download HolidaySmart 假期日常 app
港女睇完男友踢波想分手!嫌踢後衛無波入「好無上進心!」

港女睇完男友踢波想分手!嫌踢後衛無波入「好無上進心!」

生活熱話
By Cheryl on 14 Jan 2022
Digital Editor

踢波係咪一定要做前鋒先叫威?最近,一名女網民討論區發文,指佢欣賞男友踢波時,一心影佢入波,點知原來男友踢開後衛,女方於是認為男友唔夠上進,仲萌生分手念頭!

一名女網民上網發文,話自己睇完男友踢波,發現佢踢後衛後開始有分手念頭Photo from 《少林足球》劇照

港女想為男友影入球相

近日,一名女網民(下稱樓主)到連登討論區發文,表示自己與男友交往4年多,感情穩定。早前因承諾已久,所以便到球場睇男友踢波。樓主更自備露營凳,希望可以坐近啲,拍下男友入波嘅英姿再po上IG,做個稱職女友。

身為女友嘅樓主一心諗住幫男友影返睇型仔入波相Photo from 《白色強人》TVB

觀看15分鐘始發現男友踢後衛

但係,樓主坐低睇咗陣都見唔到男友喺邊,起初佢以為男友做後備,直至15分鐘後先驚覺自己坐錯邊,完全睇錯位!「男友話佢踢後衛,喺後面防守唔會入波㗎」樓主知道真相後有少少嬲,但冇發脾氣,只係為男友打氣,叫佢畀心機。

女友雖然失望,但都無表露出嚟,只叫男友加油Photo from 《少林足球》劇照

唔入波=無上進心?!

樓主繼續觀看男友球賽,但越睇越認為佢好無上進心,「完全唔會諗入波... 淨係跑嚟跑去,咁大個人仲成個細路仔咁」、「去守龍門著唔同色衫都叫做搶眼啲啊~」對於男友踢閘行為,樓主亦有不滿:「個閘用手推開咪得囉,好地地踢乜鬼嘢,唉真係成個生番咁。」睇完場波,樓主更開始反思同男友嘅關係:「我都唔知仲應唔應該繼續同呢個男人一齊。」

樓主對唔攻籠嘅男友感失望Photo from 《明星運動會》TVB

網民為後衛護航

對此,不少網民都認為樓主咁就諗分手好誇張,亦唔太尊重踢波呢項運動,直言「好彩你唔係我女朋友。」另有人為「後衛」護航,表示:「踢後衛通常都係啲低調踏實、為人著想嘅人,佢一定係一個好男人。」

有網民詳細解釋為何做「後衛」一定係好男人Photo from 連登討論區

識踢波嘅朋友又認唔認同以上言論?Photo from 《少林足球》劇照

樓主再補充,強調自己唔係嬲男友踢後衛無波入,而係不滿男友語氣顯得佢無上進心,「而係佢根本諗都冇諗過,個語氣講到好似『我就係咁廢㗎啦,唔好搞咁多嘢啦』咁,先覺得佢好冇上進心。」

樓主再解釋,佢並唔係歧視後衛,而係唔鐘意男友態度show唔到上進心Photo from 連登討論區

踢波踢咩位同上進心有關係嗎?Photo from 《明星運動會》TVB

雖樓主不斷為自己解釋,不過佢未有獲得網民同情或有用建議。有網民認為連睇場波都要講上進心未免太殘酷,建議樓主可以單純心態觀看運動賽事,讓落場踢嘅男友及做觀眾嘅自己都睇得開心啲。

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel