【東張西望】大學生遇兼職騙案，想賺學費反而一日損失28萬！
大學生搵兼職受騙
騙案屢見不鮮，唔係淨係上咗年紀嘅人先會受騙，近日《東張西望》報道20歲大學生Cat，因為家中經濟條件唔好，雖然平時有做開幾份兼職，但因為疫情原因好多都中止咗。
就嚟要交學費，佢心急搵錢，見到IG有招聘「點擊/訂閱」兼職，於是就馬上聯絡對方。
透過賺多多Apps搶單，起初賺到少量金錢做「甜頭」
一開始佢就收到唔同嘅YouTuber帳號，要佢幫手「畀like」、「訂閱」，每完成一個任務有$20佣金，做夠5個任務先攞到錢。開頭都好順利，Cat真係收到$100佣金。
之後兼職方嘅客服就要佢做另一項「任務」，下載一個名為「賺多多Apps」去搶單，稱只要搶到60張單就有相應嘅佣金。雖然Cat唔知要「搶咩單」，但以往打工8、9個鐘先賺到幾百蚊，依家僅花一小時就有同樣嘅收入，加上佢的確賺到幾百蚊，令佢對呢份兼職深信不疑。
突出現「聯單」要先付款先賺到佣金
之後喺「搶單」過程中突然出現「聯單」情況，每次都要先支付一筆金錢先可以繼續搶單，初初只需畀200幾蚊，但後來要支出嘅金額越嚟越高，由三位數變四位數。
不過Cat試過連本帶利賺$5,000~$6,000，由於佢支出只係$2,000~$3,000，所以佢仲係有賺，不虞有詐。跟住「聯單」嘅金額高達$12萬，有之前嘅經驗，佢諗住都會賺得返，於是就問朋友借錢，存入$12萬。
數目越嚟越大，問朋友借錢存入戶口
後面再出現幾次「聯單」，金額約為港幣$8萬，Cat無咩戒心，前後共存入約$20萬！但今次搶單60次後Cat未能取回本金同佣金，客服稱佢因為會籍問題，無法一次過取回咁多錢，要佢再入多$88,888升級戶口。
大大話話都入咗成$20萬，Cat唔想連本金都無埋，於是照客服所講存入$88,888，當時客服更信誓旦旦表示：「親你的資金和佣金一 起返回給你的呢。」
一日損失28萬，受騙苦主眾多
點知入完錢，客服又指Cat個會籍太多錢，唔可以一次過拎晒，要再畀多$388,888，Cat有感上當被騙，決定報警。當日佢唔係第一個受騙嘅人，原來前面仲有5位苦主都報咗警。
Cat受騙成個過程只有3日，頭兩日佢都仲未有入過錢，僅僅一日佢就損失$28萬！佢嘅本金多數都係問朋友借錢，依家面對一身債務，Cat都覺得好無助。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
《東張西望》陳彥行被騙簽3千萬保險！爆喊指3年內過千萬積蓄蒸發！
28 Dec 2021
陳彥行上《東張西望》哭訴受騙
現年45歲嘅陳彥行曾為TVB藝人，出演經典喜劇《皆大歡喜》「金日」一角而為人熟悉。佢近日現身節目《東張西望》哭訴受騙令積蓄無晒！
銀行理財主管佘先生安排計劃，陳彥行與媽媽開聯名戶口
陳彥行指佢75歲嘅媽媽喺2018年結識咗一位銀行理財主管佘先生，之後更十分熟絡，一星期有3、4日上佢媽媽屋企食飯，有時更會帶埋老婆去。而陳彥行媽媽亦非常信任對方：「我聽我媽媽對佢係有讚無彈，係百分之二百嘅信任。」
陳彥行媽媽亦開始將銀行戶口交畀佘先生管理，之後佘先生更主動提議幫陳媽媽搞一個「計劃」，但陳媽媽年齡不允許，佘先生又提議陳媽媽搵屋企人開聯名戶口投資，令到佢可以做到呢個「計劃」。
陳彥行以為佘先生已同媽媽商量好，未了解清楚條款即簽文件
於是陳彥行就同媽媽開戶口，但同時佢並不清楚所謂嘅「計劃」到底係咩，佘先生亦從未解釋過。陳彥行表示同媽媽去銀行辦手續時簽咗好多份文件，但當時不以為意，無睇清楚條款細項：「我認為佢已經同我媽媽傾好晒、解釋清楚，我嘅角色只係落去簽個名。」
陳彥行稱佢一向同媽媽財政獨立，所以聯名戶口都只係掛名，佢從未過問戶口入咗幾多錢，但佘先生有時都會發訊息叫佢落分行簽名、做手續，每次佘生先都未有提及要簽咩文件，反而就指「陳太（陳彥行媽媽）同你提過啦可？」，令陳彥行誤以為佢已經同媽媽講過。
而且落到分行簽名時，佘先生及同事辦事十分有「效率」，只會揭到要簽名嗰頁，有部分文件要簽落電子器財，更無畀佢睇清楚到底係咩文件就要佢簽名。結果到2021年5月27日，佘先生就同陳彥行及佢媽媽表示會離職，令佢哋大為驚訝。
2年後陳媽媽發現戶口過千萬資金幾乎全蒸發
點知陳媽媽翌日去查看銀行戶口狀況發現出事！陳彥行：「我媽媽差啲暈咗喺銀行，見度入邊啲資金差唔多都蒸發晒。」，陳彥行亦即刻WhatsApp佘先生，希望佢交待事實。
佘先生之後唔知係咪「良心發現」，有上到陳媽媽屋企道歉，錄音中佘先生透露戶口千幾萬資金只剩返保險，親友問佢份保險供晒未，佘先生指未供完，只係一半多啲，親友表示：「即係仲要畀錢啦！」親友又稱：「我阿姨（陳媽媽）仲要攞多1,500萬出嚟？每張一百萬，有五張（保單），仲要供三年，咁係咪仲要1,500萬？」
佘先生道歉，陳彥行稱計劃總共要供3,000萬！
佘先生：「我知道陳太其實對我好好，我都想用任何方法幫你哋完成申索，但都係同大家講多次對唔住，我都知呢樣嘢好煩，真係對唔住。」後來陳彥行指佢向銀行追查先了解個「計劃」係咩回事，有6份保單，佢總共要供3,000萬，依家6份保單有5份已經失效。
陳彥行指佢睇返啲啲財務分析表終於知發生咩事：「原來佢想製造個假象，畀人覺得我係一個千萬富翁。」，佢更忍唔住爆喊：「喺我有生之年，都會討返呢個公道。」
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
