download HolidaySmart 假期日常 app
【港版魷魚遊戲】20個網民投選超經典童年集體遊戲 跳飛機/拋手巾/麻鷹捉雞仔

【港版魷魚遊戲】20個網民投選超經典童年集體遊戲 跳飛機/拋手巾/麻鷹捉雞仔

生活熱話
By Stephanie on 28 Sep 2021
Digital Content Writer

最近韓劇《魷魚遊戲》嘅熱潮席捲全球,當中劇裡面就要求玩家成功於6個傳統遊戲中勝出,先能夠獲得456億嘅巨額獎金!而唔少網民就開始喺網上討論「港版魷魚遊戲」應該要包含邊啲經典遊戲,而家就等我哋一齊睇下網民們投選嘅20個經典團體小遊戲啦~

網民投選20個港版魷魚遊戲必定要有嘅遊戲!Photo from TVB

1. 123紅綠燈

相信大家細個嘅時候,都一定有同朋友玩過「123紅綠燈」~首先要搵一個人擔任「鬼」貼牆企,而其餘嘅人就企喺對面。當「鬼」背住玩家們講「123紅綠燈過馬路要小心」,其他人就可以趁機走向「鬼」嘅方向,直到掂到「鬼」隔離嘅牆壁。期間,當「鬼」轉身嘅時候,玩家們必須停止手上嘅所有動作,一旦被發現就代表輸,並需要由佢擔任「鬼」。

「123紅綠燈」其實同《魷魚遊戲》中嘅第一個遊戲十分相似!Photo from Netflix

2.狐狸先生幾多點

「狐狸先生幾多點」嘅玩法其實同「123紅綠燈」有啲相似,玩家都必須喺「狐狸先生」面向佢哋嘅時候停止活動。不過,玩家就必須根據「狐狸先生」所講嘅時間,行走相應嘅步數(例如:喊10點時就行10步)。但當狐狸先生話「12點」嘅時候,就代表佢可以跑出去捉玩家,而玩家就要盡快跑回起點線嘅範圍內先可以確保自己唔會被捉!

「狐狸先生幾多點」玩家都需要喺「狐狸先生」轉身嘅時候,停止所有嘅活動!Photo from TVB

3. 跳飛機

以前有唔少嘅遊樂圓嘅地下都會畫上跳飛機嘅圖案,通常圖形都被分成9格,而每一個格都寫上咗數字(1到9)。玩家通常都會跟住數字嘅順序玩,並手持住小石(或者任何有重量嘅物品)扔到接下來要走嘅格仔入面(例如:拋小石到第2格時,就要單腳跳入第1格,並執起小石),如此類推。如果玩家中途做錯上面嘅程序、失去平衡、將小石拋出界外等,都將被視為輸!

「跳飛機」以前經常都會出現喺唔同嘅遊樂場㗎~Photo from TVB

玩家需要做足所有規矩,並成功跳完整個飛機跳先代表完成遊戲!Photo from TVB

4.捉迷藏 

捉迷藏應該係世界各地嘅小朋友都識玩嘅遊戲!其中一位玩家要負責做捉人嘅,而其餘嘅人就要喺指定時間內喺範圍內搵到合適嘅地方藏身;最先被捉到嘅玩家就需要於下一輪負責搵人。

捉迷藏應該係大家都一定玩過嘅遊戲喇~Photo from 《Hello Kitty愛漫遊》

5.麻鷹捉雞仔

玩法係其中一位玩家做「麻鷹」負責捉小雞;再選出一位玩家負責做「母雞」,保護其餘嘅玩家「小雞」,而小雞就會躲藏喺母雞身後,雙手搭住前面嘅人。遊戲開始後,母雞就會將嘅雙臂盡量阻撓麻鷹捉人,身後嘅小雞一旦被麻鷹碰到就代表被捉!

「麻鷹捉雞仔」過程十分刺激,需要由母雞需保護雞仔們避免被捉! Photo from TVB

6.糖黐豆

玩家需要根據遊戲主持人所宣佈嘅「糖黐豆」數目,盡快搵到相應數目嘅人數,並黐埋一齊;未能搵到同伴嘅人就將會被淘汰。

玩「糖黐豆」時,玩家需要根據主持人嘅命令組成一樣數目嘅隊伍!Photo from TVB

7.掂顏色

由主持人發號施令講出顏色,講完後立刻出發捉玩家。另一方面,玩家就需要尋找有相應顏色嘅物品,並用手指指住該物品,咁就可以避過主持人嘅捕捉,但未能夠搵到相應物品嘅玩家就有機會被主持人捉~

唔少網民都表示自己細個嘅時候曾經玩過「掂顏色」(掂鐵)!Photo from IG@ Holiday Smart

玩家需跟隨主持人嘅要求,找出相應物品,先可以避免被捉!Photo from TVB

8.耍盲雞

玩家中有一人將會做捉,而捉人嘅玩家就需要蒙上眼睛,並需要依靠聲音去尋找其他玩家。而其餘嘅玩家就需要喺限制範圍內避開唔俾人哋捉到,假若被捉到就將會由佢負責擔任捉人角色!

負責捉嘅玩家需要蒙上雙眼!Photo from TVB

其他玩家就需要迅速躲避,防止被捉!Photo from TVB

9.何仔公(何濟公)

玩家中需要有一人做「兵」,負責捉其他玩家。而正在躲避追捕嘅玩家就可以喺「兵」靠近嘅時候,立即將雙手抱胸前並講「何仔公!」,咁就可以避開追捕,但就只能夠停喺原地!而其他嘅玩家就可以冒著被捉嘅危險,為你「解穴」等你可以自由活動,繼續進行遊戲!當中有唔少人為遊戲增添咗新規矩,包括:自解(叫何仔公後可以自行再活動)、V(暫停)等。

網民們都有玩過「何仔公」,唔知大家玩嘅規則又係咪一樣呢?!Photo from IG@ Holiday Smart

大家為「何仔公」呢個遊戲加入咗唔同嘅新規則!Photo from ETV

10.老師話......

主持人會負責發號施令,而玩家就需要跟隨主持人所講嘅嘢做出相應動作。不過玩家必須聽清楚只有聽到「老師話.....」嘅時候,先需要聽從命令!(主持人:老師話舉高右手,代表全部玩家都需舉高右手),非常考驗玩家嘅專注力以及反應能力~

「老師話」係一個十分考驗玩家聽力同反應能力嘅遊戲!Photo from TVB

11.大白鯊

遊戲開始前,遊戲範圍內會有幾個圈圈,而圈內可以容納大約3-4人。其中一名玩家會被選為「大白鯊」,而其他玩家就將會係「海洋生物」,遊戲開始嘅時候,所以玩家都可以於範圍內自由「游泳」。不過當主持人一喊「大白鯊肚餓喇!」,「大白鯊」就可以捉人;而「海洋生物」就只能夠快速進入圈內避開追捕,未能進入圈圈嘅玩家將會被捉!

「大白鯊」負責捉其他玩家!Photo from 優酷電影

而其餘玩家就可以躲入圈圈內,避免被捉!Photo from TVB

12.埋舟

遊戲開始前,大家要先選出「守衛」嘅守護目標(大多係樹、牆壁等),而其他玩家就需要喺唔俾「守衛」碰到嘅情況下觸碰目標,並大叫「埋舟」!成功碰到目標物嘅玩家亦可以協助其他玩家,方法就係一個接一個咁掂住目標物,睇下係「守衛」定各位玩家快啲喇~

「埋舟」遊戲時,守衛需要保護一件物件,以免其他玩家觸碰到!Photo from TVB

13. Little Fighter

《Little Fighter》於1999年退推出,曾經係香港非常流行嘅電腦遊戲!喺遊戲中,玩家可以網上連線或者同電腦角色玩,並需要躲避佢哋攻擊,獲取勝利~

《Little Fighter》係有兩位香港大學生於1999年時創立嘅免費電腦遊戲!Photo from 《Little Fighter》

呢個電腦遊戲變得非常流行,係唔薩後80後、90後嘅童年回憶~Photo from 《Little Fighter》

14.魚蝦蟹

魚蝦蟹係唔少人新年嘅時候會玩嘅遊戲!玩家需要先猜測骰子所擲出嘅圖案(魚、蝦、蟹、金錢、葫蘆同埋雞),如果成功猜中將會獲得點數,不過大家嘅點數計算方法可能都會有少少唔同~

魚蝦蟹依然係大家經常會玩嘅經典遊戲~Photo from Pinterest

15.大風吹

玩家們將會圍圈坐埋一齊,而其中一位玩家將會做「鬼」負責發號施令,而玩家就需要根據「鬼」所提出嘅條件而離開位置,並迅速尋找新嘅座位(例如:「鬼」講「大風吹!戴眼鏡嘅走!」。戴眼鏡嘅玩家就需要重新找尋新嘅位置),未能夠搵到位置嘅人就將接替做「鬼」!

大風吹係一個十分講求速度以及反應力嘅遊戲!Photo from TVB

16.天下太平

呢個遊戲適合兩個人玩,玩家喺遊戲開始前先喺白紙上畫上4個正方格,並開始猜包剪揼,勝出嘅一方就可以逐一寫上「天」、「下」、「太」、「平」,之後仲可以畫上保護罩等去防護或者攻擊對方,係大家小時候返學必玩嘅遊戲~

「天下太平」係唔少人小學嘅時候必定會玩嘅遊戲!Photo from Pinterest

17.猜皇帝

遊戲開始前,玩家們需要喺規則上達成共識(例如:3盤2勝先算勝利)。之後,玩家中有一個人被選為皇帝,其餘嘅人則成為挑戰者,排隊同皇帝猜包剪揼。成功贏到皇帝嘅玩家就會成為新嘅皇帝,同其他玩家對戰!

「猜皇帝」要玩家們不停玩包剪揼,勝利嘅人先可以成為新嘅皇帝。Photo from 《新精武門》

18.跳橡筋繩 

呢個遊戲喺70至90年代嘅時候,深受女仔歡迎~由兩人各自攞住橡筋繩,而其餘嘅玩家就要跳過繩,不過腰一下嘅地方都唔可以掂到條繩!隨住玩家們成功破關,橡筋繩嘅高度亦會慢慢提高;而另外一種玩法就好似跳大繩一樣,睇大家可以一齊跳到幾多下~

跳橡筋繩係唔少女仔細個鍾意嘅遊戲~Photo from 《奔跑吧兄弟》

19.拋手巾

玩家圍圈坐喺地下,其中一位玩家做「鬼」負責將手巾擺喺一位玩家嘅身後,被放手巾喺背後嘅玩家需要立刻起身追到「鬼」;另一方面當「鬼」成功避開追捕,並坐返係該玩家原先嘅位置時,就能夠變返做普通玩家!值得留意嘅係,如果被放手巾嘅玩家喺「鬼」跑完一圈都並未發現手巾時,都將會成為下一輪嘅「鬼」!

「拋手巾」都係小學團體遊戲時必玩嘅遊戲~Photo from TVB

而被放手巾嘅人就需要起身捉人!Photo from TVB

20.彈擦膠

呢個遊戲非常簡單易明,就係輪流咁彈對方嘅擦膠,並盡快將對方嘅擦膠彈出範圍內!而唔少玩家都會為咗增加「戰力」,而喺擦膠上面加上釘或者間尺等。

小學生必定會上堂玩嘅「彈擦膠」!Photo from Pinterest

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

【魷魚遊戲】太紅爆抄襲爭議? 3部網民列對比圖疑抄日漫電影、韓綜《無限挑戰》!導演咁回應!

28 Sep , 2021

Netflix原創韓劇《魷魚遊戲》由《南漢山城》黃東赫編導,李政宰和朴海秀主演,自上架後憑著重口味的劇情及血腥元素,引爆熱潮,現時更在全球Netflix排行榜占據第2位!不過,亦因為人氣太高,就有網民指出劇集不少場面及橋段,與日漫電影《賭博默示錄》、《要聽神明的話》,甚至韓國綜藝《無限挑戰》的遊戲相似。對於《魷魚遊戲》的抄襲爭議,黃東赫導演正面回應~

《魷魚遊戲》太紅陷入抄襲爭議?!Photo from Netflix Korea Twitter

#《魷魚遊戲》VS《賭博默示錄》:主角遭遇背景相似

《魷魚遊戲》中李政宰飾演的「成奇勳」失業欠賭債,收到名片才參加比賽,希望能贏取高額獎金。有網民發現日本漫畫家福本的同名漫畫改編的電影《賭博默示錄》,同樣講述主角「伊藤開司」為了償還巨額債務,從此參加各種不同關卡遊戲,闖關不成就可能會死。對此,有網民就表示故事設定雖然相似,但《魷魚遊戲》一樣好看!

李政宰在《魷魚遊戲》飾演「成奇勳」,因失業並欠下賭債,決定參加比賽,希望能贏取高額獎金。Photo from Netflix Korea Twitter

《賭博默示錄》的主角「伊藤開司」為了償還巨額債務,參加各種不同關卡遊戲,但隨時會賠上性命!Photo from IMDb

#《魷魚遊戲》VS《要聽神明的話》:網民列四大相似點

《魷魚遊戲》被網友質疑抄襲於2014年上映的日漫電影《要聽神明的話》。Photo from IMDb

《魷魚遊戲》疑抄襲點1:大逃殺的生存淘汰遊戲

《魷魚遊戲》疑抄襲點2:遊戲內容均以孩童遊戲為主

《魷魚遊戲》疑抄襲點3:鬥智鬥力的關卡攻略

《魷魚遊戲》疑抄襲點4:在遊戲中落敗或違反規則就會死亡的血腥元素

《魷魚遊戲》中參加者若在遊戲中落敗或中途放棄,即會遭到當場射殺。Photo from Netflix Korea Twitter

《要聽神明的話》中若落敗或違反規則,下場就是死亡。Photo from IMDb 2

兩部作品的故事內容都是透過大逃殺般的生存淘汰遊戲,決定最後的贏家。其中最多人討論的就是《魷魚遊戲》的第一個遊戲「一二三,木頭人」,正好與《要聽神明的話》的「不倒翁倒了」相似,如人偶公仔的眼睛特寫、時間倒數、角色飛撲終點線、女人被噴到血大叫等畫面。還有,同樣以長相奇特的木偶公仔作為主持人,前者是詭異的女娃娃;後者是達摩。

網民列出《要聽神明的話》和《魷魚遊戲》的相似對比畫面。Photo from pann論壇

#《魷魚遊戲》VS《無限挑戰》:拔河遊戲

除了日本漫畫及電影,亦有網民表示《魷魚遊戲》的第三關遊戲「拔河」與韓國人氣節目《無限挑戰》以往的遊戲相似。於2014年播出的《無限挑戰》其中一集,成員們在兩棟樓之間進行了拔河比賽,隨時可能從建築物400米處跌落。兩部作品的遊戲規則和場景都十分相似,因此亦引起熱議。

《魷魚遊戲》的第三關遊戲「拔河比賽」,輸掉的隊伍將會從高處跌落。Photo from 《魷魚遊戲》截圖

韓國節目《無限挑戰》曾於2014年以CG的呈現方式,玩過在高樓上進行拔河比賽。Photo from 《無限挑戰》截圖

#黃東赫導演正面回應抄襲

對於《魷魚遊戲》遭疑抄襲,黃東赫導演在發布會上正面回應,自己早在2008年開始構思內容,並於2009年完成劇本,但由於當時找不到投資者而被迫擱置,直至近年才成功拍攝。他表示「真要說兩部片(《要聽神明的話》)相似的地方,就只是第一個遊戲一樣,其他都沒有什麼關聯,我沒有抄襲任何人。如果真要追究的話,我認為我才是鼻祖。」即使如此,曾於2015年在韓國上映的《要聽神明的話》,現時登上韓國付費影音平台銷售排行榜,一度沖上第二名,時隔6年後意外再次造成話題。

黃東赫導演回應《魷魚遊戲》沒有抄襲《要聽神明的話》,若要追究的話,認為自己才是鼻祖。Photo from 《魷魚遊戲》幕後花絮截圖

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel