download HolidaySmart 假期日常 app
網民列4大「港男婚後生活痛苦」原因:生仔/住屋議題太軟弱,仲唔敢做呢樣嘢?!

網民列4大「港男婚後生活痛苦」原因:生仔/住屋議題太軟弱,仲唔敢做呢樣嘢?!

生活熱話
By Cheryl on 13 Oct 2021
Digital Editor

不少人到了某個年紀都會盡快結婚,但不少都市男士嘅婚後生活卻不快樂。有網民經觀察後,認為婚後痛苦好多時都係咎由自取,並列出當中嘅4大原因,唔知大家又同唔同意呢?

有網民認為不少港男婚後痛苦係自己攞嚟?!Photo from 《離婚活動》

近日,一名網民(下稱樓主)到連登討論區以「好多港男婚後生活痛苦其實都係自己攞嚟」為題發文,指見到一個對婚後生活充滿擔憂嘅帖文後表示有感而發。原先帖文係關於一名29歲男網民指自己與未婚妻收入共4萬元,正準備結婚,才發現需要大筆資金作以下準備:影婚照、攝影、化妝、過大禮、禮金等。男方因此唔太想擺酒,女友卻持相反意見。

婚禮開支大,唔想搞,但另一半或各方家人未必肯Photo from TVB

另外,住屋問題亦令佢頭痕,男事主表示佢有兩種選擇,分別為:婚後女方遷入男家,或二人出外租樓。惟女方唔想跟男方家人同住,亦想「租大啲」,最好係村屋。但租樓開支大,將來生仔嘅話會雪上加霜。對此,男事主稱:「一諗起將來月月清冇將來嘅時候,真係覺得好絕望。」

有港男對結婚展開嘅洗費及生活感絕望Photo from 連登討論區

樓主睇完以上描述嘅帖文後有感而發,認為相關例子喺香港好普遍,「無論中同定小同谷,都有幾個男同學成日呻自己老婆點點點,甚至未結已經開始呻。」故此,經觀察後,該樓主分析了不少港男婚後痛苦嘅4大原因:

#1 結婚3部曲:婚禮、住屋、生育意向現分歧卻「頂硬上」

越來越多情侶都想低調舉行婚禮,捨棄傳統而隆重嘅儀式。就如上述案例,男方想「細搞」,但女方不願意,樓主認為此情況普遍,其中一方只能順從「命令」,種下不快根源。

籌備婚禮往往要用好多錢Photo from TVB

香港土地及樓價問題下,婚後要面對上車/租樓/同家人同住嘅世紀難題,就好似上述案例咁,其中一方想享受二人世界而不願遷入對方屋企,但又唔夠資金租一個空間充裕嘅單位,結果可能要不自量力,令自己長期缺乏儲蓄,降低生活質素。

婚後置業問題可以係爭執導火線Photo from 原諒他77次

除此,樓主又指不少港男唔想生育,但老婆持相反意見,所以最後仍生仔,導致「人生被捆綁」嘅感覺更強。

越來越多人唔想喺香港生育Photo from TVB

#2 移民問題

不同因素影響下,不少家庭為了下一代都選擇移民海外。該網民指出一些案例,「明明想為個仔去英國,老婆又死都唔肯走,情願喺香港花巨款讀所謂國際學校。」即使想走,亦有千萬個理由「走唔到」。然後,樓主以自己為例,由於佢自知其丈夫唔富有,所以情願細搞婚禮,將金錢留作移民用,佢又指,「我嚟到人工得番1/3但工時比香港少一半,壓力都細好多,佢哋口講就明但最後都係唔捨得香港份糧。」

樓主認為移民與否嘅難題係造成婚後不快原因之一Photo from 連登討論區

#3 為結婚而結婚

樓主又同意某網民所指,部分港男「又要當年貪人靚,又要趕deadline咁結婚」,卻不是真心愛對方,甚至早已無感情,「連未結嗰啲都話其實唔係咁想結,只係拍得耐、條女又有番咁上下年紀開始逼婚,逼逼吓就範。」

樓主認同某網民指不少人結婚無考慮清楚Photo from 連登討論區

好多人結婚卻不是真心愛對方?!Photo from TVB

#4 無勇氣離婚

樓主指,部分港男經常話想離婚,「講到好決絕問哂意見,律師都搵埋俾佢,但永遠得個講字。」然後,過一排又會見到港男花錢跟妻子去staycation,或買名牌禮物畀妻子,之後又開始重複呻想離婚。

樓主認為不少港男想離婚卻又不敢行動,轉個頭又照舊花錢買名牌畀老婆,然後又惡性循環Photo from TVB

總結嚟講,樓主認為不少港男婚後生活不美滿嘅原因,都因為在大多情況下埋沒了自己嘅意願,又不敢走離社會認可嘅「人生規劃路線」。佢又指,起初都認為佢哋慘,但後來認為,「好多嘢其實佢哋可以改變但就唔敢,可以講,佢哋而家嘅痛苦係自己攞嚟。」

樓主覺得不少港男婚後不快係自己不願行動作出改變而成,但有網民指其實佢多指嘅原因一樣適用於女性Photo from 連登討論區

對此,有部分網民同意樓主,但亦有不少網民認為佢講嘅原因都適用在不少香港女性身上,情況並唔係「港男專屬」。

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel