鍾鎮濤為好友慶生曝光上海豪宅！歐陸風獨立屋！樓底超高/裝潢豪華

娛樂新聞

By Stephanie on 07 Feb 2022

Digital Content Writer

鍾鎮濤（阿B）最近出席內地春晚表演，事隔8年再一次同溫拿樂隊嘅成員們登台，令唔少內地網民非常興奮～日前，佢就同好友們慶祝梁家輝嘅生日，仲喺自己位於上海嘅豪宅內舉辦party，仲好開心咁一齊喺屋內夾band！

Photo from 鍾鎮濤微博

# 鍾鎮濤與溫拿成員合體出席春晚！

現年68歲嘅鍾鎮濤（阿B）近年大多喺內地發展，不時都會出演綜藝節目或者登台，有指佢仲已經搬往上海長居，過著半退休嘅悠閒生活。而最近佢就同「溫拿樂隊」嘅成員久違地合體表演，令唔少網民都直呼好懷念！

Photo from 央視春晚

# 於豪宅中與梁家輝慶生！

日前，鍾鎮濤就同影帝梁家輝慶祝64歲生日，仲邀請好友們包括台灣歌手信（蘇見信）出席派對。雖然未有列明派對嘅確切地點，不過根據網民推測應該就係鍾鎮濤位於上海嘅豪宅喇！

Photo from 鍾鎮濤微博

# 客廳超大，三人興奮夾band！

從照片中所見，佢哋一行人為梁家輝預備咗4個生日蛋糕，仲一齊喺大廳內即興夾band，玩得非常盡興～豪宅內部主要以白色歐陸風為主，而牆上不時見到有掛畫，設計簡約又古典！

Photo from 小紅書

# 經常都邀請朋友去豪宅作客

而且豪宅樓底亦似乎十分高，空間好寬闊，又難怪鍾鎮濤會經常邀請朋友去佢屋企相聚嘅～而飯廳就擺放一張白色嘅長枱，可以同時容納多人；後方就擺放咗一個白色透明櫃以及植物作為點綴，以往佢曾經邀請譚詠麟、應采兒等人一邊玩遊戲一邊喝酒，非常愜意！而屋外仲疑似有過千呎嘅花園，面積非常大。

Photo from 鍾鎮濤微博

# 早期事業一帆風順

其實鍾鎮濤嘅早期嘅事業可以話係非常順利，組成溫拿樂團後歌曲亦紅遍亞洲！直到1980年嘅時候，成員們先開始各自發展，而佢就喺台灣拍攝電影《小城故事》等，令佢人氣越來越旺。喺1988年，鍾鎮濤與章小蕙舉辦世紀婚禮，並育有一子一女，事業感情兩得意～直到1996年有傳媒爆出章小蕙同富商陳曜旻關係密切，令佢哋嘅感情出現危機！

Photo from 范姜微博

Photo from 章小蕙微博

# 1997年經歷人生低谷，但遇上細20年女友范姜！

1997年，鍾鎮濤因為金融風暴投資失利，導致負債逾兩億港幣；同年佢亦正式同章小蕙離婚，受到雙重打擊，最後於2002年正式宣佈破產！後來，佢就遇到比佢細20年嘅台灣女友范姜素貞（范姜），而女方一直都對佢不離不棄，並且用心照顧佢嘅一對子女，鍾鎮濤喺2006年破產令解除，而二人就於2014年喺峇里島辦婚禮～