了》、《愛我請留言》,但佢喺《使徒行者2》、《溏心風暴3》等嘅演出就被網民指演技差。

黃翠如出演嘅劇集《愛我請留言》好評甚多Photo from TVB

黃翠如同洪永城嘅關係亦多次成為網民焦點,早前洪永城與女友梁諾妍宣佈結婚,黃翠如喺IG發長文卻被指「妹仔大過主人婆」,最近佢主演嘅新劇《七公主》中飾演大律師「顧靈珊(Alison)」,再被批駕馭唔到律師角色,網友直言佢演技「咁耐都無進步過」。

黃翠如同洪永城嘅關係亦多次成為網民焦點Photo from 黃翠如 Facebook

最近新劇《七公主》,黃翠如飾演大律師「顧靈珊(Alison)」Photo from TVB

#第6位:吳業坤

參加《超級巨聲2》入行,之後出演過多套電視劇《回到三國》、《使徒行者》、《老表,你好hea!》,喺音樂方面吳業坤曾橫掃各台頒獎禮嘅新人獎,更憑《原來她不夠愛我》勇奪得「叱咤樂壇我最喜愛的歌曲大獎」、「叱咤樂壇我最喜愛的男歌手」。不過佢被指「扮嘢」識女仔。

吳業坤曾橫掃各台頒獎禮嘅新人獎,更憑《原來她不夠愛我》勇奪得「叱咤樂壇我最喜愛的歌曲大獎」、「叱咤樂壇我最喜愛的男歌手」Photo from 吳業坤 IG

近年吳業坤去咗日本Working Holiday,又考獲日本語能力測試N2資格,為TVB飛日本採訪東京奧運,但佢喺節目中對香港運動員洪詠甄嘅態度被網民鬧爆唔專業,最後要公開道歉。

吳業坤喺節目中對香港運動員洪詠甄嘅態度被網民鬧爆唔專業,最後要公開道歉。Photo from TVB

#第5位:何雁詩

參加《超級巨聲》後簽約TVB,佢2017年與鄭俊弘公開戀情,但就被指介入鄭俊弘與姜麗文嘅戀情,有傳兩人已談婚論嫁,何雁詩被指係「第三者」,佢同鄭俊弘愛得高調,對外間評論一於少理。

何雁詩2017年與鄭俊弘公開戀情Photo from 何雁詩 IG

2020年兩人宣佈結婚,佢哋嘅結婚相成巴士廣告被網友指誇張,何雁詩及後解釋係fans好意。2021年7月,何雁詩宣佈約滿離巢,結束與TVB 12年賓主關係。

2020年何雁詩同鄭俊弘宣佈結婚,佢哋嘅結婚相成巴士廣告被網友指誇張,何雁詩及後解釋係fans好意Photo from TVB

#第4位:阿叻陳百祥

「叻哥」陳百祥多年嚟喺TVB擔任台慶、香港小姐決賽等大型節目嘅司儀。另外佢熱愛運動,為香港明星足球隊隊員之一,亦係荷蘭足球隊嘅忠實fans,因此獲封「荷蘭叻」。叻哥多年嚟「串嘴」形象深入民心,有唔少網友都指佢「牙擦擦」。

「叻哥」陳百祥多年嚟喺TVB擔任台慶、香港小姐決賽等大型節目嘅司儀Photo from TVB

近年佢負面新聞唔少,被指違反「限聚令」同位於九龍塘嘅單位疑有僭建,叻哥出席活動時再展「串嘴」本色,被問及其九龍塘單位,佢直言:「關啲人咩事?」

叻哥多年嚟「串嘴」形象深入民心Photo from TVB

#第3位:李思捷

參加「喜劇之王訓練班」入行,憑扮嘢上位,之後與阮兆祥、王祖藍合組「福祿壽」。李思捷被指「溝女無數」,主持嘅節目《今晚睇李》又遭網友批「無聊、無新意」,2015年佢喺10萬網民票選下成為「負皮王」第4名。

李思捷 扮鄭少秋,扮得唯俏唯妙Photo from TVB

李思捷主持嘅節目《今晚睇李》被網友批「無聊、無新意」Photo from TVB

李思捷2021年獲邀請回巢主持新節目《思家大戰》,依家同圈外女友拍拖多年,感情穩定,佢表示想成家立室做爸爸。

李思捷2021年獲邀請回巢主持新節目《思家大戰》Photo from TVB

#第2位:阿Bob林盛斌

2012年加盟TVB後成多個節目主持,佢更擔任唔同商業活動、婚禮司儀。曾一度因為「老是常出現」令觀眾「睇到煩」。

阿Bob 2012年加盟TVB後成多個節目主持Photo from TVB

阿Bob雖然觀眾緣唔算好,但佢做司儀就密密吸金,一家六口仲搬入九龍塘獨立豪宅。

阿Bob雖然觀眾緣唔算好,但佢做司儀就密密吸金Photo from 阿Bob IG

阿Bob一家六口搬入九龍塘獨立豪宅。Photo from 阿Bob IG

#第1位:鄭俊弘

鄭俊弘星途浮沉多年,直到參加TVB藝員歌唱比賽節目《星夢傳奇》奪冠後人氣急升,加盟「星夢娛樂」更成為公司首個舉行個人演唱會嘅歌手。不過佢早年曾同秦沛女兒姜麗文拍拖,有傳佢為何雁詩而同未婚妻分手,姜麗文被指係其「未婚妻」,此事令佢形象插水,更一度要暫時停工。

鄭俊弘參加TVB藝員歌唱比賽節目《星夢傳奇》奪冠後人氣急升Photo from TVB

不過佢工作機會並未減少,TVB劇集佢都有參演,同時亦有唱TVB劇集主題曲,佢同何雁詩宣佈結婚後更以「夫妻檔」身份出演節目。鄭俊弘有唔少海外演出機會,近日佢與老婆何雁詩齊齊飛美國登台,更於拉斯維加斯再簽婚書。

鄭俊弘同何雁詩宣佈結婚後更以「夫妻檔」身份出演節目Photo from TVB

近日鄭俊弘與老婆何雁詩齊齊飛美國登台,更於拉斯維加斯再簽婚書。Photo from 何雁詩 IG

相關文章:

相關文章:

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel