吳諾弘出戰奧運/Jacky仔移居日本！12位童星現況大對比！僅少數人再從事演藝工作

By Jennifer on 10 Dec 2021

Digital Editor

電視劇嘅童星有時都會令觀眾留下深刻印象。不過好多童星都有唔係太愉快嘅童年，長大後亦未必會從事返演藝工作，大紅大紫嘅更加係少數。睇下童星包括唐寧、黃美棋、莊錠欣等成年後嘅現況。

唐寧曾是人氣花旦，婚後減產淡出幕前

現年40歲嘅唐寧8歲已入行，拍過好多廣告、電影，2001年以部頭合約形式簽約TVB，雖然多數做女配角但非常受觀眾喜愛。2017年結束與「舞台劇才子」鄧偉傑7年嘅婚姻，近年佢參與好多慈善、環保活動，甚少喺幕前出現，最近一部電視劇係ViuTV《歎息橋》。

黃美棋簽約TVB開展演藝事業

現年32歲嘅黃美棋第一部電視劇係TVB《愛有眀天2》，但日漸長大後媽媽唔贊成佢喺娛樂圈發展，佢飛往美國留學，完成學業後回流香港正式開展演藝事業，2021年簽約TVB成旗下合約藝人，陸續參演多套電視劇，算係從事返演藝工作，暫時角色以配角為主。

莊錠欣為家燕媽媽旗下組合出身，加入韓國女團CLC做「港產韓星」

2009年起以童星身份演出多部電視劇，更係家燕媽媽旗下少女組合Honey Bees成員。莊錠欣於2015年參加CUBE Entertainment香港區選秀比賽獲選飛去韓國做練習生，翌年更加入女團CLC出道。不過CLC喺韓國發展平平，直至2020年佢因為公司唔再支持組合活動而要求解約，退團後主要喺內地發展，但暫時未有代表作。

Jacky仔（王樹熹）移居過日本工作

5歲就喺TVB劇集《皆大歡喜》出道，因為出演多套配視劇為人熟悉，觀眾更親切咁稱呼佢做「Jacky仔」。長大後佢專注學業，喺2019年有重返TVB參演《她她她的少女時代》，不過相信只係「過下戲癮」。精通日語嘅Jacky仔於2021年初宣佈將去日本發展同定居。

Jacky仔哥哥王秉熹童星轉做導演

Jacky仔嘅哥哥都係童星嚟！同細佬一樣都係《皆大歡喜》出道，佢於浸會大學電影系畢業，其畢業作品《成長中》更獲得《全球大學電影獎》嘅「浸大電影特別推薦獎」。細個做演員，大個則轉做幕後。

吳諾弘成港隊劍擊明日之星，首戰東京奧運表現佳

2005年年僅6歲嘅吳諾弘拍TVB劇集《心花放》出道，《宮心計》、《酒店風雲》、《談情說案》等電視劇佢都有份出演，讀書時期嘅佢係校隊成員，2018年轉做全職運動員，2021年更代表香港出戰東京奧運花劍團體賽，其亮眼表演獲讚係港隊明日之星！

李日昇離巢TVB做健身教練

6歲出道做童星嘅李日昇係導演杜琪峯常用嘅童星，曾諗過放棄演藝事業而轉考消防員，經黃浩然提點後決定加入2013年第27期TVB藝員訓練班，多年嚟佢都有繼續出演TVB劇集，但一直都未有擔任重要角色，2020年約滿離開TVB，現時於Gym Room做健身教練，並且與紋身師兼演員女友林曉彤（Iris）結婚成人夫。

丘梓謙報讀藝員訓練班入行，《開心速遞》演「蔥頭」

曾經出演過好多TVB電視劇，相信唔少人都會覺得佢熟口熟面～佢參加咗2014年第27期無綫電視藝員訓練班正式入行，喺TVB每年都有唔少電視劇出街但多數演配角，終於佢喺《愛·回家之開心速遞》飾演「蔥頭」一角，因為角色疑似影射姜濤而備受關注。

丘竣霆（丘梓宏）做YouTuber開直播

丘梓謙嘅哥哥丘竣霆（原名丘梓宏）都係童星出身，曾喺《溏心風暴之家好月圓》飾演陳豪年輕版，佢2015年亦曾推出單曲《虛構情歌》。細佬仍然發展演藝事業，丘竣霆以「四少爺」之名做YouTuber，開直播打機。

「美心妹妹」Celine楊鎧凝專注學業淡出娛樂圈

3歲開始做童星嘅「美心妹妹」楊鎧凝（Celine）曾接拍20幾個廣告，亦有出演TVB劇集《愛我請留言》、《陪著你走》等。Celine依家13歲已無再做幕前工作，佢媽媽承認童星身份有影響生活。

「金像獎史上最年輕最佳男配角」吳澋滔隔15年再戰影壇

吳澋滔以9歲年齡出演電影《父子》，飾演郭富城、楊采妮之子，更憑呢個角色獲得《台灣金馬獎》「最佳男配角」；2007年度《香港電影金像獎》「最佳新演員」、「最佳男配角」兩項大獎，前途無可限量，但當年佢同為演員嘅媽媽司馬燕就指佢要以學業為重，唔畀佢拍戲。現年24歲嘅吳澋滔事隔15年再參演電影《七人樂隊》，好多人期待佢嘅演出！