《流行都市》10位富貴主持大檢閱！身家億萬+超多副業寵物都享3個工人？

By Cheryl on 25 Feb 2022

Digital Editor

TVB資訊節目《流行都市》與前身《都市閒情》同樣介紹生活與健康資訊，當中一班主持都非富則貴，例如老臣子安德尊就有「元朗地王」稱號，連新加入嘅主持都唔惹少，大搞副業賺外快，以下落嚟就睇下呢10名主持生活有幾豪啦！

Photo from TVB

#安德尊

人稱「大王」嘅安德尊據聞有龐大嘅家族生意，而佢本人亦在多年來購入大批地皮起樓和炒地舖，更被稱為「元朗地王」，而且佢於加拿大都擁有物業，身家以億計算，更曾被好友譚小環笑稱為「安億萬」。據悉，富有嘅安德尊會經常請同事食飯，接job亦唔計較薪酬，相當慷慨。

Photo from 章志文IG

#彭慧中

有指彭慧中家族擁時裝貿易公司，在內地與本地設多間廠房。據聞其父親於2008年以2,100萬買入3,000呎康樂園獨立屋畀家人自住，而彭慧中平時亦以價值60多萬嘅房車代步。

Photo from 彭慧中 IG

Photo from 《我要做業主》TVB

#宋芝齡

中韓混血兼安德尊緋聞女友宋芝齡在2008年開始同旅港韓籍記者合作，開辦韓語學校，至今生意良好，搞得有聲有色，有指其月入達六位數，係約TVB人工嘅十倍。佢亦有開設移民生意，幫助想到韓國嘅香港人做投資移民。遇上疫情，佢曾被問旗下學校執笠未，宋芝齡則表示「未執得」，相當穩陣，佢近年亦有投身金融業「炒輪」。

Photo from 宋芝齡 IG

據聞宋芝齡揸百萬名車出入，可謂圈中隱形富婆，而佢飼養嘅名種愛犬Borzoi都好幸福，有傳媒曾拍到有三位工人服侍Borzoi。

Photo from 宋芝齡 IG

#劉彩玉

初頭以歌手身份出道嘅劉彩玉2000年下嫁前香港壁球代表隊，兼前香港體育學院壁球總教練蔡玉坤，現時更係香港體育學院副院長，在體壇別具地位。劉彩玉形容佢同丈夫係一凹一凸，一動一靜，表示五音不全嘅丈夫鐘意聽自己唱歌，而相比熱愛壁球嘅丈夫，自己則無任何運動細胞。

Photo from 劉彩玉 FB

#姚嘉妮

姚嘉妮同丈夫林祖輝在2013年開設童裝生意，據聞身家過億，品牌至今已開了6間分店，當中元朗舖更逾千呎，品牌更獲多個知名運動品牌嘅獨家童裝代理，早前更傳出有意上市，真係越做越大。

Photo from 姚嘉妮 IG

從佢IG相可見，其居所空間都幾大，露台外一片綠色園景，採光度十足，感覺好舒適。

Photo from 姚嘉妮 IG

#張美妮

張美妮父母曾經營餐廳生意，而佢本人現時亦係髮型屋老闆娘，擁數間分店。張美妮在2013年更開設了西式餐廳。育有一名2歲女兒嘅佢於今年初復出，重返電視台，更在《開心大綜藝》中同張嘉兒、孟瑤、陳爽組成「辣媽女團」勁歌熱舞。

Photo from 張美妮 IG

#謝芷倫

謝芷倫除了在《愛．回家之開心速遞》中飾演大小姐（林淑敏飾）嘅秘書Mandy林美香一角，亦係《流行都市》主持之一，佢不時在社交網分享生活點滴，可見佢居住嘅豪宅係複式設計，空間好大，同時擁巨型露台。

Photo from 謝芷倫 IG

照片亦可見佢經常出入遊艇會、打高爾夫球、玩Wakesurf，相當愜意。佢早前更投資6位數開設花膠生意，獲「花膠公主」稱號，一嘗做老闆滋味。

Photo from 謝芷倫 IG

#黃嘉雯

2019年港姐冠軍黃嘉雯家底雄厚，家住市值半億嘅1,800呎海名軒豪宅。參選港姐時佢已被拍到與瑞士籍男友一起外出，任職市場策劃嘅男友當時仲教黃嘉雯刪除社交網部分相片，避免起底；男友亦為了黃嘉雯而搬到香港定居，相當恩愛。

Photo from 黃嘉雯 IG

#蔡嘉欣

落選港姐蔡嘉欣不時在IG曬名牌手袋，更曾拍片大曬自己手持$40萬現金出外辦理匯款，佢除了經營網上時裝店，亦有代理美容保健品。雖然佢被不少網民直批太愛炫富，但無阻佢分享做副業賺取外快嘅點滴。

Photo from 蔡嘉欣 IG

#焦浩軒

焦浩軒家境不錯，小學五年級時跟家人移居加拿大生活，其後畢業於知名學府哥倫比亞大學，當時主修會計及副修國際貿易，佢好多同學畢業後擔任會計師，收入豐厚，但焦浩軒唔想工作咁悶，最後決定回港追尋演員夢，並考入TVB電視藝員訓練班，曾參演《愛．回家之開心速遞》、《十月初五的月光》等劇集，近年亦成為《都市閒情》，到現在《流行都市》主持之一。