富貴新同事態度差仍獲經理照顧 連老闆都為佢出錢請全世界食嘢!

富貴新同事態度差仍獲經理照顧 連老闆都為佢出錢請全世界食嘢!

生活熱話
By Cheryl on 09 Dec 2021
Digital Editor

返工有皇親國戚做同事好容易有麻煩。近日,一名女網民到討論區大呻,其公司一名新女同事打扮富貴而且態度差,發文者有日發現佢同經理食飯,故認為佢係經理親戚,但真相原來更令人難受?

女同事新嚟已目中無人Photo from 《愛回家之開心速遞》 劇照

新嚟女同事好富貴

最近,一名網民(下稱樓主)到香港討論區發文,表示其工作地點新嚟咗個女同事,雖然樓主整個月都無同佢交流過,但佢留意到女同事每日返工都攞不同名牌嘅手袋,甚至成個月都無重複過款式,非常富貴。

樓主留意到女同事日日都帶唔同名牌手袋返工Photo from 《愛回家之開心速遞》

女同事態度難搞

樓主稱,由於今個月有項目要同該女同事合作,所以終於體驗到同佢相處係點。樓主稱,女同事態度懶散,又不聽人講嘢,亦毫無主見,覺得咩都無所謂。如果係交朋友,樓主早已停止同女同事相處,但工作上同佢「絕交」只會加重樓主工作量,所以佢感到非常無奈。

同女同事傾公事非常麻煩,難有進展Photo from TVB

同經理食飯身份特殊

有日,樓主與其他同事發現該女同事跟經理一起用膳。所以,樓主和其他人估計佢同經理有血緣關係。而由於經理未結婚,故有女同事「咁大個女」嘅可能性較低。最後,樓主認為佢係經理嘅皇親國戚,亦難怪佢可以無視工作能力及態度因素下進入公司。

樓主認為女同事同經理撐枱腳,代表佢係皇親國戚Photo from 香港討論區

老闆有話兒

但真相其實比樓主想象更誇張,近日,該公司老闆突然買了一盒果撻請各位同事食,並且「拜託」全世界:「記得要好好地照顧我個女呀,呢份工都係佢畢業之後第一份工咩都唔識,所以叫佢入黎由低做起。」

老細突然請食嘢,原來要幫手照顧其新入職嘅寶貝女兒Photo from 《最佳利益》劇照

廣告
廣告

樓主對前景不樂觀

樓主聽罷,始知道身光頸靚嘅女同事唔係管理層親人,直頭係「公主」,並概歎佢剛入職已經目中無人,令樓主對未來工作感到擔憂。

公司有一個唔批評得嘅公主同事,樓主認為將來好難頂Photo from TVB

網民:最緊要識投胎!

對此,不少網民都理解樓主,認為公司裡嘅「公主」、「王子」係最麻煩嘅人,而且佢哋一定係老闆心中嘅「接棒人選」,樓主亦回覆表示:「可以靠父幹真幸福。」

樓主感歎同事贏在起跑線上Photo from 香港討論區

有人則建議樓主快啲溝咗呢位女同事,咁就可以升呢座駙馬爺,但樓主強調自己係女人,無興趣搞呢味嘢。

樓主表示,身為女人嘅佢無法追求呢位身份特殊嘅女同事Photo from 香港討論區

另有網民表示,即使你投資和投機眼光幾好都無用,「最緊要識投胎!」

網民:都係出身緊要啲!Photo from 香港討論區

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel