download HolidaySmart 假期日常 app
【東張西望】聾啞女公屋被搶事件最新發展!61歲女保安露面解釋! 大律師:可能有轉機

【東張西望】聾啞女公屋被搶事件最新發展!61歲女保安露面解釋! 大律師:可能有轉機

時事熱話 生活熱話
By Stephanie on 17 Nov 2021
Digital Content Writer

早前,TVB東張西望》就採訪聾啞女士「美華」,而佢表示因為過世嘅爸爸將單位轉贈俾女保安而導致無家可歸一事,引起網民嘅熱議。事件亦有新發展!女保安員「阿娟」終於願意當面同「美華」對質,並解釋「奪得」單位嘅來龍去脈!

聾啞女士單位被女保安佔據一事有最新發展!Photo from 《東張西望》

# 聾啞女士公屋被女保安「奪走」?!

最近,《東張西望》訪問原本居住於李鄭屋邨嘅聾啞女士「美華」,不過佢過世嘅爸爸卻竟然將單位業權轉贈俾大廈女保安「阿娟」,而阿娟亦狠心換門鎖,導致美華無家可歸!儘管節目組曾經嘗試多次打電話俾阿娟,希望可以幫助美華,但佢都一直表現得唔合作,唔願意同美華傾。

聾啞女士美華無家可歸,因為爸爸將單位業權俾咗女保安!Photo from 《東張西望》

女保安阿娟一直都態度超差,避免同美華見面。Photo from 《東張西望》

# 女保安阿娟露面!

然而,事情終於有新嘅發展喇!女保安阿娟答應重返單位,同美華面對面傾下。不過一見面後,阿娟就話「我係唔會俾佢入去!佢今日就要清晒啲嘢走」,只係允許節目組嘅人進入單位內,令美華頓時非常失落!

女保安阿娟終於願意回到單位,同美華見面!Photo from 《東張西望》

不過阿娟開門後,隨即表示唔會俾美華入屋!Photo from 《東張西望》

阿娟仲話今日返來係有目的!Photo from 《東張西望》

# 強調絕對冇用美人計!

唔少街坊都認為阿娟係用「美人計」哄90幾歲嘅美華爸爸將單位業權轉俾佢,而佢就憤怒澄清「我都61歲啦!佢要搵都搵18歲嗰啲啦,我只係當佢爸爸咁照顧。」

阿娟強調自己同美華爸爸關係單純!Photo from 《東張西望》

阿娟表示自己今年都已經61歲!Photo from 《東張西望》

# 一直都悉心照顧生病嘅美華爸爸

當被主持人問到「咁點解將單位俾你,而唔係俾個囡」時,阿娟就話美華爸爸生病嘅時候,一直都係由佢照顧佢。直到有一日,美華爸爸就邀請佢搬入單位一齊住,而佢初時都立刻拒絕對方嘅提議!不過眼見美華對爸爸不理不睬,所以佢就繼續幫手帶佢睇醫生以及煲湯俾佢飲。

阿娟話美華爸爸生前一直都係由佢照顧。Photo from 《東張西望》

美華爸爸曾經主動邀請阿娟一齊居住,不過遭到拒絕。Photo from 《東張西望》

# 美華爸爸一句話令阿娟決定要咗間屋?!

後來,美華爸爸就突然同阿娟講想要立一份遺囑,仲話想將單位業權俾佢!佢感到十分驚訝並拒絕,但就係因為美華爸爸一句「落去香都無得食」,所以佢決定要咗個單位!不過阿娟強調有幫手支付過世後嘅費用以及還錢;而單位就只係送俾佢當作答謝之情!

美華爸爸突然話立遺囑,仲將單位業權俾阿娟!Photo from 《東張西望》

阿娟本身都拒絕,不過就係因為美華爸爸一句話而決定要咗個單位!Photo from 《東張西望》

而呢個單位就當作係阿娟長期照顧美華爸爸嘅感謝禮。Photo from 《東張西望》

# 怪責美華生活習慣差!

阿娟就話本身就已經講好俾美華居住到成功申請公屋為止,仲反指美華生活習慣差,經常都將屋企整到好污糟,而且亦唔肯支付房屋嘅雜費。最終,佢忍無可忍,換咗門鎖唔俾對方進入單位!佢仲透露等美華搬走晒自己嘅物品,就會裝修單位,俾兒子結婚後居住。

阿娟指美華生活習慣差!Photo from 《東張西望》

美華亦唔願意支付房屋嘅雜費,令佢狠心決定換門鎖!Photo from 《東張西望》

# 只允許美華入屋收拾物品!

其後,阿娟就允許美華進入屋內,不過就只係叫對方立刻將房間內嘅東西帶走,要求佢一日內搬晒!面對如此無理嘅要求,美華感到好無助,不過幸好佢喺屋內取回部份重要文件,令佢可以證明自己曾經出錢資助購買單位,似乎為佢搵到一絲嘅曙光!

阿娟允許美華入屋,而美華房間的確比較多雜物。Photo from 《東張西望》

而阿娟眼見美華並冇執走所有物品,而開始感到憤怒!Photo from 《東張西望》

美華喺屋內取出嘅文件,可能能夠成為幫助佢取回部份權利嘅證據!Photo from 《東張西望》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

【東張西望】聾啞女喪父後有家歸不得! 父親竟將業權轉贈女保安!門鎖換掉被迫露宿街頭

16 Nov , 2021

唔少年紀老邁嘅父母都會立下遺囑,將自己嘅財產、物業等轉贈子女。最近,TVB東張西望》就採訪咗一名聾啞女士「美華」,佢同爸爸已經居住於李鄭屋邨多年。不過,已經過世嘅爸爸卻竟然將買下嘅公屋單位轉贈俾大廈女保安員?!而該女保安員亦狠心換鎖,導致「美華」無家可歸!

聾啞女子美華嘅房屋居然被大廈女保安員奪走?!Photo from 《東張西望》

# 聾啞女士單位被搶?!

TVB《東張西望》最近採訪咗一名年約50幾歲嘅聾啞女士「美華」,據悉佢同家人本身就居住喺李鄭屋邨,並透過「租者置其屋」購入公屋單位。居住喺附近嘅鄰居就話佢哋一家四口已經居住於該單位好耐,可惜媽媽過世以及哥哥搬走,只剩下「美華」同90歲高齡爸爸相依為命,依靠綜緩維生!

美華同家人已經居住於李鄭屋村30幾年!Photo from 《東張西望》

後來,美華同年約90歲嘅爸爸相依為命。Photo from 《東張西望》

# 認識大廈女保安「阿娟」!

後來「美華」就認識咗從內地來港工作嘅大廈女保安員「阿娟」,兩人感情變得非常好,而「阿娟」亦對佢哋兩父女照料有加。而「阿娟」就特別照顧「美華」爸爸,由於佢年紀老邁已經幾乎失去聽力,需要經常進出醫院。有街坊就表示曾經見過「阿娟」貼心煲湯俾佢飲,而「阿娟」晚上當值時「美華」爸爸都會陪伴喺身邊,令大家都覺得有啲奇怪!

街坊認為「阿娟」對美華父女過分關心。Photo from 《東張西望》

街坊都認為「阿娟」嘅行為非常古怪!Photo from 《東張西望》

# 爸爸居然轉讓單位業權俾女保安?!

不過簡單平淡嘅生活,卻因為爸爸嘅離世而發生巨變!原來「美華」爸爸2017年去世前立咗遺囑,將單位嘅業權全權交俾大廈女保安員「阿娟」!而「阿娟」亦因此而「名正言順」搬入去同「美華」一齊住,不過態度卻立刻180度大轉,曾經用手肘推佢,令佢受傷;並要求佢全額支付差餉管理費同埋水電媒等雜費。

美華爸爸居然於離世前,將單位嘅轉讓俾女保安「阿娟」?!Photo from 《東張西望》

# 美華有家歸不得!

直到今年10月,「阿娟」仲突然換咗單位嘅門鎖,令「美華」有家歸不得。唔少街坊都表示經常見到「美華」喺單位門口睡覺,或者喺留下公園呆坐,就算八號風球都冇辦法返屋企!而佢就需要長期推住自己嘅家當周圍走,導致佢經常腰酸背痛,不過大部分嘅衫都仲留咗喺單位內!

直到今年10月,「阿娟」就將門鎖換咗,令美華無家可歸!Photo from 《東張西望》

美華需要經常推住家當周圍走,裡面包含佢大部分嘅日用品。Photo from 《東張西望》

# 「阿娟」嘅真實面貌!

《東張西望》節目組就訪問咗街坊,佢哋都一致認為女保安「阿娟」係有預謀嘅,而且佢哋都話「阿娟」好識哄人,識得撒嬌,所以成功奪得「美華」爸爸歡心!根據「美華」所提供嘅照片,「阿娟」係一位年約50至60歲身體比較健壯嘅女子,有好大反差!

街坊們表示「阿娟」好識撒嬌,哄得美華爸爸好開心!Photo from 《東張西望》

「阿娟」係一位年約50至60歲身形比較健碩嘅女子,非常有反差!Photo from 《東張西望》

# 「阿娟」態度超差!

節目組多次嘗試聯絡「阿娟」,而佢就表現得非常唔合作,態度亦非常惡劣!仲堅稱自己先係最大嘅受害者,「買咗層樓,但就冇得住,我就係太仁慈」。

《東張西望》曾多次聯絡女保安「阿娟」。Photo from 《東張西望》

而「阿娟」就堅持單位已經全屬於佢!Photo from 《東張西望》

「阿娟」仲惡言相向,態度非常差!Photo from 《東張西望》

# 大律師提供意見

而大律師陸偉雄就表示現時單位已經正式轉讓咗俾女保安,美華只有2個方法可以取回單位部份業權!第一,美華需要證明自己曾經出錢或者部份資助購入單位,就可以依隨衡平法取得相關業權;第二,美華必須證明爸爸係佢生活依靠,利用受養人身份取得業權。

大律師陸偉雄為美華嘅個案提供意見。Photo from 《東張西望》

美華表示當年購入單位嘅時候,佢亦有資助$10萬!Photo from 《東張西望》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel