download HolidaySmart 假期日常 app
盤點過往8位YouTuber 黑歷史!人紅是非多?!有一半已經停更頻道

盤點過往8位YouTuber 黑歷史!人紅是非多?!有一半已經停更頻道

生活熱話
By Stephanie on 01 Feb 2022
Digital Content Writer

YouTuber呢個職業已經變得越來越普遍,而近日雪姨就因為「盆菜」事件而引發公關災難激嬲一眾網民!其實過往亦有唔少YouTuber都因為言論或者行為而搞到形象插水,等我哋一齊重溫一下啦!

其實過往有唔少YouTuber都曾經惹怒網民,而家即刻睇下有邊幾位啦~Photo from Pumpkin Jenn IG

1.雪姨

有「富貴KOL」之稱嘅雪姨早前因為將2間酒店同茶餐廳嘅盆菜作出比較,令唔少網民認為測試並唔公平,因此而惹起網民一面倒嘅負評。雖然兩度喺社交平台上道歉,但都未能平息大家嘅怒火!

雪姨日前上載嘅盆菜試食影片,獲得網民一面倒負評!Photo from 雪姨YouTube

雖然雪姨道歉並且將影片下架,但都未能平息網民嘅怒火!Photo from 雪姨IG

就連佢有份籌備嘅新年「大乾爹」市集都因此而掀起退租潮,而雪姨最終亦決定:所有檔主都獲退還全額租金及有權選擇是否繼續參與市集;仲會將所有收益捐俾有需要嘅團體!

雪姨有份籌備嘅大乾爹市集亦受影響,後來佢就宣佈所有收益都會捐俾有需要嘅人!Photo from 雪姨IG

2.Pumpkin Jenn

Pumpkin Jenn 以分享美妝以及穿搭為主,豪爽以及陽光嘅形象成功吸引一班粉絲~但係就曾經被網民指責佢嘅藝術畫作疑似抄襲外國創作者,令唔少網民因此而感到反感!

Pumpkin Jenn以分享穿搭以及美妝為主。Photo from Pumpkin Jenn IG

有網民就指佢過往嘅藝術畫作同外國嘅藝術家非常相似,疑似有抄襲成分?!Photo from Pumpkin Jenn IG

事後佢一度停止經營自己嘅YouTube頻道,不過現時已經再度活躍於Youtube,仲同朋友一齊投資過百萬嘅自家護膚品牌。而佢2020年就已經獲男友歐喬鋒(Tyrese)@天堂鳥求婚,據悉二人正為籌備婚禮而努力賺錢中。

佢現時係歐喬鋒(Tyrese)@天堂鳥嘅未婚妻!Photo from Pumpkin Jenn IG

3.Ming仔

Ming 仔因為上載《今日freestyle:每天自戀多一些》而獲得網民們嘅關注,訂閱人數曾經高達50萬人!其後,佢亦獲邀涉足影視界,包括客串電視劇《溝女不離三兄弟》、《三不如三》以及主持旅遊節目《一個人去旅行》。

Ming仔憑著拍攝《今日freestyle》系列影片而為人熟悉!Photo from Ming仔IG

最高峰時期嘅佢一度擁有50萬粉絲訂閱頻道!Photo from Ming仔IG

2019年,Ming仔因為喺直播中多次失言,惹怒一班一直支持佢嘅粉絲,頓時痛失10萬粉絲。直到,現時佢依然會定時喺頻道上載影片,但熱度已經不如以前!

2019年,Ming仔喺直播中多次失言,令佢失去至少10萬粉絲!Photo from Ming仔IG

4.Alicehaha

Alicehaha 係一位美妝YouTuber,仲經常同網民分享好用嘅彩妝或者日用品等。後來,佢曾經嘗試經營網店,並且售賣疑似係高仿嘅外國品牌餐具俾客人,被網民批評「食水超深」!

Alicehaha 經常都會同大家分享日常生活,吸引唔少網民觀看!Photo from aliceha IG

後來,佢被網民發現疑似出售高仿外國品牌餐具,引起熱議!Photo from aliceha IG

另外,已經結婚成為人母嘅Alice仲被網民指責佢育兒方式,包括:餵人奶期間食減肥藥、將兒子放入漆黑房間「鎮定情緒」等都引起網民爭議。現時佢已經有接近1年時間冇更新過自己嘅頻道以及社交平台!

成為人母後嘅Alice就有向大家分享育兒心得,但佢嘅湊B方法都受到網民質疑?!Photo from aliceha IG

5.屎萊姆

屎萊姆初時因為上載自己打機嘅影片而為人熟悉,後來就拍攝各種唔同嘅影片,例如:試食、旅遊、日常Vlog等。不過自從被遊戲實況主慕容大爆壟斷香港YouTube界利益,仲嘗試控制網絡輿論,引起網民熱議!

屎萊姆被慕容直指壟斷香港YouTube界嘅利益,並且幕後擁有好強大嘅後台!Photo from 屎萊姆IG

而影片中提及屎萊姆幕後有好強大嘅後台,包括:電競公司CGA、英皇、政府等,以及同佢合作嘅一班網紅簡稱「屎家軍」!其後,屎萊姆就拍攝影片一一否認事實,但就由於態度囂張,令網民對佢更加反感。自從該事件後,佢就再冇喺YouTube上載影片,但依然有更新IG!

 屎萊姆拍片為自己作出澄清,但有網民就認為佢態度唔好!Photo from 屎萊姆的3次元 @YouTube

現時屎萊姆暫停更新YouTube,但就有關繼續於IG po相,分享同妻子以及仔仔嘅生活!Photo from 屎萊姆IG

6.「大佬B」呂倩萍

被稱為「大佬B」嘅呂倩萍係元老級嘅美妝YouTuber,過往因為模仿明星嘅妝容而出名,曾擁有逾20萬粉絲。後來,佢就開始創建自己嘅美容生活品牌,但就被網民指佢嘅其中一款隱形眼鏡同日本品牌非常相似,不過佢堅稱只係包裝相似,唔願意道歉,引起爭議!

「大佬B」呂倩萍可以話係最元老級嘅美妝YouTuber!Photo from brenlui @IG

大佬B所出售嘅隱形眼鏡同某日本品牌非常相似,但佢就堅稱只係包裝似,引起網民反感!Photo from brenlui @IG

除此之外,佢仲因為喺香港《多啦A夢》配音員林保全逝世嘅時候,拍攝化妝影片扮「叮噹」,令唔少網民都認為佢嘅行為係唔尊重逝者!

而「大佬B」呂倩萍曾經喺多啦A夢配音員林保全逝世時,上載多啦A夢化妝影片,令大家都覺得佢利用話題增加自己點擊率!Photo from 連登討論區

7.Yaki Wong

Yaki Wong表示自己曾經整容逾30次,亦多次喺影片中講述有關嘅資訊,大膽豪爽嘅作風成功吸引唔少網民觀看影片。

Yaki Wong 坦承自己16歲嘅時候開始整容,至今已經整容多達30次!Photo from Yaki Wong IG

佢直率大膽嘅作風成功吸引一班網民收睇佢嘅影片!Photo from Yaki Wong IG

不過有網民就認為佢過度鼓吹瘦身,仲經常喺影片中買廣告等,曾經一度成為網民熱議嘅對象。事到如今,佢已經接近1年冇更新過頻道,並且努力經營自己嘅醫美生意!

但有網民就認為佢過度推崇瘦身以及醫美,令佢一度成為討論區熱話。Photo from Yaki Wong IG

8. Spoon

Spoon以分享美妝以及服裝為主,憑著多樣化嘅風格成功吸引唔少女粉絲,亦獲邀出席唔少品牌活動。後來,佢喺IG出售自己嘅二手衫,但就被網民發現佢刻意抬高售價,引起網民不滿!

Spoon主要以分享美妝以及穿搭影片,仲經常獲邀出席品牌活動。Photo from khengchan_ @IG

佢曾經喺IG向網民出售二手衫,被發現抬高價錢售賣,令網民不滿!Photo from khengchan_ @IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

盤點10位元老級YouTuber!大部分都仲有經營頻道 人氣卻大不如前?

28 Jan , 2022

YouTuber呢個職業近年開始興起,現時亦增加咗唔少新頻道。其實有好多網絡紅人好耐之前就已經擁有自己嘅YouTube頻道,但而家嘅知名度卻不如以前?!而家即刻睇下有邊幾位元老級別嘅YouTuber啦~

其實Youtuber呢個行業好早之前就已經出現,而家等我哋睇下有邊幾位本地原始YouTuber啦~Photo from 小花IG

1. Ming仔

Ming仔(梁嘉銘)可以稱得上係香港YouTuber最早成名嘅其中一位,憑著拍攝《今日freestyle:每天自戀多一些》嘅影片而大獲好評。原本頻道擁有足足50萬粉絲嘅佢,因為2019年喺網絡直播嘅時候失言,而惹怒一眾網民,頓時失去大約10萬人追蹤!

ming仔本身都擁有50萬粉絲,而且佢嘅旅遊影片等亦有好多人觀看!Photo from mingjai14 @IG

2019年,ming仔因為網絡失言,頓時痛失10萬粉絲!Photo from mingjai14 @IG

現時,Ming仔依然有繼續經營YouTube頻道,而影片嘅題材亦變成知識型嘅影片。上年,就有傳Ming 仔加入TVB做藝人,不過佢就解釋應該係因為曾經拍攝節目《一個人去旅行》時所留低嘅資料,強調現階段只會專注獨立發展!

ming仔現時拍攝嘅影片以知識型影片居多Photo from mingjai14 @YouTube

上年仲有傳佢將會成為TVB藝人,但佢就否認!Photo from mingjai14 @IG

2. cookinghayhay

Hay Wong(黃俊熙)以拍攝「Cookinghayhay」系列嘅煮食影片而為人熟悉,並偶爾會同女友Meghan一齊拍攝,瀏覽人數高達百萬人,亦因此而獲得唔少廣告商合作嘅機會!

Cooking hayhay因為拍攝煮食影片而成名。Photo from haywong709 @ YouTube

當中唔少影片都有佢女友Meghan參與!Photo from haywong709 @ YouTube

現時,佢依然有定時更新自己嘅頻道,而拍攝嘅影片就非常廣泛,包括:遊戲直播、寵物以及飲食影片等。

而佢現時所拍攝嘅影片類型就變得非常多元化Photo from haywong709 @ YouTube

3. Eminleo

Eminleo早於2009年開始活躍於YouTube,因為拍攝影片《取消唔到有線合約》以及《足球小將 搞笑字幕版》等影片而人氣急升!不過佢喺2013年就宣佈暫別YouTube頻道,其後仲被網民大爆政協身分,引起熱議。

Eminleo 喺2009年就開始活躍於Youtube,因為拍攝惡搞影片而為人熟悉!Photo from eminleo @YouTube

佢喺2013年宣佈暫別YouTube!Photo from eminleo @YouTube

而Eminleo嘅頻道最近一次更新已經係1年前,而家亦甚少會喺社交平台上出post!

eminleo 就曾經被爆政協身分Photo from eminleo @YouTube

4. 司徒夾帶

「司徒夾帶」係Umovie旗下嘅虛擬人物,並由陳學鳴扮演。當時佢所拍攝嘅影片經常都會影射唔同嘅事件,包括:扮陳志雲、二次創作《職安熱辣辣》等,以搞笑嘅形式抽水!

司徒夾帶一角係由陳學鳴扮演。Photo from umoviegroup @YouTube

主要以搞笑形式諷刺時事以及世界大事Photo from umoviegroup @YouTube

2014年,陳學鳴成立網絡藝人公司,成為其中一位股東,並創建自己嘅網站進行創作,不過網民就需要付月費訂閱先能夠收睇~

現時司徒夾帶亦開設咗另外一個收費網站,並經營網絡藝人公司。Photo from Patreon網站

而佢就喺公司嘅其中一位股東Photo from 司徒夾帶IG

5. Bomba Production

Bomba Production係由一班年輕男女所組成嘅拍攝團隊,當中以成員Fox、Kibi、Felix最為人熟悉!當中大部分影片都係以搞笑嘅角度去講述大家日常會遇到嘅事情,包括:拍拖時嘅煩惱、香港人放工生活等,貼地題材成功引起網民共鳴!

BOMBA影片中經常出現嘅有Fox、Felix以及KibiPhoto from BOMBA @ YouTube

網民都大讚佢哋製作用心,認為影片高質!Photo from BOMBA @ YouTube

喺2019年,Bomba於YouTube發佈咗一條影片,表示將會停止更新頻道,並另行創立收費網站「Roarship」,該網站已經於2021年3月正式停止運行!當時就一度引起網民熱議,認為佢哋嘅收費有啲昂貴。2020年,Bomba又突然上載影片,利用紀錄片嘅形式表示「為過錯買單」,但都未能重新獲得網民嘅支持。

不過佢哋2019年突然宣佈將會停止更新YouTube,另創收費網站!Photo from BOMBA @ YouTube

佢哋所創建嘅網站roarship亦於2021年3月停止運行!Photo from roarship_ig

6. 薑檸樂

薑檸樂(蕭慶峰)過往活躍於高登討論區,因為改寫歌詞而成名,著名作品包括:《霧之選》、《亞視主題曲》等。現時佢依然有定時上載影片,除咗改歌詞外,亦會拍攝日常影片。

薑檸樂過往以改寫歌詞以成功獲得網民關注!Photo from 薑檸樂IG

薑檸樂現時都有繼續更新YouTube頻道,並以拍攝日常影片為主Photo from gingerlemoncola @YouTube

7. 「Ruby Close」

Ruby(鄧凱旻)係2010年代末代會考生,憑著批評考官英文水平而出位,加上每條影片結尾佢都會以獨有心心手勢講「Ruby Close」,令網民留下深刻印象!

當年Ruby憑著批評會考考官英文發音而出位!Photo from Ruby Close YouTube

影片後段嘅「Ruby Close」亦係佢嘅代表動作!Photo from Ruby Close YouTube

後來佢就遠赴瑞士讀書,回港後就參加過有線電視嘅《十萬蚊港女大翻身》以及ViuTV嘅《美選D.n.A》。雖然佢現時都仲有經營YouTube頻道,不過更新嘅次數就比較少,而且主要以上載旅行影片為主!

Ruby曾經參加過有線電視同ViuTV嘅節目Photo from ruby_bebebe @IG

而家依然有經營頻道,主要上傳旅行影片居多!Photo from Ruby Close YouTube

8. 小花

小花(譚杏藍)2010年就開始經營頻道,初時佢大多以自彈自唱以及化妝影片為主,後來亦會分享日常及旅遊經歷,係唔少人都認識嘅YouTuber!2009年佢曾經參加亞視節目《亞洲星光大道,後來簽約成為旗下藝人。

小花初時大多以拍攝化妝以及自彈自唱影片Photo from Hana Tam @YouTube

小花曾經係亞視嘅旗下藝人。Photo from 小花IG

近年,佢就終於完成夢想晉升成為歌手,而佢男友就係ToNick主音趙善恆,二人仲有合作填詞《早餐歌》!

小花近年亦成為歌手Photo from Hana Tam @YouTube

小花現任男友為男友就係ToNick主音趙善恆Photo from 小花IG

9. Noel Lo (高妹)

Noel因為拍攝Goyeah.com嘅兩性影片而為人熟悉,模仿能力非常強而且講嘢風趣幽默,而大受歡迎!後來,佢就經常連同另一位YouTuber伍仔拍片,講述城中熱話!

Noel高妹因為拍攝兩性影片而為人熟悉。Photo from YouTube

後來Noel就連同伍仔一齊拍攝影片!Photo from 伍妞有伍仔 @YouTube

10.Queenie Chan 

Queenie Chan 可以話係原始級嘅美妝YouTuber,佢拍攝嘅影片《老娘喜愛的睫毛膏MY FAVORITE MASCARA》,該影片足足吸引20萬人瀏覽!而佢嘅影片就大多以美容化妝為主,所以成功吸引唔少女粉絲,仲因此而獲邀上節目《盛女愛作戰》做嘉賓同大家分享扮靚心得。

主要片段都係護膚以及美妝教學,吸引唔少女粉絲觀看!Photo from Queenie Chan @YouTube

Queenie Chan應該係美妝YouTuber嘅始祖!Photo from Queenie Chan @YouTube

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel