Ash鍾卓穎承認離婚後刪走婚戒廣告！網友斥同前夫疑11月分居12月仲扮恩愛
《全民造星4》人氣落選參賽者Ash（鍾卓穎）以人妻身份參賽獲唔少網友支持，但日前佢就承認已離婚，即成網友熱話！而佢宣佈離婚前仲有喺IG post婚戒廣告，現時廣告文已被刪除，有網民力斥佢分咗居仲營造幸福人妻假象！
《全民造星4》人妻Ash鍾卓穎落選仍擁超高人氣
《全民造星4》女團尚未公佈成員，唔少落選參賽者都成為廣告商寵兒，其中Ash（鍾卓穎）喺節目中以「天使」形象為人熟悉，雖然喺比賽初期就淘汰，更被爆早已結婚，但Ash人氣不減，IG follower更直迫冠軍Marf！
Ash曾表示無提自己已婚係希望保護圈外人老公，又大讚老公好支持佢參賽，而Ash工作量亦唔少，IG有唔少廣告post，更出演「樂壇新人王」MC張天賦嘅MV，即使最後無入女團相信前途亦無可限量。
Ash發文承認離婚，10幾日前post婚戒廣告晒恩愛
就算做咗人妻，Ash人氣亦有增無減，憑籍呢個身份佢仲接到著名珠寶公司嘅戒指廣告，喺caption又大晒恩愛：「跳出confort zone唔係一件容易嘅事，但好幸運我有我先生一直鼓勵同支持我。」
估唔到無幾耐Ash就發文承認已同老公分開，回復單身！Ash承認離婚掀起網民熱議，一直以嚟Ash以人妻身份受訪都不忘讚老公，而且兩人結婚一年，正係甜蜜階段，加上前夫IG言談間明顯對Ash非常不捨，唔少人都對佢哋離婚嘅原因十分好奇。
被爆同MC張天賦平安夜出遊，Ash刪走戒指廣告
Ash宣佈離婚令外界有唔少猜測，更有網民公開疑似Ash同MC張天賦平安夜出遊嘅相片，隨即引發Ash因與MC拍MV而婚變嘅傳聞。唔少網民都於討論區留言指：「紅咗就飛起人」
傳出離婚後網友直言Ash 12月15日先喺IG出婚戒廣告post晒恩愛，短短十多日就宣佈離婚，仲同時傳出緋聞，認為佢相當「倒米」，而相關嘅珠寳公司亦關閉留言。
有網友發現Ash當初嘅IG 廣告post現時已被刪除，有網友猜測喺珠寳公司要求del po：「婚禮用品咁講意頭，離婚咁唔老黎，邊個仲會幫襯佢哋？」，又有人稱佢公司本身打算傾一年嘅廣告，但Ash離婚嘅新聞一出即刻取消咗Ash嘅廣告會議。
與前夫離婚前，Ash訪問自爆有同老公商量生BB計劃
Ash與前夫閃電離婚嘅傳聞越演越烈，有網友發現Ash同前夫疑早於11月感情已出現問題分居，但12月15日Ash仍繼續喺社交網站晒恩愛稱先生送對戒做禮物，喺離婚消息公佈前10日，佢接受訪問仲大談生BB計劃。
Ash喺訪問中提到佢咁早結婚係因為認定對方，又表示曾同老公商量生育計劃，當時仲以「我先生」稱呼前夫，完全無離婚跡象！有網民就認為Ash人前經常提起丈夫只為營造婚姻美滿嘅人妻形象，直斥佢明明已分居仲扮幸福！
MC張天賦經理人喺fans群中直指Ash前夫有問題
最近MC接受訪問時更直認平安夜有同Ash行超市，不過就強調佢哋唔係好熟，之後party仲有好多人參加。但網民對呢個解釋唔收貨，指兩人唔熟仲單獨行街好唔合理：「唔熟又會平安夜同人出街，點解都解唔通啦」
有網友公開咗MC fans Telegram group嘅截圖，發現管理員喺fans群度直指Ash前夫有問題：「女人嫁咗個咁嘅老公都慘」
管理員更疑似係MC嘅經理人，因為喺叱咤頒獎禮上MC獲男新人金獎時有多謝佢，事年爆出後唔少網民指經理人唔應該多口「潑火」，認為只會令事件越搞越大：「得閒教下mc點答傳媒問題好過啦！」
圖片來源：Ash IG、張天賦 IG、LIHKG、華納 IG、IG@taiwan.fatboy
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
張天賦承認平安夜同Ash出街！強調目前單身：唔清楚佢同老公嘅事！
5 Jan 2022
Photo from IG @taiwan.fatboy
# 網民大爆見到Ash 同MC一齊！
喺Ash嘅離婚消息曝光後，有網民就於連登討論區大爆喺平安夜當日見到Ash同歌手MC（張天賦）喺黃埔超市逛街嘅場面，令唔少網民猜測佢哋可能係因為拍攝《時間不早》嘅MV而擦出愛火！同時，Ash前夫亦表示Ash當天係出席慶功宴，令大家都更加確定相中人好大機會就係佢哋兩個！
Photo from lihkg
Photo from Ash IG
# MC只係回應兩人係朋友！
事件發展多日，張天賦就只係透過自己嘅所屬公司作出回應，表示「兩人只係工作關係」，否認熱戀傳聞！另一方面，Ash亦疑似因為傳聞而受到影響，本身喺IG嘅戒指廣告post都已經刪除！
Photo from 華納
# MC出席活動時，承認平安夜當晚同Ash一齊！
今日（5日），張天賦就出席TVB同港台合辦嘅樂壇頒獎禮記者會。喺接受傳媒訪問時，佢就首次正面回應事件，表示平安夜當日的確係同Ash一齊，「唔係私底下約出嚟，咁啱平安夜當晚冇嘢做，去超市係兩個人，但之後就好多人一齊party」，解釋兩人只係普通朋友關係！
Photo from 華納
# 強調自己依然係單身！
當傳媒問到是否知道Ash離婚一事時，MC就話「我哋未熟到咁，所以冇問過！」對於被問到未來同Ash會否有機會發展，佢就話冇諗太多「拍MV時會請教工作上嘅嘢」，但強調自己現時依然係單身！
Photo from 張天賦 IG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
