57歲曹永廉決定隻身北上工作養家！疫情下收入大減7成！詳細賺錢計畫曝光

娛樂新聞

By Stephanie on 24 Feb 2022

Digital Content Writer

香港正在爆發第五波疫情，因此政府再進一步收緊防疫限制，一系列措施亦令經濟大受影響。唔少藝人嘅工作量都大大減少，而曹永廉 (阿廉) 就係其中一位。據悉，佢嘅收入比高峰時期減少咗70%咁多，正密謀北上搵真銀養家，開拓全新商機！

Photo from 曹永廉IG

# 1994年歌手身份出道

現年57歲嘅曹永廉 (阿廉) 入行至今已經28年，初期用歌手身分出道但大眾反應一般，所以1998年就轉戰電視圈簽約成為TVB藝人。過去佢曾經參與多部電視劇，包括：《妙手仁心II》、《超時空男臣》等，飾演男配角居多！

Photo from TVB

# 曹永廉收入大減7成！

據悉，曹永廉嘅收入亦受到疫情影響，向傳媒透露近呢2年除咗拍劇就冇接過其他工作，喺香港工作可以話係零外快，仲以「坐食山崩」形容！佢表示收入同高峰時期相比足足減少咗7成，宜家都只係靠以往嘅積蓄養家，暫時尚能夠維持生活，但就必定要再另覓出路。

Photo from 曹永廉IG

# 決定北上工作！

曹永廉已經諗好解決方法，計畫要暫時離開妻兒，隻身北上賺錢養家！而佢就打算先住喺廣州，最多逗留半年左右，原定於3月實行計畫。可惜疫情導致佢有份出演嘅新劇《破毒強人》拍攝受阻，令返內地嘅時間要延遲，而佢都表示對新發展感到非常期待！

Photo from 曹永廉IG

# 原來仲有投資其他生意？！

其實曹永廉本身同好友洪天明、唐文龍一齊喺內地投資生意，主要出售兒童用品以及飲料，但佢就坦承自己過去都好少參與，認為可以趁機好好開拓更多商機。雖然佢宜家依然仲喺香港，但聽聞佢已經獲邀品牌邀請成為飲品機嘅代言人！

Photo from 曹永廉IG

# 近年身體接連出問題

上年，曹永廉就透露自己曾經因為心臟問題而秘密入院進行「通波仔」手術，但後來又發現出現腎石問題！而佢就話20幾時就已經飽受腎石問題困擾，仲痛到行唔到路，幸好今次問題不大，唔需要做手術。拼搏工作之餘都真係要好好注意身體啊～

Photo from 曹永廉IG

# 稱家人係動力來源！

曹永廉2007年同姜大衛大囡姜依蘭結婚，婚後育有一子一女，分別係10歲同13歲。非常顧家嘅佢曾經話家人就係佢嘅動力來源「做好多嘢都係為咗小朋友，希望為佢哋將來做好準備」，又難怪佢會趁年輕嘅時候決定北上工作好好闖一下嘅～而外父姜大衛過往就喺節目講笑咁話「將個囡養到咁大交俾個咁嘅人」，令大家爆笑，二人關係真係十分融洽～