家族榮耀｜黃浩然戲內花心男現實係愛妻號！挺過健康+婚姻危機結婚16年依然恩愛

By Cheryl on 02 Mar 2022

Digital Editor

劇集《家族榮耀》中除了有幾位女主角大鬥演技外，當中飾演二少爺馬耀祖嘅黃浩然都相當搶眼，雖然佢在劇中有外遇，係一名渣男，但現實中佢係一名愛妻號。黃浩然同太太莫家嘉（KaKa）結婚16年，當中雖出現過不少危機，但最終都只令二人更恩愛。

Photo from 微博

拍《新紮師妹》結識太太

46歲黃浩然在拍攝電影《新紮師妹》時認識了當時擔任電影形象指導嘅莫家嘉（KaKa），而KaKa曾在電台訪問中透露，早於電影開拍前一年，佢舅父已想做媒人介紹雙方認識，但二人都覺得相睇太尷尬而婉拒。KaKa亦表示在參與電影工作初期，也未有被黃浩然吸引，但經過一番相處了解後，佢漸漸發現大家個性相投，最後決定展開交往。

Photo from 黃浩然 FB

黃浩然早婚，笑言對事業無咩影響

黃浩然曾笑稱太太係發現佢工作態度認真，待人溫柔才答應交往，而黃浩然則喜歡對方善良顧家。黃浩然同KaKa拍拖4年後於2005年結婚，男方當時30歲，喺圈中屬早婚之人。黃浩然稱自己係一名傳統人，認為人生除了事業就係家庭，兩者兼備才圓滿，而且佢都想有小朋友，所以搵到適合嘅人就結婚。佢亦笑言自己當年唔算大紅大紫，所以即使結婚對事業都唔會有太大影響「都冇嘢輸㗎啦！」

Photo from 黃浩然 FB

太太家境顯赫

雖然黃浩然認為早婚對佢嘅演藝發展無咩影響，但當時都引起不少人關注其太太背景。莫家嘉係億萬馬主莫英儒嘅千金，外父為多家企業嘅董事長，相當猛料。據聞外父家住市值港幣過億元嘅九龍塘別墅，仲有多台豪華名車。二人婚後入住外父嘅千萬豪宅，正式榮升駙馬爺。兩夫婦現時育有兩子，一家四口生活幸福。

Photo from 黃浩然 FB

黃浩然曾因健康停工，太太不離不棄

黃浩然2006年加入TVB後備受力捧，自2010年起佢擔正多套電視劇，更奪得「飛躍進步男藝員」獎項。不過，可以因為工作太頻密，黃浩然在2014年被確診患有免疫系統疾病「貝賽特氏症」，並需辭演剛接拍嘅新劇《張保仔》，更要停工休養一年。

Photo from 黃浩然 FB

黃浩然被逼暫時放下事業，心情一定唔好受，但幸好佢太太對佢不離不棄，除了悉心照顧家庭，更擔任公關角色，代表老公回覆外界關心。所以黃浩然康復後都寧願減產，更珍惜與家人相處嘅時間。

Photo from 黃浩然 FB

太太曾被爆與男子親密照

兩夫妻雖然挺過健康危機，但到2018年又面對了另一問題。當年有人向傳媒發放長達19頁嘅告密信，更附上KaKa同一名男子嘅親密照，以及佢同該男嘅私訊圖，仲稱KaKa搞亂別人家庭。不過，黃浩然並無因此動搖，佢受訪回應時稱，嗰啲照片都係舊照，而照片內展示嘅行為屬朋友間正常舉動，並無不妥，佢又坦言唔認識照片內男子，但仍絕對信任太太，同時表示事件只係已過去嘅小問題。