各位觀眾4條傾｜C君爆林盛斌Bob笑一男星綵排戴黑超造作雖被消音但被口型出賣身份！

By Cheryl on 10 Jan 2022

Digital Editor

由C君、陸永、林盛斌（Bob）和麥美恩（Mayanne）主持嘅J2特備節目《各位觀眾4條傾》嚟到最新一集，各人大談頒獎禮趣事，當中有不少爆料，原來Bob好留意人戴唔戴黑超，當C君模仿Bob大呻：「呢個已經唔認得個樣啦，仲戴咩黑超...」該藝人名字雖被消音，但憑口型已能猜測當事人原來係佢！

Photo from 《各位觀眾4條傾》TVB

農夫、Bob、麥美恩大爆頒獎禮趣聞

現身為無綫J2台創意總監嘅C君為J2推出多個全新節目，包括《陀地外國人》、《冇人性教育》等。佢最近同農夫拍檔陸永、林盛斌（Bob）及麥美恩（Mayanne）一起主持特備節目《各位觀眾4條傾》，四人都分享在大型頒獎禮嘅所見所聞。

Photo from 《各位觀眾4條傾》TVB

原來Bob好留意邊個藝人戴黑超？！

C君大爆Bob向來好重視自己大合照企位，又會在頒獎禮綵排上留意歌手們有無戴黑超，C君示範Bob嘅口吻：「佢話：『呢個已經唔認得個樣呀啦，仲戴咩黑超...』」陸永更笑指Bob有本簿mark低邊位藝人有戴黑超，C君即席扮Bob講：「哦~ 呢個原來叫做XXX（被消音）！」

Photo from 《各位觀眾4條傾》TVB

C君被口型出賣！

當Bob開始作解釋時，C君突然激動咁講：「你唔好拉我哋落水啦！呢啲係我哋聽你講㗎咋！我係認得邊個係XXX！」雖然該藝人名字再被消音，但當時正影著C君嘅Close up鏡頭，所以憑佢口型，不少網民推測佢所講嘅男歌手係嚟自星夢娛樂，27歲嘅伍富橋。C君強調自己認得呢位歌手，只係Bob認唔出。

Photo from 《各位觀眾4條傾》TVB

Photo from 伍富橋

有人為合照企位出盡奇招

農夫繼續爆料，提及一次影大合照時，有藝人疑做攝石人，「有個人頭四排都冇資格，排到第六行，呢個人慢慢行到去第五行，場務見到就鬧佢叫佢上番第六行，個場務一行開，佢又行落第四行，返嚟再鬧，到真正影大合照時，佢係企喺陳奕迅隔籬，咁先叫做勁！」

Photo from 《各位觀眾4條傾》TVB

歌手A叫歌手B幫佢攞水？

C君繼續講，有次在頒獎禮見到一個歌手竟然叫另一個行過嘅歌手「攞杯水畀佢」，被叫歌手當時呆咗，並無理會便離去。C君之後同「攞水」歌手講：「人哋歌手嚟㗎！你叫佢攞杯水？！」對方表現驚訝，表示：「唔係呀嘛？咁嘅樣係歌手？」C君聽罷便搞笑自嘲：「咁我都係啦~」，當其他主持見到C均寫下嘅名字都笑到見牙唔見眼。