香港演員內地累積票房Top10公開!全部都係男明星!第一位票房即將突破100億

香港演員內地累積票房Top10公開!全部都係男明星!第一位票房即將突破100億

娛樂新聞
By Stephanie on 07 Jan 2022
Digital Content Writer

香港電影一直都頗受內地網民們嘅喜愛,而近年亦有中港合作拍攝嘅電影,當中唔少電影票房成績都唔錯~而家就等我哋一齊睇下香港演員們喺內地累積票房嘅頭10名啦,而且全部都係男星嚟!

累積票房成績逾67億嘅周潤發都只係得第5位?!Photo from ATV

10. 吳孟達 (50.44億)

已故演員吳孟達喺90年代嘅時候出演多部電影,而唔少電影都深受內地網民喜歡。雖然佢大多數都係飾演配角,但依然喺觀眾嘅心目中留下深刻印象,其中佢同周星馳仲係大家公認嘅最佳拍檔!

已故演員吳孟達從影40多年,唔少出演過嘅電影都成為經典!Photo from TVB

唔少內地網民都覺得吳孟達同星爺係最佳拍檔!Photo from TVB

9. 吳彥祖 (51.95億)

吳彥祖1997年回港後誤打誤撞成為咗演員,喺2004年仲憑著電影《新警察故事》而榮獲金馬獎「最佳男配角」,演技實力備受肯定!不過自從2017年後,佢就減少工作產量,平均1年先拍攝1部電影。現時長居美國嘅佢亦因為疫情關係,而未能回港拍攝。

吳彥祖憑《新警察故事》於2004年獲得金馬獎最佳男配角!Photo from 《新警察故事》

現時吳彥祖因為疫情關係,而未能回港拍攝!Photo from YouTube @香港金像獎

8. 張家輝 (53.18億)

張家輝1988年入行,並曾兩度獲得香港金像獎最佳男主角、以及一次金馬獎最佳男主角,實力毋庸置疑。雖然佢喺2019年後暫時都未有新作品推出,不過過去佢有份參與嘅電影票房成績都非常好;而最近就有傳佢將會自編自導電影,並已經成功從香港電影發展局申請資金。

張家輝曾兩度獲得香港金像獎最佳男主角!Photo from TVB

有傳張家輝將會自編自導電影!Photo from 《激戰》

7. 任達華 (57.87億)

現年66歲嘅任達華從影47年,翻查歷年紀錄佢每年都會出演至少3部電影,產量可以話係十分驚人!近年,佢就拍攝咗唔少內地電影,包括:《我和我的祖國》、《紅海行動》等,令佢喺內地嘅知名度大大增加。

任達華從影40多年,電影產量一直都好多!Photo from ViuTV

而任達華近年亦有出演唔少內地電影,因此獲得唔錯嘅票房成績!Photo from 《大灣仔的夜》

6. 郭富城 (66.48億)

郭富城曾經連續2年蟬聯台灣金馬獎影帝,並榮獲香港金像獎最佳男主角。當中佢所出演嘅電影有唔少都打破香港華語電影嘅紀錄,包括有《寒戰II》以及《風雲雄霸天下》,而呢啲電影都喺內地大受歡迎!

郭富城曾蟬聯兩屆金馬獎影帝!Photo from TVB

而《寒戰II》曾經成為香港影史華語電影票房冠軍,同時亦喺內地獲得高票房!Photo from 《寒戰II》

5. 周潤發 (67.74億)

周潤發自從2018年拍攝完電影《無雙》後,暫時都尚未推出任何新作品。不過,佢出演過嘅電影都非常出名,喺內地同樣賣座,包括有《讓子彈飛》、《寒戰II》等!

周潤發過往出演嘅電影都喺內地擁有唔錯嘅票房成績!Photo from 《寒戰II》

4. 成龍 (85.83億)

成龍喺2016年獲得奧斯卡「終生成就獎」,喺國際上擁有極高知名度!本身係動作演員嘅佢,現時仲會做動作指導以及電影監製,而佢近年比較賣座嘅電影就有《功夫瑜伽》、《神探蒲松齡》等。

成龍喺國際上嘅知名度非常高!Photo from 《特務迷城》

而佢近年嘅電影就有《神探蒲松齡》、《急先鋒》等。Photo from 微博

3. 劉德華 (95.7億)

現年60歲嘅劉德華自1981年入行後,出演過無數嘅電影,其中《無間道》、《拆彈專家》、《大隻佬》等都創下非常好嘅票房成績!雖然近年佢嘅電影產量已經減少咗好多,但相信佢以前所累積嘅票房成績依然能夠令佢穩拿票房最高嘅頭5位!

劉德華近年嘅出演嘅電影數目的確比以前少,但佢過往嘅電影票房成績都足以令佢成為第3位!Photo from 《拆彈專家》

2. 甄子丹 (96.28億)

動作演員甄子丹喺內地最賣座嘅電影就一定係《葉問》系列,而佢曾經拍攝嘅《十月圍城》、《畫皮》等都有唔錯嘅票房。而佢喺2021年出演嘅電影《怒火》仲突破10億票房,令佢嘅累積票房成績有超大嘅升幅!

甄子丹主演嘅《葉問》系列電影喺內地非常受歡迎!Photo from 甄子丹IG

甄子丹上年出演嘅《怒火》喺內地突破10億票房。Photo from 甄子丹IG

1. 古天樂 (98.08億)

古天樂過往出演過多部具有國際影響力嘅電影《黑社會以和為貴》、《竊聽風雲》等,喺電影界上付出唔少心力,而家正擔任緊今屆香港電影工作者總會會長。近呢幾年,佢嘅電影生產量依然非常多,包括有《梅艷芳》、《G風暴》等,尚未上映嘅都已經有逾10部電影,相信佢累積票房成績將會再下一城!

廣告
廣告

古天樂係今屆香港電影工作者總會會長。Photo from 古天樂IG

古天樂近年參與嘅電影數目都好多,仲有十幾部電影等待上映中!Photo from 《G風暴》預告

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

梁朝偉躋身內地最高片酬三甲! 受《尚氣》帶挈? 片酬升至7,300萬

11 Nov , 2021

影帝梁朝偉入行以來曾經飾演過唔同嘅角色,演技實力無容置疑。早前,佢有份參與嘅MARVEL電影《尚氣與十環幫傳奇》票房成績唔錯,而佢嘅片酬亦因此而有所提升?!有傳佢而家接拍咗內地電影《無名》,片酬「加價」後仲成為「內地片酬最高男藝人」三甲!

梁朝偉片酬上升,受到《尚氣》帶挈?!Photo from 梁朝偉IG

# 梁朝偉出道39年!

現年59歲嘅梁朝偉於1982年入行成為演員,參與唔少電視劇以及電影拍攝,曾經榮獲5次香港電影金像獎「最佳男主角」嘅殊榮,演技實力備受肯定,成為受到國際認可嘅香港知名演員!

梁朝偉出道至今已經39年,曾出演多部電影以及電視劇!Photo from 《尚氣與十環幫傳奇》

梁朝偉曾經榮獲5次香港電影金像獎「最佳男主角」!Photo from TVB

# 出演MARVEL電影 人氣再度急升!

今年MARVEL電影《尚氣與十環幫傳奇》就正式於全球上映,梁朝偉於電影中飾演反派「文武」一角,大受歡迎,令世界各地嘅網民們都一度陷入「梁朝偉」嘅魅力當中!而電影嘅票房成績亦非常好,截止今年10月嘅數據顯示全球票房已經突破4億美元,而單單喺北美嘅票房就已經有2億1500萬美元!

梁朝偉出演MARVEL電影《尚氣與十環幫傳奇》,獲得唔少網民喜歡!Photo from 《尚氣與十環幫傳奇》

《尚氣與十環幫傳奇》票房成績賣座,大獲好評!Photo from 《尚氣與十環幫傳奇》

# 今年初內地流傳片酬排行榜!

出演過嘅電影咁賣座,電影中嘅演員當然就因此而受到「加持」啦,身價節節上升~根據今年初,《南華早報》所公佈嘅「中國演員片酬權力排行榜」排名榜作參考,當時嘅梁朝偉只係排行第13位:平均電影片酬大約係$3000萬;而第一位同第二位就係成龍以及周潤發,不過兩人現時已經甚少出現於螢光幕前。

今年初,內地曾經釋出一份內地演員片酬名單!Photo from 微博

當時梁朝偉嘅片酬只係排行第13位!Photo from 梁朝偉IG

# 梁朝偉於MARVEL片酬成為第2高?!

隨後,梁朝偉就透過電影正式進軍荷李活影圈,佢於《尚氣》嘅片酬被曝光,足足有$780萬美元(約港幣$6,000萬)咁多,成為於MARVEL出道片酬最高嘅第2位,僅次於《雷神奇俠3:神域末日》飾演「Hela」嘅奧斯卡影后Cate Blanchett!

梁朝偉於《尚氣》中嘅片酬高達港幣$6,000萬,成為第二位最高片酬於MARVEL出道嘅演員!Photo from 《尚氣與十環幫傳奇》

第一位係出演《雷神奇俠3:神域末日》嘅奧斯卡影后Cate Blanchett!Photo from 《雷神奇俠3:神域末日》

# 於內地片酬急速上升!

另一方面,原來梁朝偉已經開始秘密為拍攝下部電影做準備。內地博納影業集團總裁于冬早前接受訪問時,表示梁朝偉已經接拍電影《無名》,有傳將會同周迅合作,並於上海進行拍攝。雖然現時內地正在嚴格調整藝人「片酬過高」嘅問題,不過佢今次嘅片酬亦有所提升,已經升至$6,000萬人民幣(約$7,300萬港幣),成為今年內地片酬第3高嘅男藝人!

現時梁朝偉於內地片酬已經升至$7,300萬港幣!Photo from 梁朝偉IG

# 2021年內地片酬最高男藝人!

而2021內地片酬第1位嘅男藝人係吳京,佢於電影《長津湖》嘅片酬為$8,000萬人民幣(約港幣$9,740萬);第二位就係出演《獨自.上場》嘅胡歌,片酬達$6,500萬人民幣(約港幣$7,900萬)。

內地演員胡京片酬最高,達到約$9,740萬港幣!Photo from 《長津湖》

第2位胡歌片酬達約$7,900萬港幣!Photo from 《偽裝者》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel