download HolidaySmart 假期日常 app
陳展鵬透露有意北上搵真銀?!首次開微博直播!期望上綜藝節目做「哥哥」

陳展鵬透露有意北上搵真銀?!首次開微博直播!期望上綜藝節目做「哥哥」

娛樂新聞
By Stephanie on 20 Jan 2022
Digital Content Writer

影帝陳展鵬(煎pang)近年喺TVB發展得十分唔錯,唔少劇集都擔正做男一,包括而家熱播中嘅《鐵拳英雄》~最近就係佢嘅45歲生日,而佢就首次開微博直播同內地嘅粉絲互動,仲表示希望出演內地綜藝節目,睇嚟有北上賺真銀嘅念頭喇~

陳展鵬最近首次開微博直播,言行中透露即將北上發展?!Photo from 陳展鵬IG

# 陳展鵬已經入行29年!

陳展鵬(煎pang)喺1993年加入TVB而入行,隨後喺2000年就轉往亞視發展,參與多部電視劇以及主持節目,但知名度唔算高。2007年佢再次回巢工作,曝光率開始大增,2016年憑著《城寨英雄》獲得「最佳男主角」,事業登上最高峰!隨後,佢參演嘅電視劇中大多都係飾演男一,成為TVB備受力捧嘅小生之一。有傳事業心強嘅佢續約時,曾經要求加薪至$500萬,但遭到拒絕。

陳展鵬2016年憑電視劇《城寨英雄》獲得影帝!Photo from TVB

之後,佢大部分出演嘅電視劇都係飾演男主角。Photo from 陳展鵬IG

# 45歲生日開微博直播,與內地粉絲慶生!

日前,陳展鵬就趁45歲生日首次喺微博開直播,同內地嘅粉絲們互動聊天。只見一打開個cam佢嘅樣貌就已經容光煥發,但好彩濾鏡效果並未到太誇張,依然認得出陳展鵬本人。而佢就先以廣東話打招呼,並詢問網民想聽邊一種語言,最終佢就以「廣普」 (廣式普通話)同大家交流!

適逢陳展鵬45歲生日,佢就喺當日首次於微博開直播!Photo from 陳展鵬微博

只見佢容光煥發,同內地粉絲以廣普溝通。Photo from 陳展鵬微博

# 坦承依然有歌手夢!

直播中,陳展鵬透露自己並冇放棄做歌手嘅夢想,現時都仲會花時間鍛鍊歌喉。而早前佢就歌曲《零歲》喺「新城頒獎典禮」榮獲「鑽石人氣網絡男歌手」及「鑽石觸目全方位歌手」獎,努力咁想朝住歌手進發嘅佢就話現時大多收聽年輕歌手嘅歌,包括:馮允謙、MC張天賦等,仲會用佢哋歌曲做練習,期望將來可以喺內地粉絲們面前獻唱或者辦演唱會!

陳展鵬表示自己內心依然有歌手夢!Photo from TVB

陳展鵬喺「新城勁爆頒獎禮2021 」獲得獎項!Photo from 新城勁爆頒獎禮2021

# 希望同內地演員合作拍戲!

當提及拍戲嘅話題時,陳展鵬就大sell自己,話願意嘗試唔同嘅角色,認為有時候遇到好嘅角色係非常難得。而佢亦話希望可以同更多演員合作,「唔一定係TVB嘅演員,同內地演員合作都好好㗎」,強調最希望俾觀眾新鮮感。

陳展鵬話願意嘗試唔同嘅角色!Photo from TVB

而佢亦話唔一定只係同TVB演員合作,仲非常樂意同內地演員一齊拍戲!Photo from 陳展鵬IG

# 願意返內地拍綜藝節目做「哥哥」!

甚少出演綜藝節目嘅陳展鵬就話都想嘗試下,有網民就詢問佢想唔想出演內地人氣真人騷《披荊斬棘的哥哥》,佢就非常興奮咁話「他邀請我,我就過去啦!我一定是哥哥啦!」呢場直播足足有19萬人觀看,而佢期望明年可以同內地粉絲們面對面慶祝生日!睇嚟佢打算開始密謀返內地工作喇~

而佢就想出演內地綜藝節目《披荊斬棘的哥哥》!Photo from 陳展鵬IG

因為出演《披荊斬棘的哥哥》而爆紅嘅「大灣區五人組」,仲因此而獲得自己嘅節目!Photo from 大灣仔的夜微博

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

【鐵拳英雄】陳展鵬復古造型惹網民爆笑!大晒譚仔姐姐口音!網民:亞視味濃

12 Jan , 2022

TVB劇集《鐵拳英雄》(原名《唐人街》)最近終於開播,呢套劇仲係唔少人一直都非常期待嘅電視劇之一。當中陳展鵬所飾演嘅「步天下」喺劇中就以非常復古嘅造型亮相,加上獨有嘅「譚仔姐姐」口音,成功引發網民爆笑!

 《鐵拳英雄》開播,陳展鵬喺劇中嘅造型以及口音都引發網民爆笑~Photo from 《鐵拳英雄》

# 《鐵拳英雄》2019年拍攝完畢,近日終於開播!

由陳展鵬、唐詩詠、陳山聰、姚子羚領銜主演嘅TVB劇集《鐵拳英雄》(原名《唐人街》)今個星期開播,據悉呢套劇早於2019年就已經拍攝完畢,但礙於內地審批以及疫情問題而變成咗「倉底貨」,拖到而家先播!

 《鐵拳英雄》今個星期開播!Photo from 《鐵拳英雄》

# 劇情加入唔少武打元素!

劇情嘅背景係三四十年代,大致講述陳展鵬、陳山聰、翟威廉三人帶同家人一齊移居泰國「唐仁街」後嘅生活。劇中加入唔少武打元素,仲邀請咗元秋、伍允龍等人出演,同之前嘅《城寨英雄》有幾分相似,仲因此而成為唔少網民非常期待嘅電視劇!

劇情大致係講陳展鵬、陳山聰、翟威廉三人帶同家人搬往泰國唐仁街。Photo from 《鐵拳英雄》

劇組仲邀請到元秋出演。Photo from 《鐵拳英雄》

# 陳展鵬第一集以「譚仔姐姐」口音出場!

由陳展鵬所飾演嘅「步天下」亦成為咗網民嘅焦點之一,由於角色本身係一位潮洲人,所以喺講廣東話嘅時候滿口鄉音,同「譚仔姐姐」一樣有幾分熟悉感,令唔少觀眾忍唔住爆笑~可惜「譚仔姐姐」口音只係出現喺第一集!

陳展鵬所飾演嘅「步天下」本身係潮洲人,所以第一集講嘢嘅時候會有譚仔姐姐feel~Photo from 《鐵拳英雄》

# 造型極復古?!

除此之外,陳展鵬喺第一集嘅造型亦非常復古,一頭蓬鬆嘅短頭髮,的確好有年代感,令唔少網民都話「呢種feel真係得佢carry到」、「果然係亞視出身!」等留言。

而劇中第一集嘅時候係以30至40年代為背景,所以穿著都比較有年代感!Photo from 《鐵拳英雄》

不過有唔少網民就認為呢個復古look又幾適合陳展鵬~Photo from 《鐵拳英雄》

# 武打戲表情肉緊!

另外,陳展鵬今次都有自己嘅一套招式「立地通天炮」,雖然名字聽落非常尷尬,不過卻係真實記載喺《八極拳圖解》當中嘅拳術!而佢肉緊嘅表情以及拳術都成為咗亮點~

陳展鵬今次就為大家介紹「立地通天炮」 ~Photo from 《鐵拳英雄》

然而,「立地通天炮」真係收錄於《八極拳》入面!Photo from 《鐵拳英雄》

陳展鵬喺打拳嘅時候表情豐富。Photo from 《鐵拳英雄》

而第一集仲疑似出現MARVEL電影《尚氣與十環幫傳奇》嘅同門兄弟?!

第一集仲疑似出現《尚氣》嘅朋友?!Photo from 《鐵拳英雄》

# 演員直播講趣事:李嘉叫人踢佢私人部位!

喺劇集開播之後,陳山聰、唐詩詠、姚子羚等就一齊開IG直播大談當時拍攝嘅趣事,然而佢哋都不約而同咁話因為拍完好耐,所以劇中嘅細節都唔係好記得喇。而姚子羚就透露曾經李嘉嘅身材真係練得非常結實,「佢不停喺片場叫人踢佢私人部位,我試過好大力咁踢,好似真係冇嘢咁!」;而伍允龍其後亦話自己都有試過踢!

 《鐵拳英雄》嘅一班演員就喺IG直播大談趣事。Photo from 唐詩穎IG

姚子羚大爆李嘉將身體鍛鍊得好結實,仲不停叫人踢佢私人部位?!Photo from 《鐵拳英雄》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel