download HolidaySmart 假期日常 app
【邊度都有陰謀】傳聞指8位國際巨星都與光明會有關? MJ依然在生/ JB出道前已加入組織?!

【邊度都有陰謀】傳聞指8位國際巨星都與光明會有關? MJ依然在生/ JB出道前已加入組織?!

電視電影 娛樂新聞
By Stephanie on 25 Nov 2021
Digital Content Writer

相信大家都曾經聽聞過「光明會」呢個組織,然而呢個組織向來都非常神秘,坊間一直都有唔少嘅傳聞。最近,TVB節目《邊度都有陰謀》就探討咗幾位國際巨星同光明會嘅各種陰謀論!

陰謀論研究者Adam表示光明會利用音樂去操控大眾嘅思想,令人潛而默化咁被洗腦!Photo from 《邊度都有陰謀》

由鄭子誠、陸永以及陰謀論研究者Adam所主持嘅節目《邊度都有陰謀》最近就提及「光明會」呢個神秘組織,仲將佢哋同幾位國際巨星混為一談!喺陰謀論嘅世界觀而言,呢個神秘組織嘅勢力非常強大,會利用各種方式去操控人嘅思想,有傳佢哋最鍾意利用有權利或者有名氣嘅人去影響大眾!

《邊度都有陰謀》同大家探討唔少坊間傳聞。Photo from 《邊度都有陰謀》

其中有幾集就提及到光明會以及國際巨星們嘅關係。Photo from 《邊度都有陰謀》

其中著名歌手Michael Jackson(MJ)就係被大家瘋傳係「光明會」成員嘅名人喇!唔少網民都表示佢於1991年發佈嘅專輯《Dangerous》封面內含有大量有關組織嘅隱藏訊息,希望可以向大眾揭露佢長期活於苦痛之中嘅辛酸。佢生前曾經同家人透露「想要逃離但做唔到」,極力嘗試反抗光明會嘅操控。其中封面裡面嘅猴子喺光明會裡面係代表被操控嘅傀儡;而圖中唔少嘅動物都有象徵惡魔嘅標誌:彎曲羊角、蒼蠅等。

陰謀論學者們都認為《Dangerous》專輯封面藏有大量關於光明會嘅訊息!Photo from 《Dangerous》

MJ喺2009年6月25日被發現喺美國住所猝逝,享年50歲。然而直到而家,唔少人都對於MJ嘅死因存疑,其中大部分人都認為係藥物導致嘅。不過唔少陰謀論嘅人就認為事件可能同光明會有關,甚至認為MJ其實並未離世,只係故意製造事件隱姓埋名咁生活!

MJ嘅死因到而家都依然受到唔少網民嘅猜測!Photo from 《邊度都有陰謀》

部份網民認為MJ可能依然在生,只係過著隱姓埋名嘅生活。Photo from MJ

而MJ離世後所發表嘅專輯《This Is It》中嘅歌曲仲隱藏秘密,有網民嘗試將成首歌曲倒轉播放,而歌詞就出現「I'm not dead(我沒死)」、「Miss me?(想念我嗎??)」、「I'm alive(我依然在生)」等字句,令大家不寒而慄,猜測係MJ身前想同大家講嘅最後話語!

MJ 於2009年離開後發佈最後嘅專輯,其中歌曲卻被發現隱藏訊息?!Photo from This is it專輯

而有網民仲曾經表示於美國偶遇過一位外型極似MJ嘅人,其中佢囡囡Paris Jackson喺2016年時曾經上載一張自拍照,而車後座嘅人係一位帶著帽嘅長髮男生,並慵懶咁癱坐喺座位上,行為同外型上都同MJ有幾分相似,令MJ依然在世嘅傳聞變得沸沸揚揚!另外,有網民就表示與2017年見過MJ喬裝成伯伯出席侄仔嘅婚禮,仲將MJ以前於《Ghosts》MV中嘅老伯伯形象作出對比!

MJ 囡囡Paris Jackson曾經於2016年上載自拍照,而唔少網民都認為車後座嘅人極似MJ!Photo from Paris Jackson IG

有外國網民表示見到MJ於2017年喬裝打扮出席侄仔婚禮!Photo from Twitter

而MJ亦曾經喺《Ghosts》MV中打扮成老伯伯,形象的確有幾分相似!Photo from 《Ghosts》MV

除咗MJ之外,有唔少依然活躍嘅國際巨星都被盛傳係光明會嘅一員,即刻睇下有邊幾位啦:

1. Justin Bieber

Justin Bieber出道嘅時候,身上就已經有貓頭鷹嘅圖案,而光明會旗下嘅其中一個組織「Bohemian Grove」就係信奉白色貓頭鷹;而且佢嘅手臂上亦紋有「全視之眼」嘅圖案以及「Believe」嘅字句,表示對光明會嘅信任,因此主持人Adam認為佢喺出道前就已經加入光明會!

Justin Bieber左手臂上有貓頭鷹紋身!Photo from 《邊度都有陰謀》

Justin Bieber身上嘅紋身圖案令主持人認為佢出道前就已經加入光明會!Photo from 《邊度都有陰謀》

2. Beyoncé

Beyoncé曾經喺專輯上面畫上蝴蝶眼妝,而喺光明會裡面蝴蝶係象徵祭祀;另外佢亦嘗試身穿山羊頭設計嘅服裝,而該服裝嘅設計亦非常似一隻魔鬼!

Beyoncé曾經畫過蝴蝶眼妝,而蝴蝶於光明會中象徵祭祀。Photo from 《邊度都有陰謀》

山羊頭就係代表魔鬼嘅意思。Photo from 《邊度都有陰謀》

3. Rapper JAY-Z

Beyoncé老公JAY-Z係一位饒舌歌手,但兩夫婦經常都會於公開活動中做無厘頭嘅三角形手勢;而JAY-Z開show嘅時候亦一定會用手擺出三角形手勢!有指三角形手勢代表「共心力」,當好多人一齊擺出呢個手勢時就有凝聚神秘力量嘅效果。

Beyoncé同老公JAY-Z經常都於公開活動中擺出奇怪手勢!Photo from 《邊度都有陰謀》

JAY-Z表演嘅時候仲一定會擺上三角形手勢。Photo from 《邊度都有陰謀》

傳聞指大家一齊擺三角形手勢可以聚集神秘力量!Photo from 《邊度都有陰謀》

4. 麥當娜

麥當娜亦多次身穿山羊頭嘅服裝表演,仲戴上埋山羊頭飾;另外佢喺演唱會上曾經以「折斷翅膀嘅天使」作為表演主題,而折翼天使就係代表惡魔撒旦!

麥當娜曾多次身穿山羊服裝以及頭飾表演。Photo from 《邊度都有陰謀》

而麥當娜仲喺演唱會上以折翼天使做表演。Photo from 《邊度都有陰謀》

5. Britney Spears +Lady Gaga

兩人都曾經喺專輯中擺出「OK」手勢,並利用手勢遮蓋右眼嘅動作;而做呢個動作嘅時候就會呈現出3個「6」,亦即係歌頌撒旦嘅意思!

Britney Spears以及Lady Gaga都曾經擺出OK手勢並用佢遮蓋右眼!Photo from 《邊度都有陰謀》

三個6嘅手勢代表歌頌撒旦。Photo from 《邊度都有陰謀》

6. 韓國巨星PSY

當時PSY嘅《江南Style》紅遍全球,大人細路都識唱,然而歌曲當中卻隱藏住洗腦嘅旋律 ?!據聞,有人將歌曲頭10秒播放俾小朋友聽,佢哋就可以輕易哼出成首歌,並且令人極度興奮;相反播放俾精神病患者聽嘅時候,就會變得異常平靜!

PSY《江南Style》被指利用洗腦旋律操控人!Photo from 《邊度都有陰謀》

不過呢啲都只係坊間嘅傳聞,究竟係咪真嘅就要靠大家自行判斷喇~

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel